Josua 24 - Uwumbɔr aagbaŋ

Josua aah nan len tibɔr Israel yaab chee Sekem aatiŋ ni pu na

¹ Josua nan kuun Israel aanibol ngbaan mɔmɔk dan ubaa chee Sekem aatiŋ ni. U nan yin baaninkpiib, ni baasalolm, ni baabɔjirb, ni baayidam, le bi mɔmɔk kuun ni Uwumbɔr aanimbiin ni.

² Le Josua bui bi mɔmɔk ke, “Uwumbɔr u ye timi Israel yaab Aadindaan na aah len pu na sɔ: ‘N‑yoonn mu jer na, niyaajatiib nan bi Yufrates Aamɔɔdapuul le ki dooni ŋiwaa. Niyaajatiib ngbaan ubaa le nan ye Tera, u nan ye Abraham ni Nahor aate na.

³ Le min Uwumbɔr nan yin niyaaja Abraham, ki nyan ni u Yufrates Aamɔɔdapuul, le u dan Kanaann aatiŋ kimina ponn ni. M nan tii u yaabitiib pam. Uma le nan ma Aisak,

⁴ le Aisak mu ma Jakob ni Esɔ. Le m nan di ŋigongon aatiŋ ki bi yin ki ke Edom na ki di tii Esɔ, u li joo, le niyaaja Jakob ni waabim nan buen Ijipt aatiŋ ni.

⁵ Le m nan tun Moses ni Aaronn, ki cha ntafadaan lir Ijipt yaab pu, ki nan nyan ni nitetiib nima chee.

⁶ Maah nan nyan ni bi Ijipt aatiŋ ni na, Ijipt yaab nan san paa bi pu, ki joo itaan ni tɔroku tiib, le nitetiib aah ti pii Nnyusakpem Mamam buyoonn na,

⁷ le bi wii ki yin mi ke m nan ter bi, le m cha mbɔmbɔɔn dan bi ni Ijipt yaab aakaasisik ni. M nan cha Ijipt yaab bee nnyusakpem na ni. Ni nyi maah nan ŋa Ijipt yaab pu na mɔmɔk. “‘Ni nan bi nteersakpiin ni, ni yunn pam.

⁸ Le m nan joo ni nimi Amor yaab aatiŋ ni, Jɔɔdann Aamɔɔl aawipuul wɔb. Bi nan ton nimi butɔb, le m cha ni nyaŋ bi. Ni nan gaa baatim, le naah tur koo bi ni na, m ku bi.

⁹ Moab yaab aabɔr u bi nan yin u ke Balak, aan ute nan ye Sipor na, nan ton nimi butɔb. U nan tun unii, Beor aajapɔɔn u bi nan yin u ke Balaam na chee, ki bui u ke u puun lii ni pu,

¹⁰ le maa kii tii Balaam, le u tee ŋa tinyoor ŋa ni pu. M nan ŋa kina le ki gaa nimi Balak aaŋaal ni lii.

¹¹ Le ni nan puur Jɔɔdann Aamɔɔl ki dan Jeriko aatiŋ ni. Le Jeriko yaab ton nimi butɔb. Nee aapuwɔb, le Amor yaab, ni Peris yaab, ni Kanaann yaab, ni Hef yaab, ni Girgas yaab, ni Hif yaab, ni Jebus yaab mu nan ton nimi butɔb, le m nan cha ni nyaŋ bi mɔmɔk.

¹² Naah nan tur koo bi ponn ni pu na, m nan cha ijawaan koo bi, aan ni ŋmaa jenn nyan Amor yaab aabɔrb bilee ngbaan. Naa nan ye nimi aajaak aajum ni itɔi pu le ni nan ŋmaa nyaŋ.

¹³ Min le di ikpaakon i naa nan kon i ponn ni kpala na tii nimi, le ki di ntim mu naa nan maa mu na tii nimi. Le dandana wee, ni bi ntim ngbaan ni, ki ji ndaan aasubil, ni olif aakpan aasubil aasui i mu naa nan bun i na.’”

¹⁴ Josua nan ki bui bi ke, “Kina pu na, ni li nyuŋni Uwumbɔr, ki gaa u iŋaal ilee, ki li dii u mbamɔm. Ni di ŋiwaa ŋi niyaajatiib nan dooni ŋi Mesopotamia, ni Ijipt aatim ni na lii, aan ki dii Uwumbɔr baanja.

¹⁵ Ni yaa kaa gee ke ni li dooni u kan, din wee, ni nyan naah ga dii u na; ni ga li dooni ŋiwaa ŋi niyaajatiib nan dooni ŋi Mesopotamia aatiŋ ni na aa? bee ni ga li dooni Amor yaab, bi ni bi baatiŋ ponn ni na le aawaa? M ni maamaal ma kan, ti ga li dii Uwumbɔr la.”

¹⁶ Le binib ngbaan nan giin bui u ke, “Taan di Uwumbɔr lii kpala ki dii liwaal libaa.

¹⁷ Tidindaan Uwumbɔr le nan nyan ni titetiib, ni timi, Ijipt yaab aanaagbiir ni, le ti kan lijinjiir aatun ŋi u tun na. Taah nan bi nin chee na mɔmɔk, uma le nan biin ti pu, le ŋinibol ŋimɔk ti koo bi ni na ubaa aa nan ŋa timi nibaa.

¹⁸ Taah nan tur koo kitiŋ kee ni na, Uwumbɔr jenn nyan Amor yaab bimɔk nan bi do na, kina pu na, ti ga dii Uwumbɔr la, uma le ye Tidindaan.”

¹⁹ Le Josua bui binib ngbaan ke, “Naan ŋmaa dii Uwumbɔr, ba pu? Uwumbɔr ye chain la, kaan di cha nimi aatunwanbir pinn nimi. U ye lipiipoln Aawumbɔr la,

²⁰ le ni yaa yii u, ki ban ni li dooni ŋiwaa kan, u ga daa nitafal. Hali waah nan ŋa tinyoor ŋa ni pu na, ni yaa dii liwaal libaa kan, u ga kuln nimi.”

²¹ Le binib ngbaan bui Josua ke, “Aayii, ti ga sil li dii Uwumbɔr la.”

²² Le Josua bui bi ke, “Nimi le ye nibaa aaseeraadam, ki len mbamɔn ke ni ga li dii Uwumbɔr la.” Le bi giin bui u ke, “Mbamɔn, timi le ye tibaa aaseeraadam.”

²³ Le Josua bui bi ke, “Ni yaa ye kina kan, ni nyan ŋiwaa ŋi bi ni chee na man, aan ki puu ke ni ga sil dii Uwumbɔr u ye timi Israel yaab Aadindaan na.”

²⁴ Le binib ngbaan bui Josua ke, “Ti ga li dii Tidindaan Uwumbɔr la, ki ga kii waah len pu na.”

²⁵ Nima pu na, liyaadaal ngbaan le Josua nan cha bi puu tipuur kina, nima chee, Sekem aatiŋ ni, le ki tii bi nsurm ni ikaal, bi li dii.

²⁶ Josua nan ŋmee ikaal ngbaan Uwumbɔr aakaal aagbaŋ ponn ni. U nan yoor litakpasakpeln libaa, le ki di ŋum likpaln aasub taab, Uwumbɔr Aabool chee,

²⁷ le ki bui binib ngbaan ke, “Litakpal limina le ye timi aaseeraadaan. Litakpal ngbaan ŋun Uwumbɔr aah bui timi tibɔr ti na mɔmɔk. Kina pu na, lima le ye seeraa ki ga li teer nimi, ni taa yii nimi Aawumbɔr aamɔb.”

²⁸ Nee aapuwɔb, le Josua nan cha binib ngbaan mɔmɔk gir kun baah nyan ni ntim mu ponn ni na.

Josua ni utotoor Eleasar aah kpo pu na

²⁹ Nee aapuwɔb le Uwumbɔr aatutunn Josua, u nan ye Nunn aajapɔɔn na kpo. U nan saa ŋibin nkub ni kipiik le ki nin kpo.

³⁰ Bi nan di u sub udo aatiŋ ki bi ŋigongon aatiŋ ni, aan bi yin ki ke Timnaf Sera na ni la. Kitiŋ ngbaan nan bi Efraim aatiŋ ni, Gaas Aajool aaŋangan wɔb la.

³¹ Josua aah nan bi limɔfal ni, ki ti saa buyoonn u kpo na, Israel yaab nan dii Uwumbɔr mbamɔm, le waah kpo na, bi nan beenin dii u mbamɔm, ki ti saa buyoonn baaninkpiib bi nan kan Uwumbɔr aah nan ŋa lijinjiir aawan pu na, mu nan kpoi.

³² Josef aah nan kpo Ijipt aatiŋ ni, aan Israel yaab joo ni waakpab i na, bi nan di i sub Sekem aatiŋ ni, kitiŋ ki Jakob nan daa Hamor aajapɔtiib chee na. Hamor nan ye Sekem aate la. Jakob nan daa kitiŋ ngbaan tikunabr aamombil nkub la. Josef aayaabitiib le nan jin ki lifaal.

³³ Aaronn aajapɔɔn u bi nan yin u ke Eleasar na mu nan kpo, le bi nan di u sub Gibea aatiŋ ki bi nan di ki tii ujapɔɔn Fineas, aan ki bi ŋigongon ni, Efraim yaab aapepel ni na.