Josua 21 - Uwumbɔr aagbaŋ

Baah nan nyan ntim mu tii Liifai aanibol na

¹ Liifai aanibol aaninkpiib nan buen utotoor Eleasar, ni Nunn aajapɔɔn u bi nan yin u ke Josua na, ni Israel yaab aaninkpiib biken chee,

² Silo aatiŋ ki bi Kanaann ni na, le ki ti bui bi ke, “Uwumbɔr nan bui Moses ke u tii timi ntim, ni kimopɔɔk, aan ti ni timi aawakor li koo nima.”

³ Kina pu na, Uwumbɔr aah nan siin pu na, Israel yaab nan ban ntim, ni kimopɔɔk, bi mɔmɔk aapepel ni, ki tii Liifai aanibol ke bi ni baawakor li koo nima chee.

⁴ Liifai aamaal mu nan ye Kohaf aataŋaal ni yaab na le bi nan pue tii ntim. Utotoor Aaronn aamaal nan kan ntim kipiik ni mutaa. Mu nan bi Juda, ni Simeonn, ni Benjaminn aanibol aapepel ni la.

⁵ Kohaf aataŋaal aamaal i nan gur na, bi nan nyan ntim kipiik, mu nan bi Efraim, ni Dann, ni Manase aanibol li nan bi liwilir wɔb na aapepel ni le tii bi.

⁶ Bi nan ban ntim kipiik ni mutaa le tii Gesonn aataŋaal ni aanib. Ntim ngbaan nan bi Isakar, ni Aser, ni Naftali, ni Manase aanibol li nan bi liwipuul wɔb na aapepel ni la.

⁷ Bi nan nyan ntim kipiik ni mulee le tii Merari aataŋaal ni aanib. Ntim ngbaan nan bi Rubenn, ni Gad, ni Sebulunn aanibol aapepel ni la.

⁸ Israel yaab aah nan too inaan ki mee Uwumbɔr, aan u mɔk bi baah ga nyan ntim ni timopɔr ki tii Liifai aanibol pu na le na, kina le u nan bui Moses ke bi ŋa.

⁹ Ntim mu bi nan nyan Juda, ni Simeonn aanibol aapepel ni,

¹⁰ ki di tii Aaronn aamaal mu ye Kohaf aataŋaal ni aanib, ki nyan ni Liifai aanibol ni na le paa na; bi nan pue nyan ntim tii bima la.

¹¹ Bi nan di Aba aatiŋ, ni kimopɔɔk ki mann gonn ki na le tii bi, le bi gur yin ki ke Hebronn, ki bi Juda aagongon aatiŋ ni la. Aba nan ye ŋiwɔk Anak yaab aayaaja.

¹² Mbamɔn, bi nan pue di kitiŋ ngbaan aakpaasar, ni itingbaan tii Jefune aajapɔɔn, u bi nan yin u ke Kaleb na, ke ki li ye waatiŋ.

¹³ Ntim mu nan ki kpee Hebronn aatiŋ ki nan ye mbɔbɔryaan aatiŋ kibaa na pu, bi nan di ntim ngbaan tii utotoor Aaronn aayaabitiib la: muma le ye Libna,

¹⁴ ni Jatir, ni Estemoa,

¹⁵ ni Holonn, ni Debir,

¹⁶ ni Ayinn, ni Juta, ni Bef Semes, ni mu aamopɔr mu: mu nan ye ntim muwae, le ki bi Juda ni Simeonn aanibol aatim ni, bi nan di mu tii utotoor Aaronn aamaal ni yaab.

¹⁷ Bi nan nyan Benjaminn aanibol aapepel ntim munaa le tii bi: ntim ngbaan le nan ye Gibeonn, ni Geba,

¹⁸ ni Anatof, ni Almonn aatim, ni mu aamopɔr.

¹⁹ Ntim ngbaan mɔmɔk nan kpaan kipiik ni mutaa la, ni mu aamopɔr, bi nan di mu tii bitotoorb bi nan ye Aaronn aayaabitiib na la.

²⁰ Liifai aamaal ni yaab, bi nan ye Kohaf aataŋaal pu yaab biken na, bi nan nyan Efraim aapepel ni ntim mubaa tii bi mu.

²¹ Bi nan tii bi ntim munaa la, muma le ye Sekem aatiŋ, ni kaamopɔɔk, ki nan bi ŋigongon aatiŋ ki nan ye Efraim aapepel, ki nan ye mbɔbɔryaan aatiŋ kibaa na la, ni Geser,

²² ni Kibsayim, ni Bef Horonn aatim, ni mu aamopɔr.

²³ Bi nan nyan Dann aapepel mu ni ntim munaa le tii bi, muma le nan ye Elteke, ni Gibetonn,

²⁴ ni Aijalonn, ni Gaf Rimonn, ni mu aamopɔr.

²⁵ Bi nan nyan Manase aanibol aapepel li bi liwilir wɔb na ni ntim mulee le tii bi, muma le nan ye Taanak, ni Gaf Rimonn, ni mu aamopɔr.

²⁶ Bi nan di ntim kipiik ni mu aamopɔr le tii Kohaf aataŋaal pu yaab ngbaan.

²⁷ Liifai aanibol aaker li nan ye Gesonn aataŋaal pu yaab na mu, bi nan nyan ntim mulee le Manase aanibol aapepel li nan bi liwipuul wɔb na tii bi, muma le nan ye Golann aatiŋ ki nan bi Basann ni na, ki nan ye mbɔbɔryaan aatiŋ kibaa la, ni Beestera aatiŋ, ni mu aamopɔr.

²⁸ Bi nan nyan ntim munaa Isakar aanibol aapepel ni tii bi, muma le nan ye Kisionn, ni Daberaf,

²⁹ ni Jamuf, ni Enn Ganim aatim, ni mu aamopɔr.

³⁰ Aser aanibol aapepel ni, bi nan nyan ntim munaa le tii bi, muma le nan ye Misal, ni Abdonn,

³¹ ni Helkaf, ni Rehob aatim, ni mu aamopɔr.

³² Naftali aanibol aapepel ni, bi nan nyan ntim mutaa le tii bi, muma le nan ye Kedes aatiŋ ki bi Galilee ni na, ni kaamopɔɔk, ki nan ye mbɔbɔryaan aatiŋ kibaa la, ni Hamof Dor, ni Kartann aatim, ni mu aamopɔr.

³³ Gesonn aataŋaal pu aamaal aabɔŋ mɔmɔk aah nan kan ntim pu na, nan kpaan kipiik ni mutaa la, ni mu aamopɔr mɔmɔk.

³⁴ Liifai aanibol aamaal i nan gur, ki nan ye Merari aataŋaal yaab na, bi nan nyan ntim munaa le Sebulunn aanibol aapepel wɔb tii bi, muma le nan ye Jokneam, ni Karta,

³⁵ ni Dimna, ni Nahalal, ni mu aamopɔr.

³⁶ Rubenn aanibol aapepel wɔb, bi nan nyan ntim munaa le tii bi, muma le nan ye Beser, ni Jahas,

³⁷ ni Kedemof, ni Mefaaf aatim, ni mu aamopɔr.

³⁸ Gad aanibol aapepel wɔb, bi nan nyan ntim munaa le tii bi, muma le nan ye Ramof aatiŋ ki nan bi Gilead ni na, ni kaamopɔɔk, ki nan ye mbɔbɔryaan aatiŋ kibaa la, ni Mahanaim,

³⁹ ni Hesbonn, ni Jaser aatim, ni mu aamopɔr.

⁴⁰ Merari aataŋaal yaab mu aah nan kan ntim pu na, nan kpaan kipiik ni mulee la, ni mu aamopɔr mɔmɔk.

^41-42 Israel yaab aatiŋ aah nan bi ki ti ker pu na, bi nan di ntim imonko ilee ni muniin, ki kpee mu aamopɔr mɔmɔk le tii Liifai yaab.

Israel yaab aah nan gaa kitiŋ ngbaan pu na

⁴³ Uwumbɔr nan di kitiŋ ki u nan puu tii Israel yaab aayaajatiib ke u ga di ki tii bi na tii bi. N‑yoonn mu bi nan gaa kitiŋ ngbaan doo na, le bi nan kal nima chee.

⁴⁴ Uwumbɔr nan tii bi nsuudoon, kitiŋ ngbaan mɔmɔk ni, ke waah nan puu tii biyaajatiib pu na. Le baadim ponn ni ubaa kina aa ŋmaa ŋa bi nibaa, ba pu? Uwumbɔr le nan tii bi linyaŋ baadim mɔmɔk pu.

⁴⁵ Uwumbɔr nan cha tipuur timɔk u nan puu tii Israel yaab na mɔmɔk gbiin.