Josua 20 - Uwumbɔr aagbaŋ

Mbɔbɔryaan aatim

¹ Nee aapuwɔb le Uwumbɔr nan len Josua chee,

² ke u bui Israel aanib ngbaan ke, “Maah nan bui Moses pu na, nyan mbɔbɔryaan aatim man.

³ Unii yaa kaa nyi ki peln ku uken, aan utekpiir ngbaan aanii yaa ban u ku udaan kan,

⁴ u san buen mbɔbɔryaan aatiŋ ngbaan kibaa ponn ni, ki buen kitiŋ ngbaan aabisamɔb, nin chee bi ji binib tibɔr na, ki ti kpiir len kitiŋ ngbaan aaninkpiib chee tiwan ni u ŋa na. Le bi ga cha u li koo kitiŋ ngbaan ni, ki tii u nibaa chee u li koo aan ki li bi nima.

⁵ Nima kan, unii u ban u ke u ku u teen lipɔln na yaa dii u aan u san fuu kitiŋ ngbaan ni kan, kitiŋ ngbaan ni aanib taa kii ki di unii u san na tii unii u ban u teen lipɔln na. Ni ye ke binib ngbaan li kii u, ba pu? waa nyi le ki ku udaan ngbaan.

⁶ Bi cha u li koo kitiŋ ngbaan ni aan bi ji waabɔr, bi yaa ŋa kina doo kan, u li bi nima ki ti saa n‑yoonn mu Utotoorninkpel ga kpo na. Nee aapuwɔb, unikur ngbaan ga ŋmaa gir buen udo aatiŋ ni, nin chee u nan san nyan ni na.”

⁷ Nima pu na, Jɔɔdann Aamɔɔl aawilir wɔb na, bi nan nyan Kedes aatiŋ ki bi Galilee aatiŋ ni na la, ki nan bi ŋigongon aatiŋ ni, ki ye Naftali aanibol aatiŋ na, le ki ki nyan Sekem aatiŋ ki nan bi ŋigongon aatiŋ ni, ki ye Efraim aanibol aatiŋ na, le ki ki nyan Hebronn aatiŋ ki nan bi ŋigongon aatiŋ ni, ki ye Juda aanibol aatiŋ na,

⁸ le Jɔɔdann Aamɔɔl aawipuul wɔb, nteersakpiin mu bi lijool li aapaacham bi taar na, Jeriko aawipuul wɔb na, bi nan nyan Beser aatiŋ ki bi Rubenn aanibol aatiŋ ni na, le ki ki nyan Ramof aatiŋ ki bi Gilead ni, ki bi Gad aanibol aapepel ni na, le ki ki nyan Golann aatiŋ ki bi Basann ni, ki bi Manase aanibol aapepel ni na.

⁹ Ntim mu bi nan nyan, mu ye mbɔbɔryaan aatim ki tii Israel yaab mɔmɔk, ni biwɔwɔm bi nan koo bi chee na le bi na. Le unii umɔk aa nan nyi ki ku uken na kan, u ga ŋmaa san ti koo nima chee, ki ŋmar unii u ban u ku u teen lipɔln na chee; baan ŋmaa ku u see bi jin waabɔr waahr ki kan ke waabɔr bii a.