Josua 2 - Uwumbɔr aagbaŋ

Josua aah nan tun bipepekr Jeriko aatiŋ ni pu na

¹ Baah nan bi Sitim aatiŋ ni na, le Josua tun bipepekr bilee, ke bi buen Kanaann aatiŋ ni, ki loon lik ke Jeriko aatisakpeŋ aanib bi kinye. N‑yoonn mu bi ti fuu kitisakpeŋ ngbaan ni na, le bi buen pateer u bi nan yin u ke Rahab na do.

² Le Jeriko aabɔr ŋun ke Israel yaab bibaa koo ni waatiŋ ponn ni kinyeek ngbaan ke bi pekr ki,

³ nima pu na, u nan tun Rahab chee ke, “Binib bi bi aado na dan ke bi nan pekr kitiŋ ngbaan mɔmɔk la. Nyan ni bi.”

^4-6 Le u giin bui ke, “Mbamɔn, binib bibaa dan ndo. Maa nyi baah nyan ni nin chee na. Nwiin aah cha mu ti lir, baa kee laŋ kitiŋ ngbaan aabisamɔb aajaaleŋ na, le bi nyan ndo. Maa baa bi baah cha nin chee na; ni yaa paan bi pu mala mala kan, ni ga pii bi.” Rahab nan di bipepekr bilee ngbaan di bɔr udo paacham, tichɔnn tibaa ni.

⁷ Le ubɔr aanib ngbaan siir buen, le bi laŋ kitiŋ ngbaan aabisamɔb aajaaleŋ. Binib ngbaan nan bi ban Israel yaab aapepekr na ki ti saa nsan aah puur Jɔɔdann aamɔɔl nin chee na.

⁸ Waahr aan bipepekr ngbaan nin doon kinyeek ngbaan na, Rahab nan buen bi chee paacham nima,

⁹ le ki ti bui bi ke, “M bee ke Uwumbɔr le di kitiŋ kee tii nimi. Unii umɔk bi kitiŋ kee ni na aapobil yuk ni pu la.

¹⁰ Ti ŋun Uwumbɔr aah cha Limɔɔkal Aanyusakpem foor aan ni puur, buyoonn ni nan nyan ni Ijipt aatiŋ ni na, ki ki ŋun ke ni ku Amor yaab aabɔrb bilee, Sihonn ni Og, Jɔɔdann aawipuul wɔb.

¹¹ Taah ŋun kina na, le ijawaan chuu timi, ti mɔmɔk aataakpab yɔl ni pu a. Nidindaan Uwumbɔr le ye paacham ni kitiŋ mɔmɔk Aawumbɔr.

¹² Nima pu na, puu man Waayimbil pu ke ni ga ŋa maamaal tiŋann ke maah ŋa nimi pu na. Tii mi limɔkl man, ke ni ga sil ŋa kina.

¹³ Puu tipuur ke ni ga gaa nte, ni nna, ni nninjatiib, ni nnaatiib, ni baamaal mɔmɔk lii. Ni taa cha bi ku timi.”

¹⁴ Le bijab ngbaan bui u ke, “Aa yaa gaa timi lii kan, ti mu ga gaa nimi lii. Aa yaa kaa tuk unii ubaa taah chuun pu na kan, ti puu ke Uwumbɔr yaa di kitiŋ kee tii timi kan, ti ga ŋa nimi tiŋann.”

¹⁵ Rahab aadichal nan bi kitiŋ ngbaan aagoln le pu, nima pu na, u nan cha bijab ngbaan di iŋmin le dii takolu nyan.

¹⁶ U nan bui bi ke, “Li cha ŋigongon ŋee ni man. Ni yaa kaa ŋa kina kan, ubɔr aanib ngbaan ga kan nimi. Ni bɔr nima ki ti saa iwiin itaa, aan nima kan, ubɔr aanib ngbaan ga gir ni. Nee aapuwɔb, ni ga ŋmaa nya ki buen.”

¹⁷ Le bijab ngbaan bui u ke, “Taah puu tipuur ti na, ti ga joo ti.

¹⁸ Tɔ, aa mu aah ga ŋa pu na sɔ: n‑yoonn mu ti ban ti jenn gaa nimi aatiŋ ngbaan na kan, aa di tikokomann aaŋmin mue ki di gbin takolu u ti dii nyan na, ki yin ni aate, ni aana, ni aakpetiib, ni aate aamaal mɔmɔk, bi dan aado.

¹⁹ Ubaa yaa nyan lipaal ki kpo kan, ni ye waataani la, naa ye timi le cha u kpo. Binib bi bi aado na ma, bi ponn ni ubaa yaa kpo kan, ni ye timi le aataani.

²⁰ Tɔ, aa yaa tuk binib taah chuun pu na kan, taah puu tipuur ti tii si na, naan ŋa saah ban pu na.”

²¹ U nan kii baah len pu na, le ki cha bi buen. N‑yoonn mu bi nyan buen na, le u di tikokomann na gbin takolu ngbaan.

²² Le bipepekr ngbaan buen ŋigongon na ni, le ki ti bɔr nima. Ubɔr aajab na nan chuun mann gonni kitiŋ ngbaan aatingbaan iwiin itaa, kaa kan bi, le ki gir kun ni.

²³ Le bipepekr bilee ngbaan nyan ni ŋigongon ngbaan ni, ki puur limɔɔl, le ki buen Josua chee. Bi nan tuk u tiwan ni mɔmɔk ŋa na,

²⁴ le ki bui ke, “Ni sil ye mbamɔn, Uwumbɔr le di kitiŋ ngbaan tii timi. Binib bimɔk bi nima na aapobil fii a.”