Josua 19 - Uwumbɔr aagbaŋ

Baah nan yakr kitiŋ tii Simeonn aanibol pu na

¹ Simeonn aanibol le nan paan lelee le bi yakr kitiŋ tii bi. Kitiŋ ngbaan mɔk nan di kina ki ti ker Juda aanibol aatiŋ mɔk la.

² Ntim ngbaan le nan ye Beerseba, ni Seba, ni Molada,

³ ni Hasar Sual, ni Bala, ni Esem,

⁴ ni Eltolad, ni Betul, ni Homa,

⁵ ni Siklag, ni Bef Makabof, ni Hasar Susa,

⁶ ni Bef Lebaof, ni Saruhenn aatim: ntim ngbaan mɔmɔk nan ti saa ntim kipiik ni mutaa la, le ki kpee itingbaan i bi gbɔk mu na.

⁷ Ntim munaa mumina mu nan ki bi: Ayinn, ni Rimonn, ni Eter, ni Asann, le ki kpee itingbaan i bi gbɔk mu na.

⁸ Itingbaan i nan kpee ki bi gbɔk mu na le nan yoor kina ki ti kpaan Baalaf Beer; bi ki yin ki ke Rama, ki bi ŋŋangii wɔb na. Kitiŋ ki Simeonn aanibol nan gaa ki ye baatiŋ na le na.

⁹ Juda aanibol aatiŋ aah wiir jer baah nan ban pu na, le bi nan gii baatiŋ ngbaan aapepel libaa tii Simeonn yaab.

Baah nan yakr kitiŋ tii Sebulunn aanibol pu na

¹⁰ Sebulunn aanibol le nan paan taataa le bi yakr kitiŋ tii bi. Baatiŋ nan yoor kina ti ker Sarid aatiŋ mɔk,

¹¹ ki di nima chee ki buen liwilir wɔb kina ki ti saa Mareal aatiŋ, ki di kina ti ker Dabesef aatiŋ, ni mbun mu bi Jokneam aawipuul wɔb na.

¹² Sarid aapepel liken na, ki yoor kina ki di buen liwipuul ki ti ker Kislof Tabor aatiŋ aanaanmɔk, le ki yoor nima ti ker Daberaf, ki ti saa Jafia,

¹³ le ki nyan nima ki di toŋ liwipuul wɔb ki ti ker Gaf Hefer ni Ef Kasinn aatim ni, ki fenn kpaa Nea aapepel, ki di kina ti saa Rimonn aatiŋ ni.

¹⁴ Kitiŋ ngbaan aaŋangan aapepel aanaanmɔk nan fenn kpaa Hanatonn aatiŋ wɔb, le ki di ti doo Iftael Aafataŋ ni.

¹⁵ Kitiŋ ngbaan aatim le nan ki ye Kataf, ni Nahalal, ni Simronn, ni Idala, ni Betlehem aatim: ntim ngbaan mɔmɔk nan ti saa ntim kipiik ni mulee la, le ki kpee itingbaan i bi gbɔk mu na.

¹⁶ Ntim, ni itingbaan ngbaan le nan bi kitiŋ ki bi nan yakr tii Sebulunn aanibol ke ki li ye baatiŋ na ponn ni.

Baah nan yakr kitiŋ tii Isakar aanibol pu na

¹⁷ Isakar aanibol le nan paan nnaa le bi yakr kitiŋ tii bi.

¹⁸ Baapepel aatim le nan ye Jesreel, ni Kesulof, ni Sunem,

¹⁹ ni Hafarayim, ni Sionn, ni Anaharaf,

²⁰ ni Rabif, ni Kisionn, ni Ebes,

²¹ ni Remef, ni Enn Ganim, ni Enn Hada, ni Bef Pases aatim.

²² Baatiŋ aanaanmɔk nan ki di ti pii Tabor, ni Sahasuma, ni Bef Semes, le ki di ti doo Jɔɔdann Aamɔɔl mɔk. Mu nan kpaan ntim kipiik ni muloob la, le ki kpee itingbaan i bi gbɔk mu na.

²³ Ntim, ni itingbaan ngbaan nan bi kitiŋ ki bi nan yakr tii Isakar aanibol ke ki li ye baatiŋ na ponn ni.

Baah nan yakr kitiŋ tii Aser aanibol pu na

²⁴ Aser aanibol le nan paan ŋŋmu, le bi nan yakr kitiŋ tii bi.

²⁵ Ntim mu nan bi baatiŋ ngbaan ni na le ye Helkaf, ni Hali, ni Betenn, ni Aksaf,

²⁶ ni Alam Melek, ni Amad, ni Misal. Liwilir wɔb na, ki nan di kina ti ker Kamel Aajool ni Sihor Libnaf aatiŋ mɔk.

²⁷ Kitiŋ ngbaan aawipuul mɔk nan di kina ti ker Bef Dagonn, le ki ti fuu Sebulunn aatiŋ mɔk, ki ti pii Iftael Aafataŋ ni, le ki buen ŋŋangan wɔb ki di ti keln Bef Emek ni Neyel aatim aasan, le ki yoor kina ŋŋangan wɔb le ki ti ker Kabul,

²⁸ ni Ebronn, ni Rehob, ni Hamonn, ni Kana aatim ni, le ki di ti pii kitikpaan Saidonn ni.

²⁹ Le kaanaanmɔk ki yoor ki fenn ki ti nyan Rama aatiŋ ni, ki di kina ti ker Taya aatiŋ ki bi maa ligoln mann gonn ki na, le ki fenn ti nyan Hosa aatiŋ ni, le ki ti doo Kaasisik ni Aanyusakpem mɔk. Kitiŋ ngbaan aatim le nan ki ye Mahalab, ni Aksib,

³⁰ ni Uma, ni Afek, ni Rehob aatim: ntim ngbaan mɔmɔk nan ti saa ntim moninko ni mulee la, le ki kpee itingbaan i bi gbɔk mu na.

³¹ Ntim, ni itingbaan ngbaan le nan bi kitiŋ ki bi nan yakr tii Aser aanibol ke ki li ye baatiŋ na ponn ni.

Baah nan yakr kitiŋ tii Naftali aanibol pu na

³² Naftali aanibol le nan paan nloob le bi yakr kitiŋ tii bi.

³³ Baatiŋ aanaan nan di kina ti nyan Helef aatiŋ ni, ki di ti pii busub sakpiin bu bi Saananim aapepel ni na, ki di kina ti ker Adami Nekeb aatiŋ ni, ki yoor ti nyan Jamnia aatiŋ ni, le ki jer ti nyan Lakum aatiŋ ni, ki ti doo Jɔɔdann Aamɔɔl chee.

³⁴ Nima chee le ki fenn ki di kina ki toŋ liwilir wɔb ki ti fuu Asnof Tabor aatiŋ ni, ki nyan nima ti ker Hukok aatiŋ ni, le ki ti pii Sebulunn aatiŋ mɔk ŋŋangii wɔb. Aser aatiŋ nan bi kitiŋ ngbaan aawilir wɔb, le Jɔɔdann Aamɔɔl bi kitiŋ ngbaan aawipuul wɔb.

³⁵ Ntim mu bi nan maa ŋigon kiir mu na le nan ye Sidim, ni Ser, ni Hamaf, ni Rakaf, ni Kineref,

³⁶ ni Adama, ni Rama, ni Hasor,

³⁷ ni Kedes, ni Edrei, ni Enhasor,

³⁸ ni Yironn, ni Migdalel, ni Horem, ni Bef Anaf, ni Bef Semes aatim: ntim ngbaan mɔmɔk nan ti saa ntim kipiik ni muwae la, le ki kpee itingbaan i bi gbɔk mu na.

³⁹ Ntim, ni itingbaan ngbaan le nan bi kitiŋ ki bi nan yakr tii Naftali aanibol ke ki li ye baatiŋ na ponn ni.

Baah nan yakr kitiŋ tii Dann aanibol pu na

⁴⁰ Dann aanibol le nan paan nlole le bi nan yakr kitiŋ tii bi.

⁴¹ Ntim mu nan bi baatiŋ ponn ni na le nan ye Sora, ni Estaol, ni Ir Semes,

⁴² ni Saalbim, ni Aijalonn, ni Itla,

⁴³ ni Elonn, ni Timna, ni Ekronn,

⁴⁴ ni Elteke, ni Gibetonn, ni Baalaf,

⁴⁵ ni Jehud, ni Bene Berak, ni Gaf Rimonn,

⁴⁶ ni Me Jakonn, ni Rakonn, ki kpee kitiŋ ki mann gonn Jopa aatiŋ na.

⁴⁷ N‑yoonn mu Dann aanibol nan kɔŋ baatiŋ na, le bi nan buen ti lir Lais yaab aatiŋ pu, ki ton bi butɔb, le ki nyaŋ bi, ki ku bi mɔmɔk, ki gaa kitiŋ ngbaan di ŋa baatiŋ. Bi nan kal nima, ki kpeln kitiŋ ngbaan aayimbil, ki di biyaaja Dann aayimbil yin ki.

⁴⁸ Ntim, ni itingbaan ngbaan le nan bi kitiŋ ki bi nan yakr tii Dann aanibol ke ki li ye baatiŋ na ponn ni.

Baah nan yakr kitiŋ ngbaan kookoo pu na

⁴⁹ N‑yoonn mu Israel yaab nan yakr kitiŋ ngbaan mɔmɔk doo na, le bi nan yakr nibaa chee tii Nunn aajapɔɔn u bi nan yin u ke Josua na, aan kitiŋ ngbaan li ye waatiŋ.

⁵⁰ Bi nan di kitiŋ ki u nyan ke u gee ki na le di tii u. Kina le Uwumbɔr nan bui bi. Bi nan yin kitiŋ ngbaan ke Timnaf Sera, ki nan bi ŋigongon ponn ni la, ki bi Efraim yaab aatiŋ ni. U nan ki gir maa kitiŋ ngbaan le ki kal nima chee.

⁵¹ Utotoor Eleasar, ni Nunn aajapɔɔn Josua, ki kpee Israel yaab aanibol aaninkpiib le nan yakr ntim ngbaan tii bi mɔmɔk; bi nan too inaan ki mee Uwumbɔr, Silo aatiŋ ni, Uwumbɔr aah bi Libool li ni na aabisamɔb chee. Kina le bi nan ŋa, le ki yakr kitiŋ ngbaan doo.