Josua 18 - Uwumbɔr aagbaŋ

Baah nan yakr kitiŋ ki gur na pu na

¹ Baah nan nyaŋ ki gaa kitiŋ ngbaan mɔmɔk doo na, le Israel yaab mɔmɔk kuun buen Silo aatiŋ ni, ki ti ŋa Uwumbɔr Aabool nima chee.

² Israel aanibol ŋilole le nan gur kaa kee kan baatim.

³ Nima pu na, Josua nan bui Israel aanib ngbaan ke, “N‑yoonn mulamu aan ni ka kii ke ni buen ti yakr kitiŋ ki Uwumbɔr, u ye niyaajatiib Aawumbɔr na, di tii nimi na?

⁴ Ni nyan bijab bitataa ŋinibol ngbaan mɔmɔk ni, le m ga tun bi aan bi chuun ki dii kitiŋ ngbaan ni, ki yakr ki tii bi mɔmɔk, baah ban pu na. Le bi ga gir ni m chee ki nan tuk mi baah yakr ki pu na.

⁵ Bi yakr kitiŋ ngbaan ŋeer ŋiker ŋilole aapepel, Juda aanibol ga li bi kitiŋ ngbaan aaŋangii wɔb la, le Josef aanibol ga li bi ŋŋangan wɔb.

⁶ Ni ŋmee naah ban ni yakr kitiŋ pu na ŋiker ŋilole ŋa kigbaŋ ni, aan ki li joo ni m chee. Le m ga too inaan ki baa Tidindaan Uwumbɔr aan u mɔk mi linibol mɔmɔk ni laapepel.

⁷ Mbamɔn, Liifai yaab ma kan, maan yakr kitiŋ kibaa tii bi ke nimi bi gur na aah ga kan pu na, ba pu? biyaan le ye ke bi ye Uwumbɔr aatotoorb. Gad, ni Rubenn, ni Manase aanibol ligeln bi bi Jɔɔdann Aamɔɔl aawipuul na mu kan kitiŋ ki bi liwipuul wɔb ngbaan na. Uwumbɔr aatutunn Moses le nan di ki tii bi.”

⁸ Bijab ngbaan nan buen bi ti yakr kitiŋ ngbaan, Josua aah mɔk bi pu na. U nan bui bi ke, “Ni buen kitiŋ ngbaan mɔmɔk ni, ki geei ki ŋiker ŋiker aan ki gir ni m chee man. Silo aatiŋ kee ponn ni, le m ga too inaan ki baa Uwumbɔr u mɔk mi maah ga yakr kitiŋ ngbaan pu na.”

⁹ Nima pu na, bijab ngbaan nan buen kitiŋ ngbaan ni le ki ti ŋa ni mɔmɔk, ki ŋmee baah yakr ki ŋipepel ŋilole pu na, le ki ŋmee ntim ngbaan aayimbil ŋa ŋipepel mɔmɔk ni, le ki gir buen Josua chee, Silo aatiŋ ni.

¹⁰ Le Josua too inaan ki baa Uwumbɔr, le u mɔk Josua waah ga di nin chee tii ŋinibol ngbaan mɔmɔk na.

Baah nan yakr nin chee tii Benjaminn aanibol na

¹¹ Bi nan pue yakr njan aatiŋ tii Benjaminn aamaal la. Baatiŋ nan dɔ Juda ni Josef aamaal aatim aakaasisik ni la.

¹² Ŋŋangan wɔb, baatiŋ aanaanmɔk le nan yoor ni Jɔɔdann Aamɔɔl mɔk, ki di kina ti ker Jeriko aatiŋ aaŋangan wɔb, le ki nyan nima ki di buen liwilir wɔb, ki di dii ŋigongon aatiŋ ponn ni ki ti kar Bef Afenn aateersakpiin pu.

¹³ Le kimɔk ki yoor kina ki di sunn buen Lus, bee Betel, aaŋangii wɔb, le ki di ti nyan Atarof Adar aatiŋ ni, ki di dii lijool libaa paab, li bi Bef Horonn Aataab aaŋangii wɔb.

¹⁴ Kaanaanmɔk nan di kpaa niyayan, le ki fenn nyan ni lijool ngbaan aawilir wɔb ki di dii ŋŋangii wɔb, ki buen Kiriaf Baal, bee Kiriaf Jearim, ki nan ye Juda yaab aatiŋ la. Lipepel ngbaan le nan ye kitiŋ ngbaan aawilir wɔb.

¹⁵ Le ŋŋangii wɔb aapepel mɔk nan piin Kiriaf Jearim aamɔgben mɔk, le ki di buen Neftoa aanyunbun chee,

¹⁶ le ki ki di kina buen lijool li bi Hinom Aafataŋ chee, Refaim Aafataŋ aaŋangan wɔb na, le ki ki bɔ dii Hinom Aafataŋ aaŋangii wɔb, Jebus yaab aadunduŋ aaŋangii wɔb, le ki buen Enn Rogel aatiŋ chee,

¹⁷ le ki fenn nima chee ki buen ŋŋangan wɔb ki ti fuu Enn Semes, le ki buen Gelilof aatiŋ ki tok Adumim Aasan na, le ki ki yoor nima ki buen Rubenn aajapɔɔn Bohann Aatakpal na chee,

¹⁸ le ki jer buen kidunduŋ ki bi Jɔɔdann Aafataŋ chee na aaŋangan wɔb, le ki di kina buen kifataŋ ni,

¹⁹ ki jer buen Bef Hogla aadunduŋ aaŋangan wɔb, le ki ti doo N‑yaan Aanyusakpem nin chee Jɔɔdann Aamɔɔl puu ti lir na. Lipepel ngbaan le nan ye ŋŋangii wɔb aanaanmɔk.

²⁰ Jɔɔdann Aamɔɔl mu le nan ye liwipuul wɔb aanaanmɔk. Ŋipepel ngbaan le nan ye Benjaminn aamaal aatiŋ ki bi nan yakr tii bi na aanaanmɔk.

²¹ Ntim mu nan ye Benjaminn aamaal aatim na le paa na: Jeriko, ni Bef Hogla, ni Emek Kesis,

²² ni Bef Araba, ni Semarayim, ni Betel,

²³ ni Afim, ni Para, ni Ofra,

²⁴ ni Kefar Amoni, ni Ofni, ni Geba aatim: ntim ngbaan mɔmɔk nan kpaan saa kipiik ni mulee, ki kpee itingbaan i bi gbɔk mu na.

²⁵ Ntim mu nan ki kpee na le ye Gibeonn, ni Rama, ni Beerof,

²⁶ ni Mispa, ni Kefira, ni Mosa,

²⁷ ni Rekem, ni Irpeel, ni Tarala,

²⁸ ni Sela, ni Ha Elef, ni Jebus, bee Jerusalem, ni Gibea, ni Kiriaf Jearim aatim: ntim ngbaan mɔmɔk nan ti saa ntim kipiik ni munaa la, le ki kpee itingbaan i bi gbɔk mu na. Ntim mu Benjaminn aamaal nan gaa aan mu ye baatiŋ na le na.