Josua 17 - Uwumbɔr aagbaŋ

Manase aanibol ligeln li nan bi liwilir wɔb na aatiŋ

¹ Bi nan di kitiŋ ngbaan aapepel li bi Jɔɔdann Aamɔɔl aawilir wɔb na tii Josef aajapɔpol u bi nan yin u ke Manase na aanibol ligeln libaa aamaal. Gilead aate u bi nan yin u ke Makir na, uma le nan ye Manase aajapɔpol, u nan ye uja u ŋmaa to likumbool na la, nima pu na, Gilead aatiŋ, ni Basann aatiŋ ki nan bi Jɔɔdann Aamɔɔdapuul liwipuul wɔb na le bi nan di tii u,

² le ki di kitiŋ ki bi Jɔɔdann Aamɔɔl aawilir wɔb na tii Manase aanibol aamaal ligeln li gur na. Baayimbil le paa na: Abieser, ni Helek, ni Asriel, ni Sekem, ni Hefer, ni Semida. Bi mɔmɔk nan ye Josef aajapɔɔn Manase aajapɔtiib la. Bi nan ye bidichajoob la.

³ Selofehad nan ye Hefer aajapɔɔn la, le Hefer mu nan ye Gilead aajapɔɔn, le Gilead mu nan ye Makir aajapɔɔn, le Makir mu nan ye Manase aajapɔɔn, le Selofehad ma aa nan kpa ubijabo, u nan ma mpiibim ŋmeen la. Ubisatiib ngbaan aayimbil le paa na: Mala, ni Nowa, ni Hogla, ni Milka, ni Tirsa.

⁴ Bi nan buen utotoor Eleasar, ni Nunn aajapɔɔn Josua, ni Israel yaab aaninkpiib biken chee, le ki ti bui bi ke, “Uwumbɔr nan bui Moses ke u tii timi kitiŋ, ke baah tii timi aamaal bi ye bijab na pu na, ki li ye timi aatiŋ.” Kina pu na, Uwumbɔr aah len pu na, bi nan tii Selofehad aabisatiib ngbaan mɔmɔk mu kitiŋ, ke baah tii baamaal aajab mɔmɔk kitiŋ pu na.

⁵ Nima pu le Manase aanibol ma nan kan kitiŋ ngbaan nfum kipiik pu, ki kpee Gilead ni Basann aatim mu bi Jɔɔdann Aamɔɔl aawipuul wɔb na pu,

⁶ ba pu? bi nan yakr kitiŋ ngbaan tii baamaal bi ye mbijabim, ni mpiibim na mu la. Bi nan di Gilead aatiŋ le tii Manase aanibol aamaal bi gur na.

⁷ Manase aatiŋ mɔk nan yoor Aser aatiŋ ni, ki ti ker Mikmetaf ki bi Sekem aawipuul wɔb na. Le kimɔk nan ki yoor ŋŋangii wɔb ki kpee binib bi bi Enn Tapua na aatim mu.

⁸ Kitiŋ ki mann gonn Tapua aatiŋ na nan ye Manase aanibol aamaal aatiŋ la, le Tapua aatiŋ kibaa nan ye Efraim aamaal aatiŋ.

⁹ Kaanaanmɔk nan yoor kina ki ti ker Kana aanyunbun chee. Ntim mu nan bi nnyunbun ngbaan aaŋangii wɔb na nan ye Efraim aatim; mbamɔn, ntim ngbaan mu nan bi Manase aatingbaln ponn ni la. Manase aatiŋ mɔk nan yoor kina ki dii nnyunbun ngbaan aaŋangan wɔb, le ki nan doo Kaasisik ni Aanyusakpem mɔk.

¹⁰ Efraim aamaal le nan yeh ŋŋangii wɔb, le Manase aamaal mu nan yeh ŋŋangan wɔb, le Kaasisik ni Aanyusakpem bi kitiŋ ngbaan aawilir wɔb. Aser aatiŋ nan bi kitiŋ ngbaan ŋŋangan ni liwilir aakaasisik ni, le Isakar aatiŋ nan bi kitiŋ ngbaan ŋŋangan ni liwipuul aakaasisik ni.

¹¹ Isakar ni Aser aakaasisik ni na, Manase le nan yeh Bef Sann, ni Ibleam aatim mu bi nima chee na, ki kpee ntim mu mann gonn nima na, ni Dor aatiŋ ki bi gbɔk nnyusakpem aagbaan na, ni Endor, ni Taanak, ni Megido aatim, ni ntim mu mann gonn mu na.

¹² Ibamɔn, Manase aanib ngbaan aa nan ŋmaa jenn nyan Kanaann yaab bi nan bi ntim ngbaan ni na, kina pu na, Kanaann yaab ngbaan laa beenin koo nima chee.

¹³ Hali n‑yoonn mu Israel yaab nan moo pɔɔk na, baa nan jenn nyan Kanaann yaab mɔmɔk doo. Israel yaab nan tee muk bi le bi tun lituln tii bi.

Efraim aamaal ni Manase aamaal ligeln nan mee kitiŋ ki kpee

¹⁴ Josef aamaal nan bui Josua ke, “Ba ŋa aa di kitiŋ ngbaan lipepel libaa baanja di tii timi? Uwumbɔr ŋa tinyoor ŋa ti pu, le ti pɔr pam.”

¹⁵ Le Josua giin bui bi ke, “Ni yaa pɔr ki wiir sakpen le Efraim aagongon aatiŋ aa ŋeer nimi kan, ni li cha kipɔɔk ni, ki ti toor mpaan Peris yaab, ni Refa yaab aatim ni, ki tii nibaa.”

¹⁶ Le bi giin bui u ke, “Ŋigongon aatiŋ ngbaan aa wiir ki ga fuu timi, le Kanaann yaab bi bi kifataŋ ni na: bi bi Bef Sann aatiŋ ni na, ni bi bi ki mann gonn ki na, ni bi bi Jesreel aafataŋ ni na kpa tikur aatɔroku mam la.”

¹⁷ Le Josua bui binib bi ye Efraim aamaal, ni Manase aamaal bi bi liwilir wɔb na ke, “Mbamɔn, ni wiir pam le ki mu kpa mpɔɔn sakpen. Ni ŋan ke ti kpee nimi kitiŋ.

¹⁸ Ŋigongon aatiŋ ngbaan ga li ye nimi yaan. Mbamɔn, ki ye kichook la, ni ga ŋmaa gaa ki, ki maa nima, ki di ki mɔmɔk ŋa nimi aatiŋ. Kanaann yaab ma kan, baah kpa tikur aatɔroku mam ki pɔɔ sakpen pu na, ni ga ŋmaa jenn nyan bi.”