Josua 16 - Uwumbɔr aagbaŋ

Baah nan yakr kitiŋ ki tii Efraim, ni Manase aanibol ligeln pu na

¹ Kitiŋ ngbaan aaŋangii wɔb aanaanmɔk ki bi nan yakr tii Josef aamaal na, nan piin Jɔɔdann Aamɔɔl chee ki bi Jeriko aatiŋ chee, Jeriko aanyunbun aawipuul wɔb, ki dii kina ti nyan nteersakpiin aatiŋ pu, ki yoor ni Jeriko mɔk ki buen ŋigongon aatiŋ ni, ki dii kina ti nyan Betel aatiŋ ni,

² ki yoor Betel aatiŋ mɔk ki di buen Lus aatiŋ mɔk, ki ti saa Atarof Adar aatiŋ, nin chee Ak yaab bi na,

³ ki yoor kina buen liwilir wɔb, nin chee Jaflet yaab bi na, ki dii kina ti nyan Bef Horonn Aataab wɔb, le ki dii kina ti ker Geser aatiŋ ni, ki di ti doo Kaasisik ni Aanyusakpem wɔb.

⁴ Le Josef aamaal mu nan ye Efraim, ni Manase aanibol ligeln na gaa kitiŋ kee, ke ki li ye baatiŋ.

Efraim aanibol aatiŋ

⁵ Kitiŋ ki nan ye Efraim aanibol aatiŋ na le na: baatiŋ mɔk nan yoor ni Atarof Adar, liwipuul wɔb, ki ti ker Bef Horonn aapaacham wɔb,

⁶ le ki yoor nima chee ki ti ker Kaasisik ni Aanyusakpem mɔk. Mikmetaf aatiŋ nan bi kitiŋ ngbaan aaŋangan wɔb la. Liwipuul nima chee aanaanmɔk nan pɔr ki di kpaa Taanaf Silo aatiŋ wɔb, le ki jer nima ki di toŋ liwipuul wɔb, ki ti saa Janoa aatiŋ ni,

⁷ le ki nyan Janoa nima ki di ti ker Atarof, ni Naara aatim mɔk, ki di ti fuu Jeriko aatiŋ ni, le ki ti doo Jɔɔdann Aamɔɔl chee.

⁸ Kitiŋ ngbaan nan ki nyan Tapua aatiŋ chee, ki di toŋ liwilir wɔb ki ti fuu Kana aanyunbun wɔb, le ki ti doo Kaasisik ni Aanyusakpem mɔk. Kitiŋ ngbaan le bi nan di tii Efraim aanibol aamaal ke ki li ye baatiŋ,

⁹ ki nan kpee ntim ni itingbaan i mu nan bi Manase aatiŋ ngbaan ponn ni aan bi yakr tii Efraim yaab mu na.

¹⁰ Baa nan jenn nyan Kanaann yaab bi nan bi Geser aatiŋ ponn ni na, kina pu na, Kanaann yaab ngbaan kpaan bi Efraim yaab chee le ki nan saa din, bi nan tee muk bi ke bi li tun lituln ke binaagbiib na.