Josua 15 - Uwumbɔr aagbaŋ

Baah nan yakr kitiŋ ki tii Juda aanibol na

¹ Kitiŋ ki bi nan yakr tii Juda aanibol na le paa na: Kitiŋ ngbaan nan yoor kina ki ti saa ŋŋangii wɔb, ki di ti ker Sinn Aateersakpiin aaŋangii wɔb, ki di ti naa Edom aatiŋ mɔk.

² Kaanaanmɔk, ŋŋangii wɔb, nan yoor N‑yaan Aanyusakpem aaŋangii wɔb,

³ ki di nyan ŋŋangii wɔb, Akrabim Aajool aasan chee, ki di buen Sinn Aateersakpiin ni. Kitiŋ ngbaan yoor ki dii Kades Banea aatiŋ ni, ŋŋangii wɔb, ki kpak Hesronn aatiŋ kina, ki ti ker Adar aatiŋ ni, ki fenn di kpaa Kaka wɔb,

⁴ ki di buen Asmonn aatiŋ wɔb, le ki dii mbun mu bi Ijipt aatiŋ mɔk na, ki ti saa Kaasisik ni Aanyusakpem nin chee kitiŋ mɔk doo na. Juda yaab aatiŋ, ŋŋangii wɔb aanaanmɔk le na.

⁵ Liwipuul wɔb aanaanmɔk le nan ye N‑yaan Aanyusakpem, ki yoor kina ki dii nnyusakpem ngbaan aagbaan, ki ti saa nin chee Jɔɔdann Aamɔɔl puu koo mu ponn ni na. Kitiŋ ngbaan aah piin nin chee ŋŋangan wɔb na yoor Jɔɔdann Aamɔɔl aah doo nin chee na,

⁶ ki yoor kina ki ti ker Bef Hogla aatiŋ mɔk, le ki dii buen kidunduŋ ki bi Jɔɔdann aafataŋ chee na aaŋangan wɔb, le ki dii kina buen Bohann, u nan ye Rubenn aajapɔɔn na, aatakpal chee,

⁷ ki yoor ni Tibɔbir Aafataŋ mɔk, ki ti nyan Debir aatiŋ pu, le ki fenn ŋŋangan wɔb ki di kpaa Gilgal aatiŋ, ki ni Adumim Aajool Aasan lik tɔb na, ki bi kifataŋ aaŋangii wɔb na, le ki yoor kina ki buen Ensemes aanyunbun wɔb, ki nyan nima ti pii Enn Rogel,

⁸ le ki bɔ nyan Hinom Aafataŋ ki bi ligongoln li Jebus yaab aatiŋ Jerusalem bi li paab na aaŋangii wɔb, le kimɔk ki yoor kina ki di dii ligongoln li bi Hinom Aafataŋ liwilir wɔb na paab, Refaim Aafataŋ aaŋangan wɔb,

⁹ ki nyan nima chee, ki dii kina buen Neftoa Aanyunbun chee, le ki ti ker ntim mu bi Efronn Aajool chee na. Nima chee le ki fenn kpaa Baala aatiŋ ni; bi ki yin ki ke Kiriaf Jearim aatiŋ.

¹⁰ Nima chee le ki mann gonn Baala aatiŋ liwilir wɔb, ki fenn kpaa ŋigongon aatiŋ ki bi yin ki ke Edom na, le ki di dii buen Jearim, bee Kesalonn, Aajool aaŋangan wɔb, ki di sunn taab ki ti ker Bef Semes, le ki dii Timna aatiŋ ni.

¹¹ Kitiŋ ngbaan aanaanmɔk ki yoor kina, ki dii buen ligongoln li bi Ekronn aaŋangan wɔb na, ki fenn kpaa Sikeronn, ki dii Baala Aajool aataab, le ki ti ker Jamnia aatiŋ, ki nan ti doo Kaasisik ni Aanyusakpem chee la.

¹² Nima chee le nan ye kitiŋ ngbaan aawilir wɔb mɔk. Kitiŋ ngbaan aah yoor ki ti ker nimɔk na, Juda aanibol aamaal mɔmɔk nan bi kima ponn ni la.

Kaleb aah nan nyaŋ Hebronn ni Debir aatim pu na

¹³ Uwumbɔr aah nan bui Josua ke u ŋa pu na, u nan di Juda aatiŋ aapepel nibaa chee tii Jefune aajapɔɔn Kaleb, u nan ye Juda aanibol aanii ubaa na. Bi nan di Hebronn aatiŋ, ki nan ye Aba u nan ye ŋiwɔk Anak yaab aate na aatiŋ le tii u.

¹⁴ Kaleb nan jenn Anak aamaal mɔmɔk nyan kitiŋ ngbaan ponn ni, bi nan ye Sesai yaab, ni Ahimann yaab, ni Talmai yaab aanib la.

¹⁵ U nan nyan nima chee le ki buen ti lir Debir aanib pu. Njan bi nan yin kitiŋ ngbaan ke Kiriaf Sefer aatiŋ la.

¹⁶ Kaleb nan bui ke, “Uja u ga ŋmaa to butɔb ki nyaŋ Kiriaf Sefer aatiŋ na kan, m ga di mbisal Aksa tii udaan ngbaan u di u ŋa upuu.”

¹⁷ Le Kaleb aakpel u bi nan yin u ke Kenas na aajapɔɔn u bi nan yin u mu ke Otniel na, le nan nyaŋ kitiŋ ngbaan, le Kaleb di ubisal Aksa tii u, le u yoor u ki di ŋa upuu.

¹⁸ Waah kunn u bundaal na, le Otniel bui upuu Aksa ke u mee ute kitiŋ ki ŋan na. Le Aksa buen ute chee, ki sunn ubon pu, le Kaleb baa u ke u ban ba.

¹⁹ Le u giin bui u ke, “M ban kitiŋ ki kpa nnyun na la. Saah di kitiŋ ki tii mi na, ki bi nteer pu la.” Nima pu le Kaleb nan di paacham ni taab aanyunbun aatiŋ na tii u.

Ntim mu ye Juda aanibol aatim na

²⁰ Ntim mu Juda aanibol nan kan aan mu ye baatim na sɔ:

²¹ ntim mu nan bi ŋŋangii wɔb ki nan ye baatim, ki nan bi Edom aatiŋ mɔk na le nan ye Kabseel, ni Eder, ni Jagur,

²² ni Kina, ni Dimona, ni Adada,

²³ ni Kedes, ni Hasor, ni Itnann,

²⁴ ni Sif, ni Telem, ni Bealof,

²⁵ ni Hasor Hadata, ni Keriof Hesronn ki bi ki yin ki ke Hasor na,

²⁶ ni Amam, ni Sema, ni Molada,

²⁷ ni Hasar Gada, ni Hesmonn, ni Bef Pelet,

²⁸ ni Hasar Sual, ni Beerseba, ni Bisiotia,

²⁹ ni Baala, ni Iyim, ni Esem,

³⁰ ni Eltolad, ni Kesil, ni Homa,

³¹ ni Siklag, ni Madmana, ni Sansana,

³² ni Lebaof, ni Silim, ni Ayinn, ni Rimonn aatim: ntim ngbaan mɔmɔk nan ti saa moninko ni muwae la, le ki kpee itingbaan i bi gbɔk mu na.

³³ Ntim mu nan bi ŋigongon aataab na le nan ye Estaol, ni Sora, ni Asna,

³⁴ ni Sanoa, ni Enn Ganim, ni Tapua, ni Enam,

³⁵ ni Jamuf, ni Adulam, ni Soko, ni Aseka,

³⁶ ni Saarayim, ni Aditayim, ni Gedera, ni Gederotayim aatim: ntim ngbaan mɔmɔk nan ti saa kipiik ni munaa, le ki kpee itingbaan i bi gbɔk mu na.

³⁷ Ntim mu nan ki kpee na le nan ye Senann, ni Hadasa, ni Migdal Gad,

³⁸ ni Dileann, ni Mispa, ni Jokteel,

³⁹ ni Lakis, ni Boskaf, ni Eglonn,

⁴⁰ ni Kabonn, ni Lamam, ni Kitlis,

⁴¹ ni Gederof, ni Bef Dagonn, ni Naama, ni Makeda aatim: ntim ngbaan nan ti saa kipiik ni muloob la, le ki kpee itingbaan i bi gbɔk mu na.

⁴² Mu nan ki kpee na le ye Libna, ni Eter, ni Asann,

⁴³ ni Ifta, ni Asna, ni Nesib,

⁴⁴ ni Keila, ni Aksib, ni Maresa aatim: mu nan ti saa ntim muwae la, le ki kpee itingbaan i bi gbɔk mu na.

⁴⁵ Ekronn aatiŋ mu nan bi, ki kpee itingbaan ni ntim mu bi gbɔk ki na,

⁴⁶ ni ntim mɔmɔk ni itingbaan i bi gbɔk Asdod aatiŋ na, ki yoor Ekronn mɔk ki ti ker Kaasisik ni Aanyusakpem.

⁴⁷ Ntim mu nan ki bi na le nan ye Asdod ni Gasa aatim, ni itingbaan i bi gbɔk mu na, le ki yoor kina ki ti ker mbun mu ye Ijipt aatiŋ mɔk na, ni Kaasisik ni Aanyusakpem aagbaan.

⁴⁸ Ŋigongon aatiŋ, ni ntim mu nan bi nima chee na le nan ye Samir, ni Jatir, ni Soko,

⁴⁹ ni Dana, ni Kiriaf Sefer ki bi ki yin ki ke Debir na,

⁵⁰ ni Anab, ni Estemoa, ni Anim,

⁵¹ ni Gosenn, ni Holonn, ni Gilo aatim: mu nan ti saa kipiik ni kibaa la, le ki kpee itingbaan i bi gbɔk mu na.

⁵² Ntim mu nan ki bi na le nan ye Arab, ni Duma, ni Esann,

⁵³ ni Janim, ni Bef Tapua, ni Afeka,

⁵⁴ ni Humta, ni Hebronn, ni Sior aatim: mu nan ti saa ntim muwae la, le ki kpee itingbaan i bi gbɔk mu na.

⁵⁵ Ntim mu nan ki bi na le nan ye Maonn, ni Kamel, ni Sif, ni Juta,

⁵⁶ ni Jesreel, ni Jokdeam, ni Sanoa,

⁵⁷ ni Kayinn, ni Gibea, ni Timna aatim: mu nan ti saa ntim kipiik la, le ki kpee itingbaan i bi gbɔk mu na.

⁵⁸ Ntim mu nan ki bi na le nan ye Halul, ni Bef Sur, ni Gedor,

⁵⁹ ni Maaraf, ni Bef Anof, ni Eltekonn aatim: mu nan ti saa ntim muloob la, le ki kpee itingbaan i bi gbɔk mu na.

⁶⁰ Ntim mu nan ki bi na le nan ye Kiriaf Baal ki bi ki yin ki ke Kiriaf Jearim na, ni Raba aatim: mu nan ti saa ntim mulee la, le ki kpee itingbaan i bi gbɔk mu na.

⁶¹ Ntim mu nan bi nteersakpiin aatiŋ ni na le nan ye Bef Araba, ni Midinn, ni Sekaka,

⁶² ni Nibsann, ni N‑yaan Aatiŋ, ni Enn Gedi: mu nan ti saa ntim muloob la, le ki kpee itingbaan i bi gbɔk mu na.

⁶³ Juda aanib aa nan ŋmaa jenn nyan Jebus yaab bi nan bi Jerusalem aatiŋ ponn ni na. Jebus yaab laa beenin bi nima, Juda aanib chee.