Josua 14 - Uwumbɔr aagbaŋ

Baah nan yakr Jɔɔdann Aamɔɔl aawilir wɔb aatiŋ pu na

¹ Tibɔr ti paa na le ye baah nan yakr Kanaann aatiŋ, Jɔɔdann Aamɔɔl aawilir wɔb tii Israel yaab pu na. Utotoor Eleasar, ni Nunn aajapɔɔn u bi nan yin u ke Josua na, ni Israel yaab aanibol aamaal aaninkpiib le nan yakr kitiŋ tii Israel yaab aanib mɔmɔk.

² Uwumbɔr aah nan bui Moses ke u ŋa pu na, bi nan too inaan le ki yakr ntim tii Israel yaab aanibol ŋiwae ni ligeln ŋi nan bi Jɔɔdann aawilir wɔb na.

^3-4 Moses nan puen yakr kitiŋ ki bi Jɔɔdann aawipuul wɔb na le tii ŋinibol ŋilee ni ligeln na. Bi nan yakr Josef aamaal nfum mulee la, Manase ni Efraim. Moses aa nan yakr kitiŋ kibaa tii Liifai aamaal aan ki li ye baatiŋ. Bi nan tee nyan ntim le tii bi ke bi li koo mu ni, ni mmopaan nin chee baawakor ga li ji na.

⁵ Israel yaab nan yakr kitiŋ ngbaan, Uwumbɔr aah nan bui Moses pu na la.

Hebronn aatiŋ le bi nan di tii Kaleb aamaal

⁶ Nwiin mubaa daal le Juda aanibol aanib bibaa nan dan Josua chee, Gilgal aatiŋ ni. Bi ponn ni ubaa le nan ye Jefune aajapɔɔn, u bi nan yin u ke Kaleb na; u nan ye Kenis aanibol ni aanii la, le u bui Josua ke, “Aa teer Uwumbɔr aah nan len pu Kades Banea aatiŋ ni, m ni si aabɔr, ki tuk uma Uwumbɔr aanii Moses pu na.

⁷ M nan ye ŋibin imonko ilee le n‑yaayoonn ngbaan, le Uwumbɔr aatutunn Moses nan tun mi, le m nyan Kades Banea aatiŋ ni, ki pekr kitiŋ kee. M nan di tibɔbamɔnn gir ti bui u.

⁸ Le bijab bi nan dii mi buen na aah nan len pu na cha ijawaan chuu timi aanib, le m ma nan kii Ndindaan Uwumbɔr aamɔb mbamɔm.

⁹ Maah nan ŋa kina na, le Moses nan puu ke u ga di kitiŋ ki m nan chuun ki pu na tii m ni maamaal, ki li ye timi aatiŋ.

¹⁰ N‑yoonn mue na, ni saa ŋibin imonko ilee ni ŋiŋmu le na, le Uwumbɔr nan bui Moses tibɔr tee. N‑yoonn ngbaan le Israel yaab nan chuun nteersakpiin ni. Uwumbɔr aah nan len pu na, u cha m beenin kpa laafee ki bi limɔfal ni. Lik maah saa pu na. M ye ŋibin imonko inaa ni ŋiŋmu la,

¹¹ le m laa beenin kpa mpɔɔn din ke maah nan kpa pu buyoonn Moses nan tun mi na. M laa beenin kpa mpɔɔn ki ga ŋmaa buen likumbool, ki ga ŋmaa ŋa tiwan mɔmɔk.

¹² Nima pu na, di ŋigongon pu aatiŋ tii mi, Uwumbɔr aah nan puu tipuur tii mi n‑yoonn ngbaan pu na. Ti nan tuk si liyaadaal ngbaan ke ŋiwɔk aanib, bi bi nan yin bi ke Anak yaab na, nan bi ntisakpem mu aagon fɔk na ni. Uwumbɔr yaa bi m chee ki ter mi kan, m ga jenn nyan bi ke waah nan len pu na.”

¹³ Josua nan mee Uwumbɔr aanyoor ŋa Jefune aajapɔɔn Kaleb pu, le ki di Hebronn aatiŋ tii u, ke ki li ye waatiŋ.

¹⁴ Jefune aajapɔɔn Kaleb aamaal beenin yeh Hebronn aatiŋ ngbaan, bi ye Kenis aanibol ni aanib la. Kaleb aah nan kii Israel yaab Aadindaan Uwumbɔr aamɔb pu na, le u nyan kitiŋ ngbaan tii u.

¹⁵ Waahr aan nimina nin ŋa kina na, bi nan yin Hebronn aatiŋ ngbaan ke Aba aatiŋ la. Aba le nan ye ŋiwɔk Anak yaab aanikpaan. N‑yoonn ngbaan le Israel yaab aatiŋ nan kan nsuudoon.