Josua 13 - Uwumbɔr aagbaŋ

Ntim mu nan gur ke bi gaa na

¹ N‑yoonn mue na, Josua nan por pam. Le Uwumbɔr bui u ke, “Aa por pam, ntim laa beenin wiir ke ni gaa mu.

² Muma le ye Filistia yaab aatiŋ, ni Gesur yaab aatiŋ,

³ ki kpee Afim yaab aatiŋ ki bi ŋŋangii wɔb na. (Kitiŋ ki dɔ Sihor aabun chee, ki bi Ijipt yaab aatiŋ aanaanmɔk na, ki yoor ti ker ŋŋangan wɔb, Ekronn aatiŋ mɔk na ye Kanaann yaab aatiŋ la; Filistia yaab aabɔrb le nan bi Gasa, ni Asdod, ni Askelonn, ni Gaf, ni Ekronn aatim ni.)

⁴ Kanaann yaab aatim laa beenin bi ke ni gaa mu, ni Meara, ki ye Saidonn yaab aatiŋ na, ki ti ker Afek aatiŋ ki bi Amor yaab aatiŋ aanaanmɔk na,

⁵ ki kpee Gebali yaab aatiŋ, ni Lebanonn aapepel, liwipuul wɔb, ki yoor Baalgad aatiŋ ki bi Hemonn Aajool, ŋŋangii wɔb na, ki ti ker Hamaf Aajool aasan na.

⁶ Ntim ngbaan mɔmɔk nan kpaan Saidonn yaab bi bi ŋigongon aatim mu bi Lebanonn aajool ni Misrefof Mayim aatiŋ aakaasisik ni na la. Le Israel yaab aah tur koo bi ponn ni pu na, m ga jenn nyan binib ngbaan mɔmɔk. Aa yakr kitiŋ ngbaan tii Israel yaab, maah bui si ke aa ŋa pu na.

⁷ Dandana wee, yakr kitiŋ kee ki tii Israel yaab ŋinibol ŋiwae ŋi gur na, ni Manase aanibol ligeln li gur na, aan ki li ye baatiŋ.”

Baah nan yakr ntim mu bi Jɔɔdann Aamɔɔdapuul na pu na

⁸ Rubenn ni Gad aanibol, ni Manase aanibol ligeln nan kan kitiŋ ki ga li ye baatiŋ na. Uwumbɔr aatutunn Moses nan puen yakr ki tii bi, ki nan bi Jɔɔdann aamɔɔdapuul, liwipuul wɔb la.

⁹ Baatiŋ mɔk nan yoor ki ti ker Aroer aatiŋ mɔk, ki nan bi Anonn Aafataŋ aamɔgben la, ni kitiŋ ki nan bi kifataŋ ngbaan aakaasisik ni na, ki kpee Medeba aatiŋ, ki ti ker Dibonn aatiŋ mɔk na,

¹⁰ ki ki yoor kina ki ti ker Amonn yaab aatinaanmɔk, ki kpee ntim mu Amor yaab aabɔr u bi nan yin u ke Sihonn na nan joo mu na, waatiyil nan ye Hesbonn la,

¹¹ ki ki kpee Gilead aapepel, ni Gesur ni Maaka aapepel, ni Hemonn Aajool aapepel mɔmɔk, ni Basann aatim mɔmɔk, ki yoor kina ki ti ker Saleka,

¹² ki nan ki kpee Og u nan gbeln kookoo ŋiwɔk Refa yaab ni na aanaan, uma le nan joo Astarof ni Edrei aatim. Moses le nan nyaŋ ntim ngbaan le ki jenn nyan binib ngbaan mɔmɔk.

¹³ Mbamɔn, Israel yaab aa nan jenn nyan Gesur ni Maaka yaab, bi laa beenin bi Israel aatiŋ ni.

¹⁴ Moses aa nan yakr kitiŋ tii Liifai aanibol. Uwumbɔr aah nan bui Moses pu na, Liifai yaab le nan yeh tiwan nimɔk binib nan joo toor kitork ki seer mmii ni tii Israel yaab Aadindaan Uwumbɔr na aanann ngem.

Kitiŋ ki bi nan di tii Rubenn aanibol na

¹⁵ Moses nan yakr kitiŋ ngbaan aapepel nibaa chee tii imaal i ye Rubenn aanibol na, ke ki li ye baatiŋ.

¹⁶ Baatiŋ nan yoor ki ti ker Aroer mɔk, ki nan bi Anonn Aafataŋ aamɔgben la, ni kitiŋ ki bi kifataŋ ngbaan aakaasisik ni na, le ki kpee ntim mu mann gonn Medeba aatiŋ na,

¹⁷ ki ki kpee Hesbonn aatiŋ, ni ntim mu bi lijool li aapaacham bi taar na pu na, bi yin mu ke Dibonn, ni Bamof Baal, ni Bef Balmeonn,

¹⁸ ni Jahas, ni Kedemof, ni Mefaaf,

¹⁹ ni Kiriataim, ni Sibma, ni Seref Sahar aatiŋ ki bi ligongoln li bi kifataŋ ni na,

²⁰ ni Bef Peor aatiŋ, ni Pisga Aajool, ni Bef Jesimof aatiŋ,

²¹ ki kpee ntim mu bi lijool li aapaacham bi taarr na, ni Amor aabɔr Sihonn aanaan mu aatiyil nan ye Hesbonn na. Moses le nan nyaŋ u, ki kpee Midiann yaab aabɔrb bi bi nan yin bi ke Efi, ni Rekem, ni Sur, ni Hur, ni Reba na. Bibɔrb ngbaan mɔmɔk nan joo Midiann yaab tii ubɔr Sihonn la.

²² Israel yaab aah nan ku bi ponn ni bi na ubaa le nan ye Beor aajapɔɔn Balaam u nan ye ubɔɔ na.

²³ Jɔɔdann aamɔɔl mɔk le nan ye Rubenn aanibol aatiŋ aawilir wɔb aapepel aanaanmɔk. Ntim ngbaan le bi nan di tii Rubenn aanibol, mu li ye baatim.

Kitiŋ ki bi nan di tii Gad aanibol na

²⁴ Moses nan ki di kitiŋ ngbaan lipepel libaa di tii Gad aanibol, ki li ye baatiŋ.

²⁵ Baatiŋ mɔk le nan ye Jaser, ni ntim mu bi Gilead ni na, ni Amonn yaab aatiŋ ligeln ki yoor ti ker Aroer mɔk, ki nan bi Raba aatiŋ aawipuul wɔb la.

²⁶ Baatiŋ nan ki yoor ki nyan Hesbonn aatiŋ, ki ti saa Ramaf Mispa, ni Betonim; ki nyan Mahanaim aatiŋ, ki di naa Lodebar aatiŋ mɔk na,

²⁷ ki kpaan Jɔɔdann aafataŋ aatim mu bi yin mu ke Bef Haram, ni Bef Nimra, ni Sukof, ni Safonn mɔk, ni nan ye ubɔr Sihonn u nan ka Hesbonn aatiŋ na aanaan mu gur na la. Liwilir wɔb, baatiŋ aanaanmɔk le nan ye Jɔɔdann Aamɔɔl ki ti ker ŋŋangan wɔb, Galilee Aanyusakpem chee,

²⁸ ntim ngbaan le bi nan di tii Gad aanibol aamaal ke mu li ye baatiŋ.

Kitiŋ ki bi nan di tii Manase aanibol ligeln li bi liwipuul wɔb na

²⁹ Moses nan di kitiŋ ngbaan lipepel libaa wɔb tii Manase aanibol aamaal ligeln li gur na, aan ki li ye baatiŋ.

³⁰ Baatiŋ mɔk nan yoor ni Mahanaim aatiŋ, ki kpee ubɔr Og aanaan mɔmɔk mu nan ye Basann aatim mɔmɔk na, ni Jair aatingbaan imonko itaa i bi Basann ni na,

³¹ ki nan ki kpee Gilead aatiŋ ligeln, ki ti kpaan Astarof ni Edrei aatim, muma le nan ye ntikpaam ubɔr Og aanaan ni, ki bi Basann aatiŋ ni. Bi nan di kitiŋ ngbaan mɔmɔk tii Manase aajapɔɔn u bi nan yin u ke Makir na le aamaal ligeln.

³² Kina le Moses nan yakr kitiŋ ki nan bi Jeriko aawipuul wɔb, Jɔɔdann Aamɔɔdapuul na, n‑yoonn mu u nan bi Moab aateer pu na.

³³ Moses aa nan tii Liifai yaab ma aanibol kitiŋ kibaa kpala. U nan tuk bi ke baawan le ga li ye ipiin i Israel yaab joo nan tii bima Israel yaab Aadindaan Uwumbɔr na, bi ga li ji ipiin ngbaan ponn ni la.