Josua 12 - Uwumbɔr aagbaŋ

Moses aah nan nyaŋ bibɔrb bi na

¹ Israel yaab nan puen nyaŋ ki gaa kitiŋ ki bi Jɔɔdann Aamɔɔl liwipuul wɔb na, ki yoor Anonn Aafataŋ ni ki ti saa Jɔɔdann Aafataŋ, ki ti ker ŋŋangan, Hemonn Aajool wɔb. Bi nan nyaŋ bibɔrb bilee la.

² Ubaa le nan ye Amor yaab aabɔr u bi nan yin u ke Sihonn na, uma le nan jin nnaan Hesbonn aatiŋ ni. Waanaan ngbaan le nan ye Gilead aapepel ligeln, ki nyan Aroer aatiŋ ki bi Anonn Aafataŋ aamɔgben na, ni kitiŋ ki bi kifataŋ ngbaan aakaasisik ni na, ki ti ker Jabok Aamɔɔl li ye Amonn yaab aatiŋ mɔk na,

³ ki kpee Jɔɔdann Aafataŋ ni, ki yoor Galilee Aanyusakpem, ŋŋangii wɔb, ki ti ker Bef Jesimof ki bi N‑yaan Aanyusakpem aawipuul wɔb na, ki di toŋ Pisga Aajool aataab na.

⁴ Bi nan ki nyaŋ Basann aabɔr u bi nan yin u ke Og na, uma le nan ye ubɔr u gbeln kookoo, ŋiwɔk Refa yaab ni na. Uma le nan jin nnaan Astarof ni Edrei aatim ni.

⁵ Waanaan ngbaan le nan ki joo Hemonn Aajool, ni Saleka aatiŋ, ni Basann aatim mu, ki yoor kina ki ti ker Gesur ni Maaka aatim mɔk, ni Gilead aapepel ligeln, ki ti saa Hesbonn aabɔr Sihonn aapepel.

⁶ Uwumbɔr aatutunn Moses ni Israel yaab le nan nyaŋ bibɔrb bilee ngbaan. Moses nan di baatim ngbaan tii Rubenn ni Gad aanibol, ni Manase aanibol ligeln, mu li ye baatim.

Josua aah nan nyaŋ bibɔrb bi na

⁷ Josua ni Israel aanib le nan nyaŋ bibɔrb bi aatim bi Jɔɔdann Aamɔɔdapuul, liwilir wɔb, ki yoor Baalgad aatiŋ ki bi Lebanonn aafataŋ ni, ki ti ker ŋŋangii wɔb, Halak Aajool li bi gbɔk Edom aatiŋ na. Josua nan yakr kitiŋ ngbaan tii Israel aanibol, ki li ye baatiŋ ki joo cha.

⁸ Kitiŋ ngbaan le nan ye ŋigongon aatiŋ, ni ŋigongon aataab aatim mu bi liwilir wɔb na, ni Jɔɔdann aafataŋ aatiŋ, ni ntim mu bi kifataŋ ngbaan, ŋigongon aataab, ki chaan cha liwipuul wɔb na, ni nteer aatiŋ ki bi ŋŋangii wɔb na. Binib bimina le nan yeh kitiŋ ngbaan: Hef yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab.

⁹ Israel yaab aah nan nyaŋ bibɔrb bi aatim na le paa na: Jeriko, ni Ai, ki nan bi gbɔk Betel chee na,

¹⁰ ni Jerusalem, ni Hebronn,

¹¹ ni Jamuf, ni Lakis,

¹² ni Eglonn, ni Geser,

¹³ ni Debir, ni Geder,

¹⁴ ni Homa, ni Arad,

¹⁵ ni Libna, ni Adulam,

¹⁶ ni Makeda, ni Betel,

¹⁷ ni Tapua, ni Hefer,

¹⁸ ni Afek, ni Lasaronn,

¹⁹ ni Madonn, ni Hasor,

²⁰ ni Simronn Meronn, ni Aksaf,

²¹ ni Taanak, ni Megido,

²² ni Kedes, ni Jokneam, ki nan bi Kamel aatiŋ ni na,

²³ ni Dor, ki nan bi nnyusakpem aagbaan na, ni Goyim, ki bi Galilee aatiŋ ni na,

²⁴ ni Tirsa. Bi mɔmɔk nan ti saa bibɔrb piitaa ni ubaa la.