Josua 11 - Uwumbɔr aagbaŋ

Josua aah nan nyaŋ Jabinn ni umaantɔtiib pu na

¹ N‑yoonn mu Hasor yaab aabɔr u bi nan yin u ke Jabinn na ŋun Israel yaab aah kani linyaŋ pu na, le u nan di ntuun tun Madonn aatiŋ aabɔr u bi yin u ke Jobab na, ni Simronn ni Aksaf aatim aabɔrb chee,

² ni bibɔrb bi aatiŋ bi ŋigongon ni, ki bi ŋŋangan wɔb na, ni Jɔɔdann aafataŋ ki bi ŋŋangii wɔb ki gbɔk Galilee Aanyusakpem na, ni ntim mu bi ŋigongon aataab na, ni ntim mu nɔn nnyusakpem aagbaan ki gbɔk Dor aatiŋ na.

³ U nan ki tun Kanaann yaab bi ka nɔn Jɔɔdann aamɔɔl ŋipepel mɔmɔk ki ye Amor yaab, ni Hef yaab, ni Peris yaab, ni Jebus yaab na mu chee, bi mɔmɔk nan bi ŋigongon paab na, le ki kpee Hif yaab bi nan ka Hemonn Aajool aataab ki bi Mispa aatiŋ ni na chee.

⁴ Bi mɔmɔk nan kuun ni, ki joo ni baajab. Bi nan wiir ke litambol li dɔ nnyun aagbaan na aah wiir pu na la, ki nan kpa itaan ni tɔroku mam.

⁵ Bibɔrb ngbaan, ni baajab mɔmɔk le nan kpaan tɔb chee, ki buen Merom aanyun chee, ki ti ka kii Israel yaab, ke bi faa tɔb butɔb.

⁶ Le Uwumbɔr nan bui Josua ke, “Taa san bi ijawaan. Fen kina kookoo na kan, m ga fe ku bi mɔmɔk tii Israel yaab. Aa wɔi baataan, ki see baatɔroku mam mmii.”

⁷ Le Josua ni waajab mɔmɔk buen ti lir bi pu, Merom Aanyun na chee.

⁸ Uwumbɔr nan cha Israel yaab nyaŋ bi. Israel yaab nan lir bi pu, ki san dii bi ki ti nyan Misrefof Mayim, ni Saidonn aatim ni, ŋŋangan wɔb, le bi jer nima ki ti saa Mispa aafataŋ ni, liwipuul wɔb. Butɔb ngbaan nan bi kina le Israel yaab ti nin ku baadim mɔmɔk doo.

⁹ Josua nan ŋa bi Uwumbɔr aah bui u ke u ŋa bi pu na, u nan wɔi baataan, le ki see baatɔroku mam mmii.

¹⁰ Josua nan fenn upuwɔb ki buen Hasor aatiŋ ni, ki ti nyaŋ ki, le ki ku nima chee aabɔr. N‑yoonn ngbaan na Hasor aanaan le nan kpa mpɔɔn jer nnaan ngbaan mɔmɔk.

¹¹ Josua ni waajab nan ku Hasor aatiŋ ni aanib mɔmɔk, unii kina aa nan gur ki ŋmar; le bi nan see kitiŋ ngbaan mmii.

¹² Josua nan nyaŋ bibɔrb ngbaan, ni baatim mɔmɔk, ki ku binib ngbaan mɔmɔk, ke Uwumbɔr aatutunn Moses aah nan bui u ke u ŋa pu na.

¹³ Waa nan see baah nan maa ntim mu ngongobim pu na, Hasor aatiŋ baanja le Josua nan see ki mmii.

¹⁴ Israel yaab nan yoor tiwanyaan mɔmɔk, ni tiwakor, ntim ngbaan mɔmɔk ni, ki joo bibaa, le ki ku binib ma doo, unii aa nan gur ki ŋmar.

¹⁵ Uwumbɔr le nan di tibɔr ngbaan bui waatutunn Moses, le Moses mu di ti bui Josua, le Josua kii tibɔr ngbaan, ki nan ŋa tiwan ni mɔmɔk Uwumbɔr nan bui ke u ŋa na.

Ŋipepel ŋi Josua nan nyaŋ ki gaa na

¹⁶ Josua nan nyaŋ kitiŋ ngbaan mɔmɔk: u nan nyaŋ ŋigongon paab aatim, ni ŋigongon aataab aatim, ni ŋŋangan ni ŋŋangii mɔmɔk, ni Gosenn aapepel mɔmɔk, ki kpee nteersakpiin ni aatiŋ, ki kpee Jɔɔdann aafataŋ.

^17-18 Lipepel ngbaan le di ti ker ŋŋangii wɔb, Halak Aajool li bi gbɔk Edom aatiŋ na, ki di kina ti ker ŋŋangan wɔb, Baalgad aatiŋ ki bi Hemonn Aajool, ŋŋangii wɔb, Lebanonn aafataŋ ni na. Josua ni ŋipepel ngbaan aabɔrb nan ton tɔb butɔb ni yunn pam, le u nan nyaŋ bi, ki ku bi mɔmɔk.

¹⁹ Kitiŋ ki aanib nan kpaan Israel yaab chee kimɔbaan na le nan ye Gibeonn yaab, bi ye Hif aanibol aanib na. Bi mɔmɔk gur na nan bee butɔb ngbaan ni a.

²⁰ Uwumbɔr le nan cha binib ngbaan aasui fii ke bi to Israel yaab butɔb, aan u ŋmaa kuln bi mɔmɔk; linimbaasaln aa nan bi, le bi ku bi mɔmɔk. Kina le Uwumbɔr nan bui Moses ke u ŋa.

²¹ N‑yoonn mue le Josua nan buen ki ti kuln linibol li ye ŋiwɔk, aan bi yin bi ke Anak yaab, aan bi bi ŋigongon aatim mu bi yin mu ke Hebronn, ni Debir, ni Anab, ni ŋigongon aatim mumɔk bi Juda ni Israel aatim ni na. Josua nan kuln ŋiwɔk ngbaan ni ŋaatim.

²² Anak yaab ngbaan aa nan ki gur ki bi Israel aatiŋ ni, bi nan gur siib kina le ki bi Gasa, ni Gaf, ni Asdod aatim ni.

²³ Josua nan nyaŋ kitiŋ ngbaan mɔmɔk, Uwumbɔr aah nan bui Moses ke u ŋa pu na. Le Josua nan di kitiŋ ngbaan mɔmɔk tii Israel yaab, ki li ye biyaan; u nan yakr ki tii Israel yaab aanibol ngbaan. Le Israel yaab kan lifuur, kaa ki to butɔb.