Josua 10 - Uwumbɔr aagbaŋ

Josua aah nan nyaŋ Amor yaab pu na

¹ Jerusalem aabɔr u bi nan yin u ke Adoni Sedek na, nan ŋun ke Josua ni waanib kuln Ai aanib, ki bii kitiŋ ngbaan, ki ku nima chee aabɔr, ke waah nan ŋa Jeriko aatiŋ pu ki ku kitiŋ ngbaan aabɔr pu na. U nan ki ŋun ke Gibeonn yaab ni Israel yaab ŋa kimɔbaan, le bi koo bi chee.

² Jerusalem yaab aah ŋun kina na, le bipobil yuk sakpen; ba pu? Gibeonn aatiŋ wiir ke ntim mu kpa bibɔrb na aah wiir pu na la, ki wiir jer Ai aatiŋ, le kaajab ŋmaa to butɔb pam.

³ Kina pu le Adoni Sedek nan di ntuun tun Hebronn aatiŋ aabɔr u bi nan yin u ke Hoham na, ni Jamuf aatiŋ aabɔr u bi nan yin u ke Piram na, ni Lakis aatiŋ aabɔr u bi nan yin u ke Jafia na, ni Eglonn aatiŋ aabɔr u bi nan yin u ke Debir na chee, ki bui bi ke,

⁴ “Dan man ki nan ter mi aan ti ti to Gibeonn yaab butɔb, ba pu? binib ngbaan kpaan kimɔbaan Josua ni Israel yaab chee a.”

⁵ Le Amor yaab aabɔrb biŋmu, bi ye Jerusalem, ni Hebronn, ni Jamuf, ni Lakis, ni Eglonn aabɔrb na kpaan tɔb chee, le ki lok gob Gibeonn yaab pu.

⁶ Le Gibeonn aatiŋ aajab tun ntuun Josua chee, Gilgal aatiŋ ni ke, “Timi aaninkpel, taa yii. Dan mala ki nan ter timi, ki gaa timi lii. Amor yaab aabɔrb mɔmɔk bi ka ŋigongon pu na kpaan kimɔbaan ki nan lir ti pu a.”

⁷ Le Josua ni waajab mɔmɔk bi ponn ni bibaa ŋmaa to tijar mbamɔm na kpaan nyan ni Gilgal aatiŋ ni.

⁸ Le Uwumbɔr bui Josua ke, “Taa li san ijawaan man. M di linyaŋ tii nimi a. Bi ponn ni ubaa aan ŋmaa sil ke u to nimi butɔb.”

⁹ Kinyeek ngbaan le Josua ni waajab nan chuun kina ti fuu Gibeonn aatiŋ ni, le ki kpaan lir Amor yaab pu.

¹⁰ Uwumbɔr nan cha Amor yaab aah kan Israel yaab na, le biwon jii. Le Israel yaab aajab nan ku bi Gibeonn yaab aatiŋ ni, le ki san dii bi kina ki ti nyan ŋijoo pu aasan mu cha Bef Horonn aatiŋ ni na, ki dii bi kina ŋŋangii wɔb ki ti saa Aseka ni Makeda.

¹¹ Amor yaab aah nan san naa Israel yaab na, le Uwumbɔr cha ŋitaatakpal nyan ni paacham ki lir ni bi pu kina, ki ti saa Aseka aatiŋ ni. Ŋitaatakpal aah nan lir bi pu ki ku bi na nan wiir jer Israel yaab aah ku bi na.

¹² Nwiin mundaal Uwumbɔr nan di Amor yaab tii Israel yaab bi nyaŋ bi na, le Josua nan len Uwumbɔr chee, Israel yaab aanimbiin ni ke, “Nwiin, sil Gibeonn aapaacham. Uŋmal, sil Aijalonn aafataŋ aapaacham.”

¹³ Nwiin nan sil, le uŋmal mu sil, kaa ki chuun, le linibol ngbaan ti nyaŋ baadim. Bi ŋmee tibɔr tee Jasar aagbaŋ ni. Le nwiin sil libuul libaa ni kitaapaak nwimɔn, kaa ki chuun.

¹⁴ Yaajayoonn ki nyan liyaadaal ngbaan, ki nan saa din wee na, nwiin mbaa aa ki bi ke liyaadaal ngbaan na, liyaadaal ngbaan le Uwumbɔr kii unibɔn aamɔboln. Uwumbɔr le nan si Israel yaab pu ki ton butɔb ngbaan tii bi.

¹⁵ Nee aapuwɔb na, Josua ni waajab nan gir buen Gilgal aatiŋ ni.

Josua aah nan chur Amor yaab aabɔrb biŋmu pu na

¹⁶ Tɔ, Amor aabɔrb biŋmu na ma nan san ŋmar, ki buen ti bɔr Makeda aatakpaluŋ kibaa ni.

¹⁷ Le unii ubaa kan bi, le ki ti tuk Josua baah bɔr nin chee na.

¹⁸ Josua nan bui ke, “Biln ŋitakpasakpiin ki di leŋ kitakpaluŋ ngbaan aabisamɔb man, ki cha bi li si kii ki man.

¹⁹ Nimi nibaa taa li si nima man. Li beenin dii nimi aadim ngbaan man, ki taa cha bi koo baatim ponn ni man. Nidindaan Uwumbɔr le di bi tii nimi ke ni nyaŋ bi.”

²⁰ Le Josua ni Israel yaab nan ku bi pam, bibaa mu nan san ti bɔr baah maa ŋigon kiir ntim mu na ni, le baa pii bi ki ku bi.

²¹ Josua aajab ngbaan mɔmɔk nan ki gir buen u chee, Makeda aatiŋ ni, nibaa aa ŋa bi. Ubaa aa nan bi kitiŋ ngbaan ni ki ga ŋmaa sil ki galn Israel yaab.

²² Josua nan bui ke, “Chuu piir kitakpaluŋ ngbaan aabisamɔb man, ki nyan ni bibɔrb biŋmu ngbaan, ki li joo ni bi m chee.”

²³ Nima pu le bi nan chuu piir kitakpaluŋ ngbaan, le ki nyan ni bibɔrb ngbaan: Jerusalem, ni Hebronn, ni Jamuf, ni Lakis, ni Eglonn aatim aabɔrb,

²⁴ ki di bi buen Josua chee. Josua nan yin ni Israel aajab mɔmɔk ubaa chee, le ki bui bijab aaninkpiib bi nan dii u buen butɔb ngbaan ni na, ke bi di bitaa taa bibɔrb ngbaan mɔmɔk aaneen ni. Le bi ŋa kina.

²⁵ Le Josua bui bininkpiib ngbaan ke, “Taa san ijawaan man, ki taa cha niwon yɔl. Li kpa mpɔɔn man, ki li kpa lipobil; ba pu? kina le Uwumbɔr ga ŋa nimi aadim mɔmɔk.”

²⁶ Josua nan ku bibɔrb ngbaan mɔmɔk le ki di biwon leen isui iŋmu pu, le biwon lee nima ki ti saa kijook wɔb.

²⁷ Nwiin aah cha mu ti lir na, le Josua cha bi chuu leer bi, ki di mee lii kitakpaluŋ ki ponn ni bi nan bɔr na. Le bi di ŋitakpasakpiin biin kitakpaluŋ ngbaan aamɔb, le ŋi laa beenin dɔ nima chee.

Josua aah nan moo nyaŋ ki gaa Amor yaab aatim muken pu na

²⁸ Liyaadaal ngbaan le Josua nan ton butɔb ki nyaŋ Makeda yaab aatiŋ, ni kaabɔr. U nan ku binib bi mɔmɔk nan bi kitiŋ ngbaan ni na kookoo, le ubaa aa nan gur ki ŋmar. U nan ŋa Makeda aabɔr ke waah nan ŋa Jeriko aabɔr pu na la.

²⁹ Nee aapuwɔb, le Josua ni waajab nyan Makeda aatiŋ ni, ki buen ti lir Libna aatiŋ mu pu.

³⁰ Uwumbɔr nan di kitiŋ ngbaan tii Israel yaab, le bi nyaŋ ki, ni kaabɔr. Bi nan ku unii mɔmɔk a, baa nan cha ubaa ŋmar. Bi nan ŋa ubɔr ngbaan ke baah nan ŋa Jeriko aabɔr pu na la.

³¹ Nee aapuwɔb, le Josua ni waajab nyan Libna aatiŋ ni, ki buen ti lur gob Lakis aatiŋ mu, le ki lir ki pu.

³² Butɔb ngbaan aawinleler daal le Uwumbɔr nan di kitiŋ ngbaan tii Israel yaab, le bi nyaŋ ki. Bi nan ŋa ki ke baah ŋa Libna aatiŋ pu na la, bi nan ku unii mɔmɔk a, kaa nan cha ubaa ŋmar kitiŋ ngbaan ni.

³³ Le Geser aabɔr, u bi yin u ke Horam na, dan nan kpee Lakis yaab pu, le Josua nan nyaŋ u ni waajab, waa nan ki gur unii ubaa aan u fu.

³⁴ Ni paa na, Josua ni waajab nan nyan Lakis aatiŋ ni, ki buen ti lur gob Eglonn aatiŋ mu, le ki lir ki pu.

³⁵ Liyaadaal ngbaan le bi nan nyaŋ kitiŋ ngbaan, ki ku unii mɔmɔk, ke baah ŋa Lakis aatiŋ pu na.

³⁶ Nee aapuwɔb, le Josua ni waajab nan nyan Eglonn aatiŋ ni, ki di dii ŋigongon paab, ki buen Hebronn aatiŋ ni, le ki ti lir ki pu,

³⁷ le ki nyaŋ ki. Bi nan ku nima chee aabɔr, le ki ku unii mɔmɔk kitiŋ ngbaan ni, ki kpee itingbaan imɔk bi nima chee na. Josua nan kuln kitiŋ ngbaan kookoo, nibaa chee aa nan ki gur kaa bii, u nan kuln ki, ke waah ŋa Eglonn aatiŋ pu na la. Unii ubaa aa nan ki gur ki fu.

³⁸ Josua ni waajab nan fenn ki gir buen Debir aatiŋ ni, ki ti lir ki pu.

³⁹ U nan nyaŋ ki, ni kaabɔr, ni ntim mu bi nima chee na. Bi nan ku binib ngbaan mɔmɔk kookoo. Josua nan ŋa Debir aatiŋ, ni kaabɔr, ke waah nan ŋa Hebronn, ni kaabɔr, ni Libna, ni kaabɔr pu na la.

⁴⁰ Josua nan nyaŋ kitiŋ ngbaan mɔmɔk. U nan nyaŋ bibɔrb bi aatim nan bi ŋigongon paab na, ni liwipuul wɔb aafataŋ aatim, ni ntim mu bi liwilir wɔb, ŋigongon aataab na, ni mu bi nteer pu ki cha ŋŋangii wɔb na. U nan ku binib ngbaan mɔmɔk, waa nan cha unii ubaa gur ki ŋmar. Kina le Israel yaab Aadindaan Uwumbɔr nan bui ke bi ŋa.

⁴¹ Josua aah nan ton butɔb dii pu na mɔmɔk nan yoor u ŋŋangii wɔb, Kades Banea aatiŋ ni, ki ti saa Gasa aatiŋ ki bi nnyusakpem aagbaan na, ki kpee Gosenn aapepel, le ki ti saa ŋŋangan wɔb, Gibeonn aatiŋ ni.

⁴² Josua nan nyaŋ bibɔrb ngbaan mɔmɔk, ni baatim, waah nan ton butɔb dii nfum mbaa pu na, ba pu? Israel yaab Aadindaan Uwumbɔr le nan ton butɔb ngbaan tii Israel yaab.

⁴³ Nee aapuwɔb, le Josua ni waajab gir kun Gilgal aatiŋ ni.