Josua 1 - Uwumbɔr aagbaŋ

Uwumbɔr aah nan tuk Josua pu na

¹ Uwumbɔr aatutunn Moses aah nan kpo na aapuwɔb, le Uwumbɔr bui Moses aateter Josua u nan ye Nunn aajapɔɔn na ke,

² “Maatutunn Moses kpo a. Gor dandana wee, aa ni Israel yaab ngbaan mɔmɔk, aan ni puur Jɔɔdann aamɔɔl, ki koo kitiŋ ki m ban m di ki tii nimi na ni.

³ Maah nan tuk Moses pu na, m di kitiŋ ki ni chaa koo ki ponn ni na aatingbaln mɔmɔk tii aa ni maanib ngbaan mɔmɔk.

⁴ Nimi aatinaanmɔk ga yoor ŋŋangii wɔb aateersakpiin ni, ki ti saa Lebanonn aajoo ŋi bi ŋŋangan wɔb na, ki ki yoor Yufrates Aamɔɔl mɔk, liwipuul wɔb, ki di bɔ dii Hef yaab aatiŋ ni, ki ti saa Kaasisik ni Aanyusakpem mɔk, liwilir wɔb.

⁵ Josua, saah ga li bi limɔfal ni ki ti saa buyoonn na, ubaa aa bi ki ga ŋmaa nyaŋ si. M ga li bi aa chee ke maah nan bi Moses chee pu na; maan di si lii kpala.

⁶ Pɔɔn aabaa ki li kpa lipobil, sin le ga loln binib ngbaan pu nsan, le bi gaa kitiŋ ki m nan puu ke m ga di ki tii biyaajatiib na.

⁷ Pɔɔn aabaa ki li kpa lipobil, ki li joo ikaal imɔk maatutunn Moses nan di mɔk nimi na mbamɔm. Aa taa yii ikaal ngbaan mubaa, le nin chee mɔmɔk aa cha na kan, aa ga nyaŋ.

⁸ Ni yaa ti ban ni doon mi kan, ni chuu nibaa ki li karni ikaal aagbaŋ ngbaan, ki li bae ikaal ngbaan nwiin pu ni kinyeek, ki chuu aabaa ki kii iliin imɔk bi ki ponn ni na. Nima kan, aa ga kan tinyoor ki li nyaŋni tiwan mɔmɔk ponn ni.

⁹ Teer ke m tuk si ke aa pɔɔn aabaa ki li kpa lipobil. Taa san ijawaan, ki taa cha aawon yɔl. Min, Aadindaan Uwumbɔr ma kan, m ga li bi aa chee saah cha nin chee na mɔmɔk.”

Josua aah nan bui Israel yaab pu na

¹⁰ Le Josua bui Israel yaab aayidam

¹¹ ke bi bɔ dii binib ngbaan ponn ni ki tuk bi ke, “Gor man ki ban tijikaar; ba pu? ni gur iwiin itaa, ti ga puur Jɔɔdann Aamɔɔl, ki koo kitiŋ ki Tidindaan Uwumbɔr ga di tii timi na ni.”

¹² Josua nan bui Rubenn ni Gad aanibol, ni Manase aanibol ligeln libaa ke,

¹³ “Teer man Uwumbɔr aatutunn Moses aah nan tuk nimi, ke Nidindaan Uwumbɔr ga di kitiŋ ki bi Jɔɔdann aawipuul aapepel wɔb na tii nimi, ni li koo ki ponn ni.

¹⁴ Nipuutiib, ni nimi aabim, ni nimi aawakor ga bee ki ni do, le nimi aajab bi joo tijawan na ga kpee Israel yaab bi gur na pu, ki puur Jɔɔdann Aamɔɔl, ki ti ter bi

¹⁵ aan bi ti gaa ki koo kitiŋ ki bi Jɔɔdann aawilir wɔb aan Nidindaan Uwumbɔr di tii bi na. N‑yoonn mu u ti tii Israel aanibol mɔmɔk lifuur na kan, ni ga ŋmaa gir dan ki nan kal nibaa aatiŋ pu, Jɔɔdann aawipuul wɔb, kitiŋ ki Uwumbɔr aatutunn Moses nan di tii nimi na.”

¹⁶ Le bi kii tii Josua ki gar u ke, “Ti ga ŋa saah tuk timi pu na, ki buen saah ga tun timi nin chee na mɔmɔk.

¹⁷ Ti ga kii saamɔb ke taah nan keei Moses aamɔb pu na. Cha Aadindaan Uwumbɔr li bi aa chee, ke waah nan bi Moses chee pu na.

¹⁸ Unii umɔk kpak si ki yii saah len pu na kan, udaan ŋeer bi ku u. Pɔɔn aabaa ki li kpa lipobil.”