Jona 4 - Uwumbɔr aagbaŋ

Jona aah gee liŋuul pu na, ni Uwumbɔr aanimbaasaln

¹ Jona aasui nan bii kina ngbaan pu, le liŋuul chuu u sakpen.

² Le u mee Uwumbɔr ke, “Uwumbɔr, maah nan laa bi linampal na, m nan len ke kina le aa ga ŋa. Kina pu le m nan pɔɔn mbaa ke m san mala ki buen Speenn aatiŋ ni. M nyi ke aa ye Uwumbɔr u gee binib ki san bi kinimbaak na la, aa kpa limɔr n‑yoonn mɔmɔk, ki kpa tiŋann n‑yoonn mɔmɔk, ki ŋmaa kpelni saalandak kaa dar binib aatafal.

³ Uwumbɔr, cha m kpo. M yaa ba tee kpo kan, ni ba soor ni ke m li kpa limɔfal.”

⁴ Le Uwumbɔr nan gar u ke, “Saah gee liŋuul pu na, ni ŋan aa?”

⁵ Jona nan nyan kitiŋ ngbaan ni, le ki di toŋ liwipuul wɔb ki ti kal nibaa chee. Nima chee le u nan gaa kinambuŋ ki kal kaaboon ni, ki ka kii tiwan ni ga ŋa Ninefa aatiŋ na.

⁶ Le Uwumbɔr cha lipulaajil punn ki jon kinambuŋ ngbaan, ki biin ki pu, ki tii Jona mboon, aan ki sɔŋ uwon. Jona aasui nan piir lipulaajil ngbaan pu sakpen.

⁷ Tɔ, kitaak ki ga woln na aachakpinaanyeek ni, le Uwumbɔr cha likpaambil libaa di lipulaajil ngbaan aafar ŋman, le li kpo.

⁸ Nwiin aah puu na, le Uwumbɔr cha liwipuul wɔb aabuln li ton na dan, le ki nan see Jona aayil, le u ti ban u fik. Le u mee Uwumbɔr ke u ba kpo. U nan bui ke, “M yaa ba tee kpo kan, ni ba soor ni ke m li kpa limɔfal.”

⁹ Le Uwumbɔr nan ki bui u ke, “Saah gee liŋuul lipulaajil ngbaan aakun pu na, ni ŋan aa?” Le Jona gar ke, “Ni ŋan ke m gee liŋuul. M kpa liŋuul li ga ŋmaa ku mi na.”

¹⁰ Uwumbɔr nan ki bui u ke, “Kinyeek kibaa ponn ni le lipulaajil ngbaan punn ki muun, le ki ki kpo kinyeek ki paa na; saa ŋa nibaa tii li, naa ti ki ye sin le cha li punn ki muun, le laah kpo na, aasui bii li pu.

¹¹ Tɔ, aa dak ke kinye aan m ga san kitisakpeŋ Ninefa aanib kinimbaak? Binib bi ki ponn ni, ki jer ŋichur nkub ni moninko, kaa ŋmaa yakr ni ŋan na ni ni kaa ŋan na, le tiwakor pam mu bi.”