Jona 3 - Uwumbɔr aagbaŋ

Jona ŋa Uwumbɔr aah bui u pu na

¹ Uwumbɔr nan ki gir len Jona chee tibɔr,

² ki bui ke, “Li cha kitisakpeŋ Ninefa ni, ki ti di tibɔr ti m di tii si na tuk bi.”

³ Jona nan kii Uwumbɔr aamɔb ki buen Ninefa, kitisakpeŋ ki u nan di iwiin itaa bɔ dii ki ponn ni ki ti saa kimɔk na.

⁴ Jona nan piin ki bɔ dii kitiŋ ngbaan ponn ni, le waah chuun nwimɔn aasachuln na, le u mooni tuk binib ngbaan ke, “Joo cha ni iwiin imonko ilee na, Ninefa aatiŋ ga kuln.”

⁵ Ninefa aanib nan tii naadii Uwumbɔr aah di tibɔr ti tuk bi na pu, le ki cha unii mɔk lul bumɔb; le binib mɔmɔk, bi ye biwankpadam ni bigiim na mɔmɔk nan peen tiwanpeenkaan ni saak kuub na ki mɔk ke bi kpeln baabimbin la.

⁶ Ninefa aabɔr aah ŋun tibɔr ngbaan na, le u fii libɔrjal pu, ki chuu peer waanaan aawanpeenkaan, le ki di tiwanpeenkaan ni saak kuub na peen, le ki kal nfatan ponn ni.

⁷ U nan moon tuk Ninefa aatiŋ aanib ke: “Tibɔr timina nyan ni ubɔr ni waaninkpiib chee la: Ubaa taa ji nibaa, binib mɔmɔk, ni inaa, ni ipiih taa ji nibaa ki taa nyu nibaa mu.

⁸ Binib mɔmɔk peen tiwanpeenkaan ni saak kuub na ki di kina aawanpeenkaan paan tiwakor mu pu. Unii mɔk mee Uwumbɔr ni linimaln, ki di cha mbiin ni titunwanbir aabimbin.

⁹ Nibaakan, Uwumbɔr ga kpeln waalandak aan waaŋuul ga sɔŋ, le ti taa kpo.”

¹⁰ Uwumbɔr nan kan baah ŋa pu na; u nan kan ke bi di cha baabiin aabimbin, kina pu le u kpeln waalandak kaa ki daa bitafal ke waah ba ga daa pu na.