Jona 2 - Uwumbɔr aagbaŋ

Jona aah mee limeel li na

¹ Jona nan bi ujan ngbaan aaponn ni taab le ki mee Udindaan Uwumbɔr ke:

² “Uwumbɔr, buyoonn nsui bii na le m yin si, le aa kii maayim ngbaan. M nan bi kitekpiitiŋ ni taab taab ki wii yin si ki ban nterm, le aa ŋun maah yin pu na.

³ Aa di mi mee lii taab taab, nnyusakpem aataab, nin chee nnyun nan mann goln mi na, le saanyunkpenn ti kpa mpɔɔn sakpen na fii labr m pu.

⁴ M nan nyi ke aa nyan mi aanimbiin ni la, le maan ki kan Saadichal li bi chain na.

⁵ Nnyun nan biin m pu ki kpar mi, nnyusakpem nan biin m pu kookoo a, le nnyusakpem ponn ni aamoor biin n‑yil pu.

⁶ M nan buen taab taab ŋijoo aataab, ki ti fuu kitiŋ ki aabisamɔi lak n‑yoonn mɔmɔk na ni. Ndindaan Uwumbɔr, sin le giin nyan ni mi taab taab ngbaan, le m beenin kpa limɔfal.

⁷ Uwumbɔr, buyoonn m dak ke maamɔfal doo na, le m mee si, le aa bi Saadichal li bi chain na ponn ni ki ŋun maameel ngbaan.

⁸ Binib bi dooni ŋiwaa ŋi kaa po kpa tinyoor tibaa na yii saanimbaasaln.

⁹ Le mma ga gaa ilahn pak si, m ga toor kitork tii si, ki ŋa maah puu ke m ga ŋa pu na. Limɔfal nyan ni Uwumbɔr chee la.”

¹⁰ Le Uwumbɔr bui ujan ngbaan ke u ti wuln Jona lii limɔɔtambol pu, le u ŋa kina.