Joel 3 - Uwumbɔr aagbaŋ

Uwumbɔr ga ji ŋitimbol tibɔr

¹ Uwumbɔr len ke, “N‑yoonn ngbaan kan, m ga giin Juda ni Jerusalem aatim aawangol tii mu,

² le ki kuun ŋitimbol mɔmɔk ki nan ji ŋi tibɔr Libɔjil Aafataŋ ni. Baah tun maanib pu na le m ga ji bi tibɔr. Bi jenn yaa Israel yaab koon ntiyayam ponn ni, le ki chuu yakr maatiŋ Israel ngbaan.

³ Bi too inaan ke bi lik unii u ga li yeh binaagbiib bi bi chur na. Bi kooh mbijabim ni mpiibim ki di bi ŋa tinaagbiir ponn ni ke bi di ilik ngbaan pa pateer tiib ni ndaan pu.

⁴ “Taya, ni Saidonn, ni ntim mumɔk bi Filistia aatingbaan na, ba le ni ban ke ni ŋa mi? Ni pɔɔni nibaa ke ni pa mi lipɔln la aa? Kina le yaa ye nimi aalandak kan, m ga giin pa nimi mala.

⁵ Nimi le yoor maakunabr ni maasalmaa ki yoor maawangol ki di ti ŋa nimi aawaa aadir ni.

⁶ Nimi le yoor Juda ni Jerusalem aanib ki di bi buen dandar, ki ti di bi kooh tii Griik yaab.

⁷ Dandana wee ma kan, m ban m buen ti nyan ni bi nin chee ni ti di bi kooh tii na la. M ga ŋa nimi ke naah nan ŋa bi pu na,

⁸ le ki cha binib di nijapɔtiib ni nibisatiib kooh tii Juda yaab; le bi mu di bi kooh tii Seba yaab bi bi dandar na. Min Uwumbɔr le len kina.

⁹ Moon tibɔr tee ŋitimbol mɔmɔk ponn ni ke: ‘Gor ki kiir butɔb man; yin nimi aajab bi ga ja kijaak na man; kuun nimi aatɔb aajab mɔmɔk ki li chuun man.

¹⁰ Di nimi aakuu mɔɔ kijaak aajum man, ki di nimi aakpaacha tiib mɔɔ tikpaatunn. Hali binib bi bun na mɔmɔk ga buen butɔb ni.

¹¹ Nimi ŋitimbol ŋimɔk mann goln na, ŋa mala ki dan man, ki kuun tɔb kifataŋ ni.’” Uwumbɔr, cha saajab sunn ni ki nan tak bi.

¹² “Ŋitimbol mɔmɔk, gor nibaa, ki dan Libɔjil Aafataŋ ni, nin chee Uwumbɔr ga ji binib tibɔr na. Le min Uwumbɔr ga kal ki ji ŋitimbol ŋimɔk mann goln na tibɔr.

¹³ Bi ye bibiindam la; gaa bi lii kitiŋ man ke baah bar ŋikalmaan pu na; muen bi ke baah mueni ŋisubil pu ki nyani ŋaanyun aan mu ti wiir na man.”

¹⁴ Binib ŋichur ŋichur le gbii Libɔjil Aafataŋ ngbaan ni. Nima chee le Uwumbɔr aawiin ngbaan ga gbeen fuu ni mala.

¹⁵ Nwiin ni uŋmal ga bɔln, le iŋmabi aan ki li wiin.

Uwumbɔr ga ŋa tinyoor ŋa waanib pu

¹⁶ Uwumbɔr tar ke uchinn na Sionn aajool pu; uneel nyan ni Jerusalem aatiŋ ni, ke utaal aah tar pu na; le kitiŋ ni kitaapaak jii. U mu tee ga li kii waanib.

¹⁷ “N‑yoonn ngbaan, le nimi Israel yaab ga bee ke min le ye Nidindaan Uwumbɔr. M bi Sionn, maajool li bi chain na pu la; Jerusalem ga li ye kitiŋ ki bi chain na la; le kaadim aan ki ŋmaa nyaŋ ki daalbaadaal.

¹⁸ N‑yoonn ngbaan kan, ŋijoo mɔmɔk pu ga li ye ikpaakon la; le inaa ga li bi ŋigongon mɔmɔk pu; le Juda aakpen mɔmɔk ponn ni ga li kpa nnyun pam. Nnyun ga li puu nyan ni Uwumbɔr Aadichal ni, ki sɔŋ Sitim Aafataŋ.

¹⁹ Ijipt ni Edom aatim ga kpaln nin chee nnyun aa bi na la. Litambol ŋmeen le ga li gur bi nima, ba pu? bima le buen ti tak ki ku Juda aanib bi kaa tun taani ubaa na.

^20-21 M ga teen baah nan ku bi mɔmɔk na aapɔln; m ga daa unii umɔk tun taani na aatafal. Le binib ga li bi Juda ni Jerusalem aatim ni ki cha n‑yoonn mu kaa kpa ndoon na, le min Uwumbɔr ga li bi Sionn aajool pu.”