Joel 2 - Uwumbɔr aagbaŋ

Itoon ye limɔkl le ki tii Uwumbɔr aawiin daal

¹ Pii kakaan man; faa nkuun Sionn aajool li ye Uwumbɔr aajool ki bi chain na paab. Juda aatiŋ aanib, cha niwon li gbaa man. Uwumbɔr aawiin peen ni a.

² Nwiin ngbaan daal ga li bɔɔn ki bi timm, mu ga li bɔɔn ki kpa ntaalangbam pam. Kitoonpaak ngbaan choo ki naahn mbɔmbɔɔn sakpiin mubaa le aah biini ŋijoo paab na. Tiwan nimina aaboln aa kee ŋa, kaan ki ŋa daalbaadaal.

³ I ŋmɔ tijikaar mɔmɔk ke mmii le aah gaal na. Aa yaa lik imɔi wɔb kan, ni naahn Edenn aasaak na la, le aa yaa lik ipuwɔb kan, ni naahn nteersakpiin pu la. Nibaa aan ŋmaa bɔr aan yaan kan ni.

⁴ I naahn itaan la, le ki san ke butɔb aajab aah joo itaan i chaa butɔb na.

⁵ Yaah bi yuk ŋijoo paab pu na naahn itaan aatɔroku tiib la; ki naahn timokuun aah gaal mmii ni pu na la. I chol tɔb pu ke butɔb aajab aah gor bibaa ki kii butɔb pu na la.

⁶ Ijawaan chur unii umɔk waa yaah choo pu na.

⁷ I tak ke bijab aah tak baadim pu na la; ki joi ŋigon ke butɔb aajab na. I mɔmɔk cha imɔi wɔb la, ubaa aa yenn ki cha nibaa ki cha iken,

⁸ ubaa mu aa punn uken aamɔb pu. Yaah ga jer nin chee na, tiwan nibaa aa bi ki ga leŋ yaasan ke i taa jer.

⁹ I ga chii ki buen kitiŋ ponn ni; ki fii labr ŋigon pu, ki joi ŋidichal pu, ki diir takolu tiib koo tidir ponn ni ke binaayukb na.

¹⁰ I yaa choo kan, kitiŋ deŋni la, le kitaapaak jii. Nwiin ni uŋmal mɔmɔk bɔnn chirm, le iŋmabi aa ki wiin.

¹¹ Uwumbɔr tar ke utaal na ki tuk waatɔb aajab baah ga ŋa pu na. Waajab bi kii tii waamɔb na wiir ki kpa mpɔɔn. Uwumbɔr aawiin ngbaan daal kan, ubaa aan li wii aan uŋeen aatɔ ka laa. Ubaa aan ŋmar nwiin ngbaan daal.

Kpeln nimi aabimbin mbamɔm man

¹² Uwumbɔr len ke, “Hali dandana, kpeln nimi aabimbin mbamɔm man, ki lul bumɔb, ki li wii ikpowiil, ki gir ni m chee.

¹³ Cha nimi aasuugar mɔk nimi aapombiin, naa ye ke ni daa kar nimi aawanpeenkaan baanja.” Gir ni Nidindaan Uwumbɔr chee man. U kpa tiŋann ki ye unimbaasaln daan la; u kpa limɔr ki ŋmaa joo waah puu tipuur ti na; n‑yoonn mɔmɔk kan, u gor ki kii ke u di cha pinn binib. Waa ban ke u daa bitafal.

¹⁴ Nibaakan, Nidindaan Uwumbɔr ga kpeln waalandak, ki ga ŋa waanyoor ŋa ni pu aan ni kan tijikaar sakpen. Le ni ga ŋmaa tii u njikaabim ni ndaan aapiin.

¹⁵ Pii kakaan Sionn aajool paab man; cha binib mɔmɔk lul bumɔb ki kuun bi mɔmɔk kpaan.

¹⁶ Kuun binib mɔmɔk kpaan tɔb chee; cha bi mɔmɔk gor bibaa ki li kii nkuun mu bi chain na; li joo ni binib bi por na; kuun bibilb ni mbipɔm mu. Hali binib bi laa mɔn tichar na ga nyan ni baadir ni ki dan.

¹⁷ Bitotoorb bi tun Uwumbɔr aatuln, waatork aabimbiln ni Waadichal aabisamɔb aakaasisik ni na; ni li mee Uwumbɔr ni tinyunyunn ke: “Uwumbɔr, san saanib kinimbaak. Taa cha ŋinibol ŋiken lik timi fam ki ŋa timi mbɔnyun ki len ke, ‘Nimi Aawumbɔr ngbaan bi la?’”

Uwumbɔr aah cha kitiŋ ki gir pu na

¹⁸ N‑yoonn ngbaan le Uwumbɔr ki san waatiŋ kinimbaak; u san waanib kinimbaak.

¹⁹ U kii baameel ki len ke: “Dandana wee m ban m tii nimi tijikaar ni ndaan, ni olif aakpan, aan ni mɔɔr nimi. Ŋinibol ŋiken aan ki lik seen nimi.

²⁰ M ga chuu nyan itoon i nan nyan ni ŋŋangan wɔb na ki ga jenn ibaa buen litambol ŋmeen aatiŋ ni. Itoon i loln i mɔmɔk pu nsan na ga buen ti koo N‑yaan Aanyusakpem na ni, le i paa puwɔb na ga buen ti koo Kaasisik ni Aanyusakpem na ni. I ga kpo, le iwon ga bur ki nuŋ. Yaa ŋa nimi pu na, nima le ga cha m ku i mɔmɔk.

²¹ Ikpaakon, taa cha ijawaan li joo nimi man, li kpa mpopiin man, ki li mɔɔni man Uwumbɔr aah ŋa pu tii nimi na mɔmɔk pu.

²² Tiwakor, taa cha ijawaan li joo nimi man. Nimi aamoŋmɔpaan ki boln timosɔnn isui mɔmɔk lun ŋisubil, le ŋikakan ni ŋisubil ŋiken moo kpee.

²³ Sionn aatiŋ aanib, cha nisui li piin man, li mɔɔni Nidindaan Uwumbɔr aah ŋa pu tii nimi na pu. U tii nimi kiseek ni aataal, ki ŋeer naah ban pu na; ki cha utakuutaal ni unaalantaal mu nun mbamɔm ke waah ti nu pu na.

²⁴ Ŋijikaapaa mɔmɔk ga gbiin tijikaar; ndaan aasubil ni nkpan mu ga li wiir.

²⁵ M ga giin itoon aah di nimi aajikaar ti mɔmɔk ŋman ŋibin ŋi jer na ki ki di tii nimi. Min le nan tun ni itoon i wiir sakpen ngbaan na.

²⁶ Dandana wee ma kan, ni ga kan sakpen ki ji bab. Ni ga pak Nidindaan Uwumbɔr u ŋa lijinjiir aawan ngbaan ki tii nimi na. Ubaa aan ki lik seen min Uwumbɔr aanib.

²⁷ N‑yaayoonn ngbaan, le nimi Israel yaab ga bee ke m bi nikaasisik ni, ki bee ke min Uwumbɔr le ye Nidindaan, ubaa aa ki bi ki kpee m pu. Ubaa aan ki lik seen maanib.

Uwumbɔr aawiin daal

²⁸ “N‑yoonn mu choo na, m ga di Maafuur Nyaan di ŋa maanib mɔmɔk pu: nijapɔtiib ni nibisatiib ga nabr min Uwumbɔr aah len pu na; nimi aaninkpiib ga daŋ tidaŋ, le nimi aanachipɔm ga kan lijinjiir aawan.

²⁹ N‑yoonn ngbaan le m ga nan di Maafuur Nyaan ŋa maanaagbiijab ni maanaagbiipiib mu pu.

³⁰ M ga ŋa lijinjiir aawan kitaapaak ni, ni kitiŋ pu; nsin, ni mmii, ni iŋmanyuu ga li bi.

³¹ Nwiin ga bɔln, le uŋmal mann ke nsin na waahr aan Uwumbɔr aawiin daal nin fuu ni. Mu ga li ye nwiin sakpiin mu kpa ijawaan na la.

³² Liyaadaal ngbaan unii umɔk mee Uwumbɔr na, uma le ga ŋmar ke Uwumbɔr aah len pu na ke, ‘Bibaa bi Jerusalem aatiŋ ni ki ga ŋmar; bima le ye binib bi m lee bi ke bi ga ŋmar na.’”