Jeremia 9 - Uwumbɔr aagbaŋ

¹ N‑yil yaa ba ye nnyunbun, aan nnimbil mu ye uyayak aanyunbun kan, m ba ga li wii nwiin pu ni kinyeek, baah ku maanib bi na pu.

² M yaa ba kan nkakaayaan nteersakpiin ni kan, m ba ga fii buen nima ki cha maanib. Baa dii Uwumbɔr, bi mɔmɔk nyan upuwɔb la.

³ Bi gee ke bi li geei inyamɔn n‑yoonn mɔmɔk la; le beebee aatuln ŋmeen bi kitiŋ ngbaan pu. Uwumbɔr bui ke, “Maanib yaa tun titunwanbir tibaa kan, le bi di tiken kpee, kaa nyi mi ke min le ye Baawumbɔr.”

⁴ Unii mɔmɔk li nyi ujɔ bɔr, le ubaa aan li ŋmaa kpa una aabo pu kipupuk; ba pu? na aabo mɔk gii inyamɔn ke Jakob na la, le unii bii ujɔtiib.

^5-6 Bi ŋmanni bijɔtiib la, le ubaa aa len ibamɔn, bi mɔk bilambil inyamɔn aageei pu, kaan di cha titunwanbir aatuln. Bi yaa ti tun titunwanbir tibaa kan, le bi di tiken kpee ni, le tibɔŋmannkaan tibaa paa tiken pu. Uwumbɔr bui ke waanib yii u.

⁷ Kina pu le Uwumbɔr Mpɔɔnsakpiindaan bui ke, “M ga pu maanib mmii ni ke tikur na, ki nyan baajɔŋ le ki tɔŋ bi ki lik. Maanib tun titunwanbir, m ni bima ki kpa bayaar?

⁸ Bilambil bi ke ipiin i kpa liluul na la; ŋi geei inyamɔn n‑yoonn mɔmɔk la. Unii mɔmɔk len tibɔnyaan le uŋeen aatɔ chee, le ki tee bi pen u gaawɔb.

⁹ M taa daa bitafal nima pu uu? M taa teen kina aatimbol aa? Min Uwumbɔr le len kina.”

¹⁰ Le m bui ke, “M ga wii ŋijoo aakpowiil ki wii tiwakor aamoŋmɔpaan aah kuur pu aan ubaa aa chuun nima chee pu na aakpowiil. Inaa aawiil ŋmin chii; inyoon ni ipeel fii ki san buen a.”

¹¹ Le Uwumbɔr bui ke, “M ga cha Jerusalem kpaln ŋilangbentakpal, nin chee iŋɔk koo na; Juda aatim ga kpaln nteersakpiin, nin chee ubaa aa koo na.”

¹² Le m baa ke, “Uwumbɔr, ba ŋa kitiŋ bii ki kuur ke nteersakpiin na, le ubaa aa ki chuun nima chee? Ŋma kpa nlan ki ga ŋmaa bee nimina aatataa? Ŋma aan aa kpiir mɔk ke u di tuk biken na?”

¹³ Le Uwumbɔr gar ke, “Maanib aah yii maamɔkm na le cha nimina ŋa. Baa kii maamɔb, kaa ŋa maah tuk bi pu na.

¹⁴ Bi tee yii le ki kpa tafalaaŋun ki dooni Baal aawaa ke biyaajatiib aah tuk bi pu na.

¹⁵ Kina pu na, li pel man, min, Uwumbɔr Mpɔɔnsakpiindaan, u ye Israel yaab Aawumbɔr na aah ban m ŋa pu na; m ga di tijikaar ti to na le tii maanib bi ji, ki tii bi njinn bi nyu.

¹⁶ M ga cha bi yaa koo ŋitimbol ŋi bima ni biyaajatiib aa kee ŋun ŋi pu na ni, le ki di bijab tun ti tak bi ki ti saa buyoonn m ga kuln bi na.”

Jerusalem aanib aah wii ki ban nterm pu na

¹⁷ Uwumbɔr Mpɔɔnsakpiindaan bui ke, “Dakl lik man tiwan ni bi ŋani na. Yin ni binib bi wii likpuul na man, yin ni bipiib bi ga gaa ikpolahn na man.”

¹⁸ Le binib ngbaan bui ke, “Bui bi ke bi ŋa mala ki gaa nkpolahn tii timi, aan tinyunyunn ti gbiin tinimbil ni, aan tinimbil aagban sɔŋ ikpowiil pu.”

¹⁹ Li pel man iwiil aafuuk Sionn aatiŋ ni, “Timi aamɔfal junn a. Ti kpaln binimɔɔnib la. Ti ga nya cha timi aatiŋ la; bi ber timi aadichal a.”

²⁰ Le m bui ke, “Nimi bipiib, li pel man Uwumbɔr chee, ki ŋun waamɔboln. Mɔk nibisatiib likpuul aawiim, ki mɔk ninaakoontiib ikpolahn aagaam.

²¹ Nkun dii timi aatakolu mam le ki koo ni timi aabɔrchiln ni; mu gbaa mbim bil kitiŋ ponn ni, ki gbaa binachipɔm bil kinyaŋ ni.

²² Ŋinikpol dɔ ni kookoo, ke ŋinaabinkpok le aah dɔ ikpaakon ni na, ki bi ke baah gaa ŋikalmaan le bil, kaa bar ŋi na, ki bi ke ŋikalmaan ŋi ubaa aan bar ŋi na. Uwumbɔr aah bui mi ke m len pu na le bi na.”

²³ Uwumbɔr ki bui ke, “Bilandam taa li kpa kipupuk baalan pu, binib bi pɔɔ na mu taa li kpa kipupuk baapɔɔn pu, biwankpadam mu taa li kpa kipupuk baawangol pu.

²⁴ Unii umɔk ban u li kpa kipupuk na u li kpa kipupuk ke u nyi min Uwumbɔr, ba pu? maageehm bi n‑yoonn mɔmɔk la, le m ŋani tiwan ni tok ki ye ibamɔn na. Tiwan ni piir nsui na le na. Min Uwumbɔr le len kina.”

^25-26 Uwumbɔr nan ki bui ke, “N‑yoonn choo, le m ga nan daa Ijipt, ni Juda, ni Edom, ni Amonn, ni Moab, ni nteersakpiin ni aanib bi chee biyigbeer pu aayikpir na aatafal. Ba pu? Bi kaa ye Juda aanib binib bimina ponn ni na gii ŋichakpan, le kaa dii mi. Juda aanib ma kan, bi gii ŋichakpan, kaa tee joo lichakpangeei aakaal aah mɔk pu na.”