Jeremia 7 - Uwumbɔr aagbaŋ

Jeremia aah sur binib Uwumbɔr Aadichal ni pu na

^1-3 Uwumbɔr nan tun mi ke m ti li si mbisamɔb mu Juda aanib diir koo Uwumbɔr Aadichal ni ti dooni uma Uwumbɔr na. U nan bui mi ke m li si nima ki mooni Uwumbɔr Mpɔɔnsakpiindaan, Israel yaab Aawumbɔr aah kpa pu u di tuk bi na ke, “Kpeln mbimbin mu ni bi na, ni tiwan ni ni ŋani na man, aan m cha ni li beenin koo do.

⁴ Taa ki len n‑yoonn mɔmɔk ‘Uwumbɔr Aadichal sɔ, Uwumbɔr Aadichal sɔ, nima pu le ti kpa ŋŋmarm.’ Ni ŋmanni nibaa la. Uwumbɔr Aadichal aan nya nimi ntafadaan ni.

⁵ “Kpeln mbimbin mu ni bi na, ni tiwan ni ni ŋani na man. Ni li ŋani unii mɔmɔk tiŋann.

⁶ Taa ŋa bicham, ni nkpobim, ni bikpopiib falaa man. Taa ki ku binib bi kaa tun taani na kitiŋ kee pu. Taa ki dooni man ŋiwaa; ba pu? kina ga ŋmaa kuln nimi.

⁷ Ni yaa kpeln kan, m ga cha ni li koo kitiŋ ki m nan di tii niyaajatiib ke ki li ye baatiŋ ki ti saa n‑yoonn mu kaa kpa ndoon na.

⁸ “Lik man, ni di naadii tii inyamɔn la.

⁹ Ni su kinaayuk, ki ku binib, ki gɔr kidagook, ki mɔni inyamɔn tipuur pu, ki toor kitork tii liwaal Baal, le ki dooni ŋiwaa ŋi naa nan nyi daalbaadaal na.

¹⁰ Ni ŋani tiwan ni maa gee ni na, le ki dan nan sil nnimbiin ni, min mbaa Aadichal ni, ki bui ke, ‘Ti kpa ŋŋmarm.’

¹¹ Ni dak ke Maadichal ni ye mbɔbɔryaan nin chee binaayukb ga bɔr na la aa? M kan naah ŋani tiwan ni mɔmɔk na.

¹² Li cha man Silo aatiŋ ni, libuul li ni m nan puen lee ke ni li dooni mi nima na, ki ti lik maah ŋa nima chee, maanib Israel yaab aatunwanbir pu na.

¹³ Ni tun titunwanbir tee mɔmɔk, le m tuk nimi, ki ki gir bui nimi, le ni yii, kaan pel. Buyoonn m yin nimi na le ni yii, kaan kii.

¹⁴ Maah nan ŋa Silo pu na, m ga ŋa Maadichal li ni di naadii tii li na kina. Libuul li m di tii nimi ni niyaajatiib na, m ga ŋa li ke maah nan ŋa Silo aatiŋ pu na.

¹⁵ M ga jenn nyan nimi nnimbiin ni, ke maah nan jenn nido yaab, Israel aanib pu na. Min Uwumbɔr le len kina.”

Binib ngbaan aah kaa kii Uwumbɔr aamɔb pu na

¹⁶ Uwumbɔr bui ke, “Jeremia, taa mee limeel tii binib bee. Taa wii, ki taa mee limeel bi pu; taa gaŋni mi, ba pu? maan pel saameel.

¹⁷ Saa waa baah tun pu Juda aatim ni, ni Jerusalem aatiŋ ponn ni pu na aa?

¹⁸ Mbim le peei idɔ, le bijab tuur mmii, le bipiib buun n‑yon ki ŋa maab tii liwaapii li bi yin li ke Paacham Aapiibɔr na. Bi ki kpir ŋiwaa ŋiken mu pu ndaan, ke ni li wu mi.

¹⁹ Tɔ, min le bi sil tii titotonn aa? Aayii, bibaa le bi tii titotonn, ki joo ni inimɔɔn bibaa pu.

²⁰ Le min, Bidindaan Uwumbɔr, ga cha maaŋuusakpeln pii ni Maadichal limina. Li ga pii binib ni tiwakor mu, hali isui ni tijikaar mɔmɔk ga kan li. Maaŋuul ga li bi ke mmii mu ubaa aan ŋmaa junn mu na la.

²¹ “Maanib, ni seer kitork aawakor tibaa mmii ni, kitork aabimbiln paab la, le ki ŋmɔ tibaa mu. Le min Uwumbɔr aah len pu na le ye ke ni ba tee ŋmɔ ti mɔmɔk kan, ni soor.

²² Maa nan tuk niyaajatiib kitork ki bi ga di see mmii ni, bee kitork aabɔr kiken buyoonn m nan nyan ni bi Ijipt aatiŋ ni na.

²³ Tɔ, m nan tee bui bi ke bi li keei maamɔb, aan m li ye Baawumbɔr, le bi mu li ye maanib. M nan bui bi ke bi li bi maah bui bi ke bi li bi pu na, aan ki li kpa lifuur.

²⁴ Le baa kii maamɔb, kaa kpa ntafaŋum mu, le ki tee tun baamaaŋuntafal ni baatunwanbir aasui ngbaan aah bui bi pu na, le ki moo bii cha.

²⁵ Ki nya bundaal niyaajatiib nan nyan Ijipt aatiŋ ni ki nan saa din wee na, m tun ni maatutum bi ye maabɔnabr na, ni chee.

²⁶ Le ubaa aa kpa ntafaŋum. Ni labr kpa tafalaaŋun ki tun titunwanbir ki jer niyaajatiib.

²⁷ “Kina pu na, Jeremia, aa ga di tibɔr timina mɔmɔk tuk maanib, le baan ŋun tii si, aa ga yin bi, le baan kii.

²⁸ Aa ga bui bi ke baatimbol aa kii mi Bidindaan Uwumbɔr aamɔb, kaa bae baatafadaan chee. Mbamɔn aa ki bi. Ubaa aa ki len mbamɔn aabɔr.

Baah tun titunwanbir Hinom Aafataŋ ni pu na

²⁹ “Jerusalem aanib, li wii ikpowiil man; kuu niyikpir ki di mee man. Gaa nkpolahn ŋigongon paab man, ba pu? min Uwumbɔr aaŋuul fii, le m yii maanib.

³⁰ “Juda aanib tun titunwanbir la. Bi di baawaa ŋi bir sakpen na bil Maadichal ni, ki bii li.

³¹ Bi maa kitork aabimbiln li bi yin li ke Tofef na, Hinom aafataŋ ni, ke bi li joo bijapɔtiib ni bibisatiib toor kitork mmii ni. Maa nan bui bi ke bi ŋa kina, kina aalandak aa nan kpaan koo ni nsui ni.

³² Kina pu na, n‑yoonn choo le baan nan ki yin nima chee ke Tofef, bee Hinom Aafataŋ. Bi ga nan li gur yin nima chee ke Linikul Aafataŋ la. Mpaan aah kaa ga nan ki li bi bi sub binib pu na, le bi ga nan li gur sui binib nima.

³³ Ŋinikpol ngbaan le ga nan li ye inyoon ni ipeel i bi nima na aajikaar, le ubaa aan nan li bi nima ki jenn i.

³⁴ Kitiŋ ngbaan ga kpaln nteersakpiin la. Mpopiin, ni mmɔɔn aafuuk, ni tibɔndinn aajim aamɔɔn ga doo Juda aatim, ni Jerusalem ponn ni.