Jeremia 6 - Uwumbɔr aagbaŋ

Bidim aah gob Jerusalem pu na

¹ Benjaminn aanib, li san ban ŋŋmarm man. San nya Jerusalem ni man. Pii ukpiin Tekoa aatiŋ ni, ki tuur limɔkl aamii Bef Hakerem aatiŋ ni man. Tibɔbir ni libiil ban ni nya ni ŋŋangan wɔb ki dan la.

² Jerusalem aatiŋ ŋan, le ki mu bii a;

³ bibɔrb ni baajab ga kuun kal nima la. Bi ga ŋa baagban aaboo ki maln kitiŋ ngbaan, le bi mɔmɔk ga kuun kal baah gee nin chee na.

⁴ Bi ga bui ke, “Gor ki ti tak Jerusalem man. Gor man. Nwiin aakaasisik ni le ti ga ti tak ki;” le ki ga tee bui ke, “Ti taan sakpen a, nwiin ban mu lir la, le ijooboon moo fɔk cha.

⁵ Ti ga nan tak ki kinyeek la; ti ga ber kaadir ti pɔɔ ki fɔk na.”

⁶ Uwumbɔr Mpɔɔnsakpiindaan le cha bibɔrb ngbaan pir isui ki maa ŋibimbin ke bi gob Jerusalem. U bui ke, “Kitiŋ ngbaan ponn ni aah gbii limukl sakpen pu na, le m ga daa kitafal.

⁷ Liboln ni aah kpa nnyunpɔm pu na, kina le Jerusalem ni kpa titunwanbir pɔnn. M ŋun kijaak ni libiil pu kitiŋ ngbaan ni; m kani iween ni ibuun ŋmeen la.

⁸ Jerusalem aanib, cha tibɔbir timina li ye nsurm ki tii nimi, naa ye kina kan, m ga di nimi lii, m ga cha nimi aatiŋ kpaln nteersakpiin, nin chee ubaa aa koo na.”

Israel yaab aah yii Uwumbɔr aamɔb pu na

⁹ Uwumbɔr Mpɔɔnsakpiindaan nan bui mi ke, “Bi ga pir Israel yaab pel pel ke ŋisubil aasui i bi ker ŋisubil doo i pu na la. N‑yoonn laa bi, kina pu na, gaa saah ga ŋmaa gaa bi lii na.”

¹⁰ Le m gar ke, “Ŋma ga pel m chee buyoonn m bi len bi chee tibɔr ki sur bi na? Bi kpa tafalaaŋun, kaan pel saabɔr ti m joo nabr bi na; bi laa saabɔr la.

¹¹ Uwumbɔr, saaŋuul aah fii bi pu pu na wu nsui ni ke mmii na, le maa ki ŋmaa joo li.” Uwumbɔr ki bui mi ke, “Cha maaŋuul pii mbim mu bi kitiŋ ponn ni na, ni binachipɔm aakuun mɔmɔk ni. Baadim ga di chatiib ni puutiib buen, kaan di cha bininkpiib ni binib bi por pam na mu.

¹² Bi ga di baadichal, ni baakpaakon, ni bipuutiib tii binib bibaa la. M ban m daa kitiŋ kee pu aanib aatafal la.

¹³ Binib bi pɔɔ na, ni bi kaa pɔɔ na mɔmɔk pɔɔni bibaa ke bi di beebee le kan ŋimombil, hali maabɔnabtiib ni bitotoorb ji binib ngbaan la.

¹⁴ Bi ŋani ke maanib aabuun aah kaa ye nibaa le na. Bi len le ke, ‘Ni mɔmɔk ŋan,’ le naa ŋan kpala.

¹⁵ Baa nan san inimɔɔn, baajɔŋ aatun ŋee pu. Aayii, baa nan san inimɔɔn kpala; baa kpaan nyi baah ga mɔk pu ke inimɔɔn joo bi na. Kina pu le bi mu ga lir ke biken aah lir pu na; m yaa nan daa bitafal kan, baadoon le ga li bi na. Min Uwumbɔr le len kina.”

Israel yaab aah yii Uwumbɔr aasan pu na

¹⁶ Uwumbɔr bui waanib ke, “Sil isayakr ki li lik man. Baa ki bee man n‑yaayoonn na aasanbim ni nsanyaan na aah nan bi nin chee na. Li chuun mu pu man, ki kan lifuur.” Le bi bui ke, “Ayii, taan ŋa kina.”

¹⁷ Le Uwumbɔr ban bikikiib ke bi li pel n‑yoonn mu ukpiin ga nan wii na. Le bi mu bui ke, “Taan pel.”

¹⁸ Le Uwumbɔr bui ke, “Nimi ŋitimbol, li pel man, ki bae tiwan ni ban ni ŋa maanib na chee.

¹⁹ Kitiŋ, li pel. Maanib aabeebee aatuln pu le m ban m joo ni libiil nan lii bi pu, ba pu? bi yii maamɔkm kaa tii maabɔr naadii.

²⁰ Ntafal aa bi tulalee aayon mu nyan ni Seba, aan bi joo nan tii mi na, kaa bi tulalee mam bi nyan ni dandar na ni. Maan gaa baapiin, ni kitork ki bi joo tii ni mi na.

²¹ M ga cha binib bee gbeer ki lir. Tetiib ni baabim ga kpo, le jɔtiib ni maantɔtiib mu ga kpo.”

Ŋŋangan wɔb aajab aah nan lir Israel yaab pu pu na

²² Uwumbɔr len ke, “Bijab nyan ni ŋŋangan wɔb aatiŋ ni ki choo; litimbol ngbaan pɔɔ sakpen le ki gor kii butɔb.

²³ Bi yoor baatɔi ni kijaak aajum; bi kpa mbiin kaa san kinimbaak. Baataan aafuuk bi ke nnyusakpem aafuuk na la. Bi gor ke bi to Jerusalem butɔb.”

²⁴ Le Jerusalem aanib bui ke, “Ti ŋun tibɔr ngbaan, le tiwon yɔl ti lir kitiŋ, ijawaan ni iween chuu timi ke upii u ban u maa na aamalween aah wu pu na la.

²⁵ Taa ki kaa ke ti buen itingbaan ni, bee isan pu ki ti tun lituln; ba pu? timi aadim joo tijawan, le ijawaan bi ni kookoo.”

²⁶ Le Uwumbɔr bui waanib ke, “Di tiwanpeenkaan ni saak kuub na peen, ki di nfatan pɔŋ nibaa. Li wii ikpowiil ke lijapɔnbaal aah kpo kan, bi wii pu na; ba pu? unii u choo u nan bii doo nimi na ga fuu ni n‑yoonn mu naa dak u pu na la.

²⁷ Jeremia, tɔŋ maanib ke baah pu tikur mmii ni pu na ki lik ke bi bi kinye.

²⁸ Bi mɔmɔk ye maaŋuntafaldam bi kaa si unii aachaŋ ni na la, bitafal pɔɔ ke tikumann ni tikur na la. Bi mɔmɔk ji binib la, le ki chuun joo biken aabɔr mooni.

²⁹ Nchaamii gaal sakpen, le tikur ti kaa ŋan na aa ŋmaa donni ki puu buen. Unii yaa ki bi toor maanib kan, ni ye fam la; ba pu? titunwanbirdam na aa nyan bi ni.

³⁰ Min, Uwumbɔr aah yii maanib na, le bi ga li gur yin bi ke tigbengbir ti kaa kpa tinyoor na.”