Jeremia 52 - Uwumbɔr aagbaŋ

Jerusalem aah ga lir pu na

¹ Sedekia nan ye ŋibin moninko ni libaa aanii le ki jin Juda aanaan, le ki nan ka Jerusalem aatiŋ ni ki joo kitiŋ ngbaan ki ti saa ŋibin kipiik ni libaa. Una aayimbil le nan ye Hamutal. Hamutal aate le nan ye Jeremia u nan koo Libna aatiŋ ni na.

² Ubɔr Sedekia nan tun Uwumbɔr titunwanbir ke Ubɔr Jehoyakim aah nan tun pu na.

³ Uwumbɔr aaŋuul nan fii Jerusalem ni Juda aanib pu, le u kuln bi pel pel. Sedekia nan nyan Babiloŋ Aabɔr Nebukadnesar aapuwɔb,

⁴ Kina pu le Nebukadnesar nan di waajab mɔmɔk dan nan tak Jerusalem, Sedekia aanaan aabiwawaer ni aaŋmapiik aawiin kipiik daal. Bi nan kuun kal kitiŋ ngbaan aagbaan, le ki maa ŋikɔl ŋikɔl kitiŋ ngbaan aagon aataab kina

⁵ ki ti saa Sedekia aanaan aabin kipiik ni libaa ni.

⁶ Libiln ngbaan aaŋmanaa aawiin iwae daal, buyoonn nkon nan moo nyaŋ aan tijikaar tibaa aa ki gur binib ji na,

⁷ le Babiloŋ aajab nan wiil kaagon ki koo ni, le ki gob kitiŋ ngbaan ti to, le kitiŋ ngbaan aajab nan loon kinyeek ki nyan. Bi nan dii libɔrdichal aasaak aasan, le ki dii mbisamɔb mu bi ŋigon ŋilee ngbaan aasisik ni na nyan, ki di toŋ Jɔɔdann Aafataŋ wɔb.

⁸ Tɔ, Babiloŋ aajab nan di paan Ubɔr Sedekia pu, ki ti pii u Jeriko chee, le waajab mɔmɔk san cha u.

⁹ Bi nan di Sedekia buen Ubɔr Nebukadnesar u nan bi Ribla aatiŋ ki bi Hamaf aapepel ni na chee, nima chee le Nebukadnesar nan ti jin u tibɔr ki siin baah ga ŋa u pu na.

¹⁰ Ribla aatiŋ ni, nima chee, le u nan ku Sedekia aajapɔtiib unimbil ni, le ki ku Juda aaninkpiib mu.

¹¹ Nee aapuwɔb, le u cha bi chuu lokr Sedekia aanimbil, le ki di tikululn gbin u ki di u buen Babiloŋ ni. Sedekia nan gaar kiyondiik ni Babiloŋ ni le ki ti saa nwiin mundaal u kpo na.

Baah nan ber Uwumbɔr Aadichal pu na

¹² Ubɔr Nebukadnesar aah nan ye Babiloŋ aabɔr pu na aabin kipiik ni liwawaer aaŋmaŋmu aawiin kipiik daal, le waasusur Nebusaradann, u nan ki ye waajab aayidaan na, nan koo Jerusalem aatiŋ ni.

¹³ U nan see Uwumbɔr Aadichal, ni libɔrdichal, ni binikpaam bi mɔmɔk bi Jerusalem na aadichal lii;

¹⁴ le waajab mu tur kaagon lir.

¹⁵ Nebusaradann nan di binib bi gur ki ponn ni na buen Babiloŋ ni, ni biwanŋab bi nyi tiwan mbamɔm ki beenin bi nima na, ni binib bi nan nyan ti di bibaa kpee Babiloŋ yaab pu na.

¹⁶ Tɔ, u nan di cha bigiim bi kaa kpa liwankpal libaa na, le ki cha bi tun lituln ŋisubil aasar, ni tijikaar aakpaakon ni, Juda aatiŋ ni.

¹⁷ Babiloŋ yaab nan gbaa wiil tikumann aajaatɔlk mam ni tɔroku mam bi nan bi Uwumbɔr Aadichal ni na, ki kpee tikumann aakin na, le ki yoor tikumann ngbaan mɔmɔk buen Babiloŋ aatiŋ ni.

¹⁸ Bi nan ki yoor tiwan ni bi joo faal timoor, ni nfatan, kitork aabimbiln paab na. Bi nan yoor tiwan ni bi joo toor karyaa mam na, ni ŋisambil ŋi bi joo teŋni kitork aasin na, ni ŋisambil ŋi bi joo seer tulalee aayon na, ni tikumann aawan ni mɔmɔk bi joo tun lituln Uwumbɔr Aadichal ni na.

¹⁹ Bi nan yoor tiwan ni mɔmɔk bi di salmaa ni tikunabr naan ni na: bi nan yoor nsambim, ni ŋisambil ŋi bi joo moor mmii na, ni ŋisambil ŋi bi joo teŋni kitork aasin na, ni nfatan aasambil, ni karyaa mam aah tɔŋni tiwan ni pu na, ni ŋisambil ŋi bi joo seer tulalee aayon na, ni ŋisambil ŋi bi joo toor ndaan aatork na.

²⁰ Ubɔr Solomonn aah nan ŋa tikumann aawan ni bi joo tun Uwumbɔr Aadichal ni aatuln na: jaatɔlk mam bilee na, ni tɔroku mam, ni nkin sakpiin, ni inaaja kipiik ni ilee i pu mu si tɔk na, nan nyuun sakpen ke bi ŋaŋ naanyunyuun.

^21-22 Jaatɔlk mam bilee na nan naahn tɔb la: bimɔk aafɔfɔk nan ye ŋitaa moninko ni ŋilole, le baah filk pu na ye ŋitaa kipiik ni ŋiniin. Bi ponn ni nan ye nkuun la, le tikur ngbaan aah nan gbii pu na nan ye kiŋanbik kibaa aafɔfɔk. Bi nan di tikumann naan tiwan nibaa tɔŋ jaatɔlk mɔk paab, le naafɔfɔk nan ye ŋitaa ŋilole ni ligeln, ki naan ŋisubinyaan mann goln ni. Bi nan di tikumann le naan ŋi mu.

²³ Jaatɔlk mɔk pu aasubinaankee ngbaan nan ye nkub la, le aa yaa si kitiŋ kan, aa waa imonko inaa ni kipiik ni ŋiloob.

Baah di Juda aanib buen Babiloŋ aatiŋ ni pu na

²⁴ Babiloŋ aajab aayidaan Nebusaradann nan ki chuu Utotoorninkpel Seraya, ni utotoor u paa u pu aan bi yin u ke Sefania na, ni Uwumbɔr Aadichal ni aanikpaam bitaa tinaagbiir buen Babiloŋ ni.

²⁵ U nan ki chur kitiŋ ngbaan ponn ni Juda aajab aayidaan, ni ubɔr aasusurb bilole bi nan beenin bi ki ponn ni na, ni uja u paa bijab aayidaan pu ki nan joo baagbann na, ni binikpaam imonko itaa bibaa mu.

²⁶ Nebusaradann nan di bi buen Babiloŋ aabɔr u nan bi Ribla aatiŋ

²⁷ ki bi Hamaf aapepel ni na chee. Nima chee le ubɔr ngbaan nan ti saan bi ki ku bi. Kina le bi nan di Juda aanib buen tinaagbiir ni.

²⁸ Nebukadnesar aah nan chur binib bi tinaagbiir na aakahm sɔ: Waanaan yoonn aabilolole ni, u nan chur binib ŋichur ŋitaa ni moninko ni bitaa la,

²⁹ le waabin kipiik ni lininiin ponn ni, u chur binib ikui iniin ni piitaa ni bilee Jerusalem ni,

³⁰ le waabin moninko ni litatar ni, Nebusaradann chur binib ikui ilole ni imonko ilee ni biŋmu. Bi mɔmɔk yaa di kpaan kan, bi ye binib ŋichur ŋinaa ni binib ikui iloob le bi nan di buen.

³¹ Libiln li ponn ni Efil Merodak nan jin Babiloŋ aanaan na, u nan san Juda Aabɔr Jehoyachinn kinimbaak ki nyan u kiyondiik ni. Nimina nan ŋa baah nan chuu Jehoyachinn buen tinaagbiir ni pu na aabin piitaa ni lilolole aaŋmapiik ni ilee aawiin moninko ni iŋmu daal la.

³² Efil Merodak nan san u kinimbaak ki tii u nsisii mu kpa kipak ki jer bibɔrb bi mu nan bi Babiloŋ ni tinaagbiir ni na.

³³ Kina pu na, Jehoyachinn nan kan nsan ki kpeln waayondiik ni aawanpeenkaan, ki gur ji ubɔr chee tijikaar le ki ti kpo.

³⁴ Waah nan bi limɔfal ni n‑yoonn mumɔk na, bi nan luu u iwiin mɔmɔk aajikaar le ki ti saa waakundaal.