Jeremia 51 - Uwumbɔr aagbaŋ

Uwumbɔr aah ki ga ji Babiloŋ aatiŋ tibɔr ti ki kpee na

¹ Uwumbɔr len ke, “M ban m cha libuln li bii tiwan na le daa Babiloŋ aatiŋ ni kaanib pu.

² M ga tun ni biwɔwɔm le bi nan bii Babiloŋ ke libuln li daar timoor cha na. Libiil aawiin daal yaa fuu ni kan, bi ga tak ki ŋipepel mɔmɔk pu la, le ki cha ki doon nkuun.

³ Taa tii baajab nsan bi too baapiin, ki taa tii bi nsan ke bi peen baajaak aabɔkul. Ku binachipɔm man. Kuln baajab mɔmɔk.

⁴ Bi ga kan titotonn le ki kpoi baatim ponn ni.

⁵ Hali Israel ni Juda yaab aah tun mi Israel yaab Aawumbɔr u bi Chain na titunwanbir na, min Bidindaan Uwumbɔr Mpɔɔnsakpiindaan aa yii bi.

⁶ San nya Babiloŋ ni man. Li san ban nibaa man. Taa cha bi ku nimi Babiloŋ aanib aatunwanbir pu. M bi teeni le ki dar bitafal naah ŋeer bi pu na.

⁷ Babiloŋ nan bi ke salmaa aayikuuk na le ŋŋaal ni, ki cha dulnyaa wee mɔmɔk nyun ki ponn ni ki ti gbii. Ŋitimbol nan nyun ki ponn ni aadaan le kaa ki kpa nlan.

⁸ Babiloŋ kpaan lir libuul ngbaan ni le ki kuln. Wii kaakpuul man. Ban nnyɔk ki nan ŋa kaabuun ni, nibaakan, i ga yann.

⁹ Biwɔwɔm bi koo nima na bui ke, ‘Ti nan pɔɔn tibaa ke ti ter Babiloŋ yaab, tɔ, n‑yoonn mu nan jer. Cha ti di cha bi ki gir kun man. Uwumbɔr di waapɔɔn mɔmɔk le daa Babiloŋ aatafal le ki kuln ki kookoo.’”

¹⁰ Uwumbɔr ki len ke, “Maanib, teen man ke, ‘Uwumbɔr mɔk ke timi aabɔr ŋan. Cha ti buen Jerusalem man ki ti bui binib ngbaan Tidindaan Uwumbɔr aah tun pu na.’”

¹¹ Uwumbɔr aah ban u kuln Babiloŋ aatiŋ na, le u ti saa Media aabɔrb. Waah ga leŋ lipɔln Waadichal pu pu na le na. Bijab bi bi tak ki na aayidam teen ke, “Luun nimi aapiin man. Gor nimi aajaak aapen man.

¹² Tii limɔkl ke ni ban ni ti tak Babiloŋ aagon la. Moo ban bijab kiir man. Kaan bikikiib. Ban bijab bi ga ti loon na man.” Uwumbɔr ŋa Babiloŋ aanib waah len ke u ga ŋa bi pu na.

¹³ Kitiŋ ngbaan kpa ŋimɔɔ ni liwangol sakpen, tɔ, kaayoonn mu fuu a, le kaamɔfal doo.

¹⁴ Uwumbɔr Mpɔɔnsakpiindaan puu ubaa aamɔfal pu ke u ga cha bijab bi wiir ke itoon na nan tak Babiloŋ, ki ga nyaŋ ki, ki teen mpɔɔn pu.

Nlahn mu pak Uwumbɔr na

¹⁵ Uwumbɔr di waapɔɔn le naan kitiŋ kee, waalan le u di naan dulnyaa le ki daa taln kitaapaak.

¹⁶ Uma le len, le nnyun mu bi kitaapaak na ŋuuni; u cha ntaalangbam nyani kitiŋ aanaanmɔk ki choo. Utaal yaa nu kan, u cha u moor, le ki nyani libuln waah di li siin nin chee na.

¹⁷ Unibɔn yaa kan kina kan, le u bee ke u ye ulatiir la, kaa kpa nlan; binib bi naani ŋiwaa ŋi kaa ye nibaa, kaa kpa limɔfal na jin inimɔɔn a.

¹⁸ Ŋaa kpa tinyoor le ki ŋan ke bi lik seen ŋi; Uwumbɔr yaa nan nyan sil ŋi pu kan, u ga kuln ŋi.

¹⁹ Uma Uwumbɔr u tiyaaja Jakob nan dii u na aa bi kina; uma le naan tiwan mɔmɔk, le ki lee Israel yaab ke bi li ye uma ubaa aanib. Waayimbil le ye ke Uwumbɔr Mpɔɔnsakpiindaan.

Uwumbɔr aagagaar

²⁰ Uwumbɔr len ke, “Babiloŋ, sin le ye maagagaar, sin le ye maajawan ti m joo to butɔb na. M joo sin le wiil ŋitimbol ni nnaan,

²¹ ki joo wɔi itaan ni bijab bi dik i pu na, ki joo wɔi itaan aatɔroku mam, ni binib bi ŋaal bi na,

²² ki joo ku bijab ni bipiib, ki joo ku bi por na, ni bi laa diin na, ki joo ku mbijabim ni mpiibim,

²³ ki joo ku bipihkpaab ni baapiih, ki joo ku binib bi joo itaan ko na, ni baataan, ki joo wɔi bitinjoob ni bininkpiib.”

Babiloŋ aatafadaan

²⁴ Uwumbɔr len ke, “Ni ga kan maah ga teen Babiloŋ ni kaanib baah tun Jerusalem titunwanbir ti na mɔmɔk.

²⁵ Babiloŋ, aa naahn lijool li bii dulnyaa wee mɔmɔk na la, le min Uwumbɔr le ye saadin. M ga chuu si, ki ber si bil kitiŋ, ki cha aa kpaln nfatan.

²⁶ Baan ki di saalangbentakpanjal libaa maa lidichal. Aa ga li gur bi ke nteersakpiin na le n‑yoonn mɔmɔk. Min Uwumbɔr le len kina.

²⁷ “Tii limɔkl ke bi ti tak. Pii ukpiin ki cha ŋitimbol ŋun. Gor ŋitimbol ngbaan ke ŋi ti to Babiloŋ butɔb. Bui Ararat, ni Minni, ni Askenas aanaan ni yaab ke bi ti tak. Ban uninkpel u ga loln bi pu nsan na. Cha itaan dan ke kitoonpaak na.

²⁸ Gor ŋitimbol ngbaan ke ŋi ti to Babiloŋ butɔb. Tun ti yin ni Media aabɔrb, ni baasalolm, ni baaninkpiib, ni ntim mumɔk bi joo na aajab.

²⁹ Uwumbɔr aah bi tun waatuln ke u ŋa Babiloŋ nteersakpiin, nin chee ubaa aa koo na, le kitiŋ dam ki jii.

³⁰ Babiloŋ aajab di cha kijaak le ki gaar baajawan aadir ni. Baa ki kpa lipobil, le ki gur bi ke bipiib na. Bidim gbaa wɔi kitiŋ ngbaan aabisamɔi aajaaleŋ mam, le ki see ŋidichal lii.

³¹ Ituun, ituun le san ti tuk Babiloŋ aabɔr ke bijab diir ŋipepel mɔmɔk le ki koo ni waatiŋ ponn ni.

³² Bidim gaa mmɔɔsan a, ki seer tidir ti fɔk ki pɔɔ na mmii lii. Babiloŋ aajab aapobil yuk.

³³ Naan yunn le baadim ga nyaŋ bi ki taa taa bi bil ke baah poi ŋikalmaan lipaal pu pu na. Min Uwumbɔr Mpɔɔnsakpiindaan, u ye Israel yaab Aawumbɔr na, le len kina.”

³⁴ Babiloŋ aabɔr nan gii gii Jerusalem le ki di ŋman. U nan chuu kpenn kitiŋ ngbaan chain ke libuul na la; u nan nab ki ke kipeewanbiik aah nae tiwan pu na la. U nan yoor waah gee ni na buen le ki di ni gur na mee.

³⁵ Cha Sionn aanib len ke, “Cha bi chuu Babiloŋ taani, taah kan titotonn ti na pu.” Cha Jerusalem aanib len ke, “Cha bi chuu Babiloŋ taani, taah jin falaa u na pu.”

Uwumbɔr ga ter Israel yaab

³⁶ Uwumbɔr nan bui Jerusalem aanib ke, “M ga gaa nimi aabɔr ki cha nimi aadim pa baah ŋa nimi pu na pu. M ga cha Babiloŋ yaab aanyun aah nyan ni nin chee na kuur, ki cha baamɔɔ foor.

³⁷ Kitiŋ ngbaan ga kpaln tilangbenn ti ponn ni ipeel ŋmeen koo na la. Nima chee ga li kpa unii mɔk ijawaan; ubaa aan li koo nima, le ijawaan ga chuu unii umɔk kan kina na.

³⁸ Babiloŋ yaab mɔmɔk wii ki ŋuuni ke ichinn ni yaabim na la.

³⁹ Bi ye bikumɔndam la aa? M ga ŋa njim tii bi ki cha bi nyu ti gbii ki li kpa mpopiin. Bi ga ti doon geen, le kaan ki fii.

⁴⁰ M ga cha bi kɔr bi ke ipihbi, ni iŋoob, ni ipihja na la. Min Uwumbɔr le len kina.”

Babiloŋ aah ga kan tibɔbir ti na

⁴¹ Uwumbɔr nan ki len Babiloŋ aabɔr ke, “Kitiŋ ki dulnyaa mɔmɔk nan pak ki na lir a. Babiloŋ gur ye ijawaan aawan le ŋitimbol chee.

⁴² Nnyunsakpem di mu aanyunkpenn ti pɔɔ na biin Babiloŋ pu.

⁴³ Kaatim gur ye ijawaan aawan la, le ki gur bi ke nteersakpiin mu kaa kpa nnyun na. Ubaa aa koo ki ni kaa chuun nima chee.

⁴⁴ M ga daa Babiloŋ aawaal Bel aatafal, ki cha li giin laah sun tiwan ni na mɔmɔk; ŋitimbol aan ki li dooni li.

⁴⁵ “Babiloŋ aagon lir a. Israel aanib, san nya nima chee man. Li san ban nimi aamɔfal maaŋuusakpeln chee man.

⁴⁶ Taa cha naah ŋun tibɔr ti na yɔl nitaakpab, ki taa san ijawaan. Libiln mɔk aabɔŋunkaan ngbaan bi tibaa la, mbimbin mu pɔɔ na aabɔr, ni ubɔr ubaa ni uken aajaak bi kitiŋ ngbaan pu la.

⁴⁷ Kina pu na, n‑yoonn choo, le m ga fii sil Babiloŋ aawaa pu. Kitiŋ ngbaan mɔmɔk ga ji inimɔɔn, le bi ga ku kaanib mɔmɔk.

⁴⁸ Buyoonn Babiloŋ nan koo binib bi ban bi kuln ki na aaŋaal ni na, le taab ni kitaapaak aawan mɔmɔk ga di mpopiin teen mpɔɔn pu.

⁴⁹ Babiloŋ cha dulnyaa wee mɔmɔk aanib kpo. Babiloŋ aah ku Israel aanib sakpen pu na, ki ga lir. Min Uwumbɔr le len kina.”

Uwumbɔr aah nan di inaŋ i tii Israel yaab bi koo Babiloŋ ni na

⁵⁰ Uwumbɔr nan bui waanib bi bi Babiloŋ ni na ke: “Ni nyan nkun a. Li cha man. Taa ki taan man. Nibaakan, ni ga li dak ke ni daa linampal, li lik min Uwumbɔr pu, ki teer Jerusalem bɔr.

⁵¹ Ni bui ke, ‘Bi jinn timi inimɔɔn a; le biwɔwɔm aah gaa ŋipepel ŋi bi chain Uwumbɔr Aadichal ni na, ti kan ke taa ki kpa nterm mubaa.’

⁵² Kina pu le m bui ke n‑yoonn choo, le m ga fii sil Babiloŋ aawaa pu, le binib bi kan titotonn na ga li ker idun kitiŋ ngbaan mɔmɔk pu.

⁵³ Babiloŋ yaa ga ŋmaa jon kitaapaak ki ti maa tidir ti fɔk ki pɔɔ sakpen na kan, m ga sil tun binib bi ti bii ti nima. Min Uwumbɔr le len kina.”

Uwumbɔr aah ki ga gir bii Babiloŋ pu kpee na

⁵⁴ Uwumbɔr bui ke, “Li pel man iwiil aafuuk pu Babiloŋ ni, li pel man libiil aakpowiil pu kitiŋ ngbaan pu.

⁵⁵ M ban m bii Babiloŋ la, le ki cha ki ŋmin chii. Bijab berni ke tinyunkpenn na la le ki tar ki tak ki.

⁵⁶ Bi dan ke bi nan kuln Babiloŋ la; bi nyaŋ kaajab ki chur bi, le ki kool baatɔi. M ye Uwumbɔr u daar unii u tun titunwanbir na aatafal la, le ki ga ŋa Babiloŋ tiwan ni ŋeer ki na.

⁵⁷ M ga cha kaajojoob ni bijab bi kpa nlan, ni bisalolm, ni baajab nyu ki ti gbii. Bi ga ti doon geen le kaan ki fii kpala. Min, Ubɔr ngbaan le len kina, min le ye Uwumbɔr Mpɔɔnsakpiindaan.

⁵⁸ Babiloŋ, mpɔɔn aatiŋ na aagon lir kitiŋ a, le kaabisamɔi aajaaleŋ mam na gaa mmii. Ŋitimbol aatuln na ye fam la; ŋaapɔɔn mɔmɔk gaa mmii a. Min Uwumbɔr Mpɔɔnsakpiindaan na le len kina.”

Jeremia aanaŋ aah buen Babiloŋ pu na

⁵⁹ Ubɔr Sedekia aaninkpel le nan ye Seraya. Seraya aate nan ye Neria, le uyaaja ye Mahseya. Sedekia aah nan ye Juda aabɔr pu na aabinanar ponn ni, le u nan cha Babiloŋ le Seraya dii u. Le m nan di tibɔr tibaa tii u.

⁶⁰ M nan ŋmee kigbaŋ ponn ni libiil li mɔmɔk ga dan Babiloŋ pu na, ni Babiloŋ aabɔr tiken.

⁶¹ M nan bui Seraya ke, “Aa yaa buen Babiloŋ ni kan, aa teer ki karn tiwan ni mɔmɔk bi do na mpɔɔn pu tii binib ngbaan.

⁶² Nee aapuwɔb na, mee limeel ke, ‘Uwumbɔr, aa bui ke aa ga bii do, le tiwanfuurkaan, binib ni tiwakor nibaa aan ki li bi ki pu, le ki ga li bi ke nteersakpiin na ki ti saa n‑yoonn mu kaa kpa ndoon na.’

⁶³ Seraya, aa yaa ti karn kigbaŋ kee doo kan, aa di ki gbin litakpal pu ki di li mee ŋa Yufrates Aamɔɔl ni,

⁶⁴ ki bui ke, ‘Kina le bi ga ŋa Babiloŋ, Uwumbɔr aah ban u joo ni libiil li ki pu na, ki ga muin, kaan ki puur ni kpala.’” Jeremia aamɔbon nan doo do la.