Jeremia 50 - Uwumbɔr aagbaŋ

Baah ga nyaŋ Babiloŋ aatiŋ pu na

¹ Uwumbɔr aah nan di Babiloŋ aatiŋ ni kaanib aabɔr ti tuk mi na sɔ:

² “Bui ŋitimbol tibɔchann ngbaan. Moon ti. Tii limɔkl ki moon tibɔchann ngbaan. Taa di ti bɔr. Babiloŋ lir a. Kaawaal li bi yin li ke Maduk na wii yuk yuk a. Babiloŋ aawaa jin inimɔɔn a, kaawaa ŋi sukr ponn ni na wiil a.

³ “Litimbol li nyan ni ŋŋangan wɔb na dan ke li nan tak Babiloŋ, le ki ga ŋa ki nteersakpiin. Binib ni tiwakor ga san, le ubaa aan ki li koo nima.”

Israel yaab aah ga gir ni pu na

⁴ Uwumbɔr nan bui ke, “N‑yoonn ngbaan yaa nan fuu ni kan, Israel ni Juda aanib mɔmɔk ga wii ban mi, Baawumbɔr.

⁵ Bi ga baa Sionn aasan pu le ki di toŋ nima wɔb. Bi ga puu tipuukpaan ti kaa kpa ndoon na tii mi, kaan bii ti.

⁶ “Maanib bi ke ipiih i aapihkpaal cha i wɔŋ ŋijoo ponn ni na la. Bi chuun yenni ki nya lijool libaa paab ki ti saa liken paab, le ki suln bido aah ye nin wɔb na.

⁷ Unii umɔk kan bi na kan, u tak bi la. Baadim len le ke, ‘Bi tun Uwumbɔr le titunwanbir, kina pu na, taah ŋa bi pu na aa bir. Biyaajatiib nan kii tii Uwumbɔr, bi mu ba ga li bi u chee kina.’

⁸ “Israel aanib, san nya Babiloŋ ni man. Nya kitiŋ ngbaan ni man. Li ye njan aanib bi ga puen nya na man.

⁹ M ban m ti saa ŋitimbol ŋibaa ŋŋangan wɔb le ki cha ŋi ti tak Babiloŋ. Bi ga lul butɔb ki nyaŋ Babiloŋ. Bi ye bikpam bi nyi kikpaŋ aabɔr na la, bi yaa too ipiin kan, baa lanni.

¹⁰ Bi ga gaa Babiloŋ aawangol, le binib bi ga gaa li na ga yoor tiwan ni mɔmɔk bi gee na. Min Uwumbɔr le len kina.”

Babiloŋ aatiŋ aah lir pu na

¹¹ Uwumbɔr len ke, “Babiloŋ aanib, ni nan gaa maatimbol aawangol butɔb ni. Ni kpa mpopiin le ki mɔɔni, le ki chuun ke unaa u bi taa gbaar ŋikalmaan, ni utaan u bi wii na,

¹² le saatikpaan na ga ji inimɔɔn ki kpaln tilaar aawan. Babiloŋ le ga li gur ye kitiŋ ki kaa kpa liyimbil ŋitimbol mɔmɔk ni na: ki ga kpaln nteersakpiin mu kuun kaa kpa nnyun na.

¹³ Maaŋuul pu le ubaa aan ki li koo Babiloŋ ni; ki ga gur tilangbenn la, le unii umɔk jer nima na, ni ga ŋa u lijinjiir ni iwaan.

¹⁴ “Bitɔndam, lul goln Babiloŋ butɔb man. Too Babiloŋ nimi aapiin mɔmɔk, ba pu? ki tun min Uwumbɔr titunwanbir.

¹⁵ Faa butɔb aakuun ki mann Babiloŋ aatiŋ. Babiloŋ aatiŋ di kibaa tii a. Bidim wiil kaagon ki koo ki ponn ni a. M bi teeni Babiloŋ la. Kina pu na, ni mu teen bi, ki ŋa bi ke baah nan ŋa biken pu na.

¹⁶ Taa cha bi bu lijikaabil, ki taa chee lijikaabol, kitiŋ ngbaan ni. Uchaan umɔk bi ki ponn ni na ga san bidim aah bi tak ki pu na ijawaan, le ki gir kun.”

Israel yaab aah ga gir ni pu na

¹⁷ Uwumbɔr ki len ke, “Israel aanib bi ke ipiih i ichinn jenn yaa i na la. Njan na, Asiria aabɔrkpaan le nan puen tak bi, le Babiloŋ Aabɔr Nebukadnesar nan nyir baakpab.

¹⁸ Nima pu le min, Uwumbɔr Mpɔɔnsakpiindaan, u ye Israel yaab Aawumbɔr na, ga daa Ubɔr Nebukadnesar ni waatiŋ aatafal, ke maah nan daa Asiria aabɔrkpaan aatafal pu na.

¹⁹ M ga giin Israel aanib baatiŋ pu. Bi ga ji tijikaar ti bi bun Kamel Aajool pu, ni Basann aapepel ni na, le ki ga ji tijikaar ti mɔmɔk bi ban na, Efraim ni Gilead aapepel ni.

²⁰ N‑yoonn ngbaan yaa nan fuu ni kan, titunwanbir tibaa aan ki li bi Israel ni, le mbiin mu aan ki li bi Juda ni, ba pu? m ga di cha pinn binib bi m cha bi ŋmar na. Min Uwumbɔr le len kina.”

Uwumbɔr aah ga ji Babiloŋ aatiŋ tibɔr pu na

²¹ Uwumbɔr len ke, “Tak Merataim ni Pekod aatim aanib man. Ku bi ki kuln bi mɔmɔk. Ŋa man maah bui nimi ke ni ŋa pu na mɔmɔk. Min Uwumbɔr le len kina.

²² Bi ŋun butɔb aafuuk pu kitiŋ ngbaan pu, le libiil sakpeln bi.

²³ Babiloŋ nan di ugagaar gbaa wɔi dulnyaa wee mɔmɔk, le ugagaar ngbaan kool doo. Ŋitimbol mɔmɔk yaa kan tiwan ni ŋa kitiŋ ngbaan na kan, ijawaan ga chuu ŋi.

²⁴ Babiloŋ, aa nan jan mi kijaak, le maah nan di gaawɔb u pen si aan saa nyi u bɔr na chuu si.

²⁵ M chuu piir maajawan aah bi nin chee na, le maaŋuul ponn ni m yoor ti, ba pu? min Dindaan Uwumbɔr Mpɔɔnsakpiindaan kpa lituln Babiloŋ aatiŋ ni m tun.

²⁶ Tak ki ŋipepel mɔmɔk. Kuun naah gaa kaawangol li na paan tɔb pu ke njikaabim na. Kuln kitiŋ ngbaan man. Taa di cha tiwan nibaa kina.

²⁷ Ku baajab mɔmɔk. Kɔr bi man. Babiloŋ aanib aadoon fuu ni a. Baatafadaan aayoonn fuu ni a.”

²⁸ Tɔ, bikusam nan san nyan ni Babiloŋ ki dan Jerusalem, ki nan len Tidindaan Uwumbɔr aah teen Babiloŋ yaab baah nan tun Waadichal pu pu na.

²⁹ “Bui binib bi too itɔi na ke bi tak Babiloŋ aatiŋ. Cha umɔk nyi butɔm ni mpiin aatoom na buen. Gob man kitiŋ ngbaan ki taa cha ubaa ŋmar. Kaah nan di kigaak mɔk min, Israel yaab Aawumbɔr u bi chain na pu na, teen ki kaah nan tun pu na mɔmɔk, ki ŋa ki ke kaah nan ŋani ntim muken pu na.

³⁰ Liyaadaal ngbaan le kaanachipɔm ga kpoi ki ponn ni, le kaajab mɔmɔk ga kuln. Min Uwumbɔr le len kina.

³¹ “Babiloŋ, aa kpa kigaak sakpen a, kina pu le min, Dindaan Uwumbɔr Mpɔɔnsakpiindaan nyan sil aa pu. N‑yoonn fuu ni ke m daa aatafal.

³² Saatimbol li kpa kigaak na ga gbeer ki lir, le ubaa aan ter si aa ki fii sil. M ga see saatim mmii, le tiwan nimɔk bi duun mu na ga bii doo.”

³³ Uwumbɔr Mpɔɔnsakpiindaan len ke, “Bi muk Israel ni Juda aanib la. Binib bi mɔmɔk nyaŋ bi, ki chur bi na kii bi gbingbin, kaan cha bi nya biŋaal ni.

³⁴ Le u ga gaa bi lii na kpa mpɔɔn, waayimbil le ye Uwumbɔr Mpɔɔnsakpiindaan. Uma ubaa le ga gaa baabɔr, ki cha nsuudoon dan kitiŋ kee pu, le Babiloŋ aanib ma kpa tibɔbir.”

³⁵ Uwumbɔr len ke, “Nkun li bi Babiloŋ aatiŋ aanib, ni kaayidam, ni bilandam pu.

³⁶ Nkun li bi bibɔnabr bi ye binyamɔndam na pu, bi ye bijɔrb la. Nkun li bi kaajab pu, ijawaan chuu bi a.

³⁷ Kuln kaataan ni yaatɔroku mam. Nkun li bi kaajab bi bi ti pan bi ŋimombil ke bi nan jan tii bi na pu. Baa ki kpa mpɔɔn. Bii kaawangol, gaa ni ki yoor ni mpɔɔn.

³⁸ Cha nweel dan kaatiŋ pu, ki foor kaamɔɔ. Babiloŋ ye kitiŋ ki kpa ijawaan aawaa na la, ŋima le ŋmann binib ngbaan.

³⁹ “Kina pu na, tiyayaar ni bipɔnib bi bir na, ni inyoon i kaa ŋan na, le chuun dii Babiloŋ. Binib aan ki koo nima daalbaadaal, ki ti saa n‑yoonn mu choo na mɔmɔk.

⁴⁰ Maah nan kuln Sodom ni Gomora aatim, ni ntim mu bi gbɔk mu na pu na, kina le m ga ŋa Babiloŋ mu. Ubaa aan ki koo nima daalbaadaal. Min Uwumbɔr le len kina.

⁴¹ Binib nyan ni ŋŋangan wɔb aatiŋ kibaa ni ki choo, ki ye litimbokpaan libaa le ki bi dandar; bibɔrb pam le bi gor kiir butɔb.

⁴² Bi yoor baatɔi ni baajaak aajum; bi kpa mbiin, kaa san kinimbaak. Bi yaa jak baataan kan, yaafuuk naahn nnyusakpem aafuuk la. Bi gor ki ban bi to Babiloŋ butɔb la.

⁴³ Babiloŋ aabɔr aah ŋun tibɔr ngbaan na, uwon yɔl le uŋaal gur jɔn kaakaan. Ijawaan sakpiin chuu u, le ki wu ke upii aamalween na.

⁴⁴ “Min Uwumbɔr ga dan ki nan cha Babiloŋ yaab san libuul ni, ki nyan baatiŋ ni, ke uchinn aah nyan ni kichook ni, ki di bɔ dii Jɔɔdann aagbaan pu, ki nan nya timosɔnn ni pu na la. Maah ga lee usaloln u na le ga li joo litimbol ngbaan. M ni ubaa aa ŋak. Ubaa aan kaa ke u kpak mi. Utinjoor ubaa aan ŋmaa kpak mi.

⁴⁵ Kina pu na, li pel maah kpokl Babiloŋ aatiŋ pu nkpokl mu na, ni maah ban ke m ŋa kaanib pu na. Bidim ga kpaan dar baabim mu buen, le ni ga chuu unii mɔmɔk ijawaan.

⁴⁶ Babiloŋ yaa nan lir kan, kifuuk ki ga nya na ga cha kitiŋ dam, le ŋitimbol ŋiken ga ŋun kaalirm aawiil.”