Jeremia 5 - Uwumbɔr aagbaŋ

Jerusalem aanib aatunwanbir

¹ Jerusalem aanib, san dii nimi aatiŋ ponn ni man. Lik lik man. Cha nimi nibaa aanimbil kan. Lik lik kinyaŋ ponn ni man. Ni ŋmaa kan unii ubaa aan u tun ni ŋan na ki pɔɔni ubaa ke u kii Uwumbɔr aamɔb aa? Ni yaa ga kan kina aanii kan, Uwumbɔr ga di cha Jerusalem yaab aatunwanbir pinn bi.

² Ni bui ke ni dooni Uwumbɔr la, le nisui aa joo kina.

³ Mbamɔn, Uwumbɔr sil lik ban mbimbinyaan la. U nan faa nimi, le naa sɔŋ nisui; u nan taa taa ni pu, le ni yii kaa bae. Ni nan kpa tafalaaŋun, kaa di cha titunwanbir aatuln.

⁴ Le m nan dak ke, “Binib bee ye bigiim ni maanyidam la. Bi tun kijɔrk aatuln la; baa nyi Baawumbɔr aah gee pu na, baa nyi Uwumbɔr aah ban bi tun pu na.

⁵ M ga buen binib bi bi mpɔɔn ni na chee le ti ti gbaa tibɔr. Nibaakan, bima ga li nyi Baawumbɔr aah gee pu na, bima ga li nyi Uwumbɔr aah ban ke bi ŋa pu na.” Le bi mu mɔmɔk yii Uwumbɔr aamɔb ki nyan upuwɔb.

⁶ Nima pu le ichinn ga nya ni kichook ni ki nan ku bi; le takɔ mam ga nya ni nteersakpiin ni ki nan daa par par bi, le inaamuun ga li chuun tee mban baatim ponn ni. Binib ngbaan yaa nyan lipaal kan, i ga daa par par bi; ba pu? baatunwanbir wiir sakpen a, le bi fenn bipuwɔb tii Uwumbɔr n‑yoonn mɔmɔk.

⁷ Le Uwumbɔr baa ke, “Ni ga ŋa kinye aan m di maanib aatunwanbir cha pinn bi? Bi yii mi ki siir cha mi, le ki dooni ŋiwaa. M kpiin maanib le bi jin ti bab, le ki tee fii ti tun kidagook aatuln le ki chuun dii bipiib bi joo bibaa kooh na.

⁸ Bi nan bi ke itanja i bi kpiin i mbamɔm aan i ban i jon na la, bi mɔmɔk san ban tɔb aapuutiib la.

⁹ M taa daa bitafal nimina pu ki teen kina aatimbol aa?

¹⁰ M ga tun ni bidim le bi nan pir maanib aasubil aasui lir, ki taa tee kuln i kookoo. M ga bui bi ke bi pir isubon lir, ba pu? isubon ngbaan aa ye min yee.

¹¹ Israel ni Juda aanib nyan mpuwɔb la. Min Uwumbɔr le len kina.”

Uwumbɔr aah yii Israel yaab pu na

¹² Uwumbɔr aanib yii u ki bui ke, “Mbamɔn, waan sil ŋa nibaa. Tibɔbir aan dan ti pu; butɔb ni nkon aan lir ti pu.”

^13-14 Bi nan bui ke Uwumbɔr aabɔnabr na aa ye nibaa, bi po ye tiloor ti gbii libuln ŋmeen na, le kaa kpa Uwumbɔr aabɔr tibaa bi tuk bi. Le Tidindaan Uwumbɔr Mpɔɔnsakpiindaan bui mi ke, “Jeremia, binib bee aah len pu na pu, le m ga cha maabɔr li bi aamɔb ni ke mmii na. Le binib ngbaan ga li bi ke idɔ na, mmii ngbaan ga wu bi.”

¹⁵ Israel aanib, Uwumbɔr ban ke dandar aatimbol le dan nan tak nimi. Li ye n‑yaayoonn na aatimbol le ki pɔɔ, le naa nyi laaliin.

¹⁶ Laajab bi too itɔi na pɔɔ sakpen, le ki ku binib, kaa san kinimbaak.

¹⁷ Bi ga di nimi aajikaar ni njikaabim nab; bi ga ku nijapɔtiib ni nibisatiib. Bi ga nan kɔr nimi aawakor mɔmɔk, ki kuln nimi aasubil aasui mu. Baajab ga nan ber naah maa ŋigon kiir ntim mu ki mak mu pu na mɔmɔk.

¹⁸ Uwumbɔr ki len ke, “Hali n‑yoonn ngbaan kan, maan kuln maanib kookoo.

¹⁹ Bi yaa baa ke ba ŋa m tun kina mɔmɔk kan, sin Jeremia, bui bi ke baah fenn bipuwɔb tii mi ki dooni ŋiwaa bibaa aatiŋ pu na, kina le bi ga ti tun lituln tii biwɔwɔm kitiŋ ki kaa ye bibaa aatiŋ na pu.”

Uwumbɔr aah sak waanib pu na

²⁰ Uwumbɔr nan ki bui ke, “Bui Jakob aayaabitiib, Juda aanib ke:

²¹ Li pel man, nimi bijɔrb ni bilatiirb bi kpa ŋinimbil kaa waa na, ki kpa ŋitafal kaa ŋun na.

²² Min le ye Uwumbɔr; ba ŋa naa san mi? Ba ŋa naa jii nnimbiin ni? M di litambol le bil kiir nnyusakpem, ke mu aanaanmɔk le na n‑yoonn mɔmɔk. Nnyusakpem aanyun ga fii too paacham, mu mu aan ŋmaa jer mu aanaanmɔk, le tinyunkpenn ga ŋmaa fii ti lir ni kifuuk, ti mu aan ŋmaa jer buen nibaa.

²³ Le nimi ma kan, ni kpa tafalaaŋun kaa si mpuwɔb, ni paar le ki siir cha mi.

²⁴ Naa ŋa nlandak daalbaadaal ke ni nyuŋ mi, hali maah tii nimi useetaal ni utakuutaal mɔmɔk pu, ki tii nimi lijikaacheel aayoonn pu libiln mɔmɔk na, naa nyuŋni mi.

²⁵ Le nimi aatunwanbir cha nimina mɔmɔk nyan niŋaal ni.

²⁶ “Titunwanbirdam koo maanib chee, ki doo kiir ke bijab bi di gaawɔb mam pen tinann na, le bima pen gaawɔb mam bi chur binib na.

²⁷ Ukpan aah chur inyoon gbiini waalook ni pu na, kina le bi di tiwan ni bi chur binib ki gaal mpɔɔn na gbiin baadichal ni. Nima pu le bi kpa mpɔɔn ni liwangol kina,

²⁸ le ki ji babr ki filk. Baatunwanbir aa kpa taadoon. Baa joo nkpobim ni bigiim aabamɔn tii bi.

²⁹ “Le min Uwumbɔr ga daa bitafal tiwan nee mɔmɔk pu; m ga teen litimbol ngbaan.

³⁰ Ijawaan ni lijinjiir aawan ŋa kitiŋ ngbaan pu;

³¹ maabɔnabtiib geei inyamɔn ŋmeen la; le bitotoorb di bibaa aapɔɔn le joo binib, le maanib gee kina la. Tɔ, nimina mɔmɔk ti doo kan, bi ga ŋa kinye?”