Jeremia 49 - Uwumbɔr aagbaŋ

Uwumbɔr aah ga ji Amonn aatiŋ tibɔr pu na sɔ

¹ Uwumbɔr aah nan len Amonn aatiŋ aabɔr ti na sɔ: “Israel aajab bi la chee? Ubaa aa bi ki kiir baatiŋ aa? Ba ŋa bi cha Amonn aanib bi dii liwaal Milkom na gaa Gad aanibol aapepel ki kal nima?

² Tɔ, n‑yoonn choo, le m ga cha Amonn aatiyil Raba aanib ŋun butɔb aafuuk pu, le ki gur tilangbenn, kaatiwaatiir wu mmii. Le Israel yaab ga ki gaa baatiŋ ki bi nan gaa ki na bi chee.

³ Hesbonn aanib, li wii man. Ai aatiŋ kuln a. Raba aapiib, li wii ikpowiil man. Di tiwanpeenkaan ni saak kuub na ki di peen ki li wii. Li san gonni man. Bi ga yoor nimi aawaal Milkom buen tinaagbiir ni, ki kpaan yoor laatotoorb ni laawaadabim mu.

⁴ Ba ŋa nimi binib bi kaa dii Uwumbɔr na kpa kipupuk? Nimi aapɔɔn bi door la. Ba ŋa ni kpa nibaa aapɔɔn pu naadii ki len ke ubaa aan kaa ki tak nimi?

⁵ M ga cha ijawaan nya ŋipepel mɔmɔk ki chuu nimi. Ni mɔmɔk ga san. Unii mɔk ga li san ban ubaa la, le ubaa aan li bi ki ki kuun nimi aajab.

⁶ “Tɔ, m ga nan ki cha Amonn aanib kan nkam. Min Uwumbɔr le len kina.”

Uwumbɔr aah ga ji Edom aatiŋ tibɔr pu na

⁷ Uwumbɔr Mpɔɔnsakpiindaan aah nan len Edom aatiŋ aabɔr ti na sɔ: “Edom aanib aa ki nyi nibaa la aa? Baasusurb aa ki nyi baah ga tuk bi ke bi ŋa pu na la aa? Baalan mɔmɔk wɔŋ la aa?

⁸ Dedann aanib, fenn ki li san man. Bɔr man. M ban m kuln Esɔ aayaabitiib la, ba pu? n‑yoonn le fuu ni ke m daa bitafal.

⁹ Binib yaa ker ŋisubil kan, ŋibaa gur la; binaayukb mu yaa dan kinyeek kan, bi yoor tiwan ni bi ban na baanja la.

¹⁰ Le m ma per Esɔ aayaabitiib pel pel ki per woln baabɔbɔryaan chee, ke bi taa ki ŋmaa bɔr. Edom aanib mɔmɔk kuln a. Bi ponn ni ubaa aa gur.

¹¹ Di nimi aakpobim tii mi man, le m ga li kpiini bi. M ga ŋmaa joo nimi aakpopiib mu.

¹² “Hali binib bi kaa ba ye ke m daa bitafal na yaa ti nyun ntafadaan aayikuuk ni kan, ni dak ke nimi le aan kan ntafadaan aa? Mbamɔn ni ga nyu kiyikuuk ngbaan ponn ni.

¹³ Min mbaa le puu ke Bosra aatiŋ ga kpaln ijawaan aawan ni nteersakpiin; binib ga li yuul ki, le ki joo kaayimbil puuni lir biken pu. Ntimbim mu bi gbɔk ki na ga kpaln tilangbenn ki ti saa n‑yoonn mu kaa kpa ndoon na. Min Uwumbɔr le len kina.”

¹⁴ Le m bui ke, “Edom aatiŋ, Uwumbɔr le di inaŋ tii ni mi. U tun ni ntuun ke mu nan bui ŋitimbol ke ŋi kuun ŋaajab, ki gor, ki ti tak si.

¹⁵ Uwumbɔr ga cha aa taa ki li kpa mpɔɔn, le ubaa aan ki li pak si.

¹⁶ Saagaak le ŋmann si. Ubaa aa san si ke saah dak ke bi san si pu na. Aa bi ŋijootakpal paab la, ki bi ŋijoo aapaachapaacham; tɔ, aa koo paachapaacham ke likaagiil na la, Uwumbɔr mu tee ga sunn si taab. Uwumbɔr le len kina.”

¹⁷ Uwumbɔr ki bui ke, “Tibɔbir ti ga dan Edom pu na ga li kpa ijawaan sakpen le unii umɔk jer nima na ga san ijawaan ki jek.

¹⁸ Tiwan ni nan ŋa Sodom ni Gomora aatim aan mu ni ntim mu nan bi gbɔk mu na kuln na, kina le ga ŋa Edom aatiŋ mu. Ubaa aan ki koo nima kpala. Min Uwumbɔr le len kina.

¹⁹ M ga dan ki nan cha Edom yaab san libuul ni ki nya baatiŋ ni, ke uchinn le aah nyan ni kichook ni ki di bɔ dii Jɔɔdann aagbaan pu ki nan nya timosɔnn ni pu na la, le maah lee usaloln u na ga li joo litimbol ngbaan. M ni ubaa aa ŋak. Ubaa aan ŋmaa kpak mi. Utinjoor ubaa aan ŋmaa kpak mi.

²⁰ Kina pu na, li pel maah kpokl Edom aanib pu nkpokl mu na, ni maah ban ke m ŋa Temann aatiŋ aanib pu na. Bi ga kpaan dar baabim mu buen, le kina chuu unii mɔmɔk ijawaan.

²¹ Edom yaa nan lir kan, kifuuk ki ga nya na ga cha kitiŋ dam, le kaalirm aawiil ga ti fuu Limɔɔkal Aanyusakpem chee.

²² Bidim ga boon ni ke likaagiil na le ki nan tak Bosra aatiŋ. Liyaadaal ngbaan kan, Edom aajab ga san ijawaan ke upii u imalween joo u na la.”

Uwumbɔr aah ga ji Damaskus aatiŋ tibɔr pu na

²³ Uwumbɔr aah nan len Damaskus aatiŋ aabɔr ti na sɔ: “Hamaf ni Apad aatim aanib aah ŋun tibɔbir ti na pu le ni tii bi ilandak ki muk bi. Ijawaan gbiin bi ki ti puu kpir ke nnyusakpem na la, le baa ŋmaa fuur.

²⁴ Damaskus aanib aawon yɔl le ijawaan cha bi san. Iween ni falaa joo bi ke imalween aah joo upii pu na la.

²⁵ Kitisakpeŋ ki ponn ni nan kpa mpopiin na gur dɔ nkuun la.

²⁶ Liyaadaal ngbaan kan, bi ga ku kaanachipɔm ki ponn ni, le kaajab mɔmɔk ga doo.

²⁷ M ga see Damaskus aatiŋ aagon mmii, ki see Ubɔr Ben‑Hadad aabɔrdichal lii. Min Uwumbɔr Mpɔɔnsakpiindaan le len kina.”

Uwumbɔr aah ga ji Kedar aanibol ni Hasor aatiŋ tibɔr pu na

²⁸ Uwumbɔr aah nan len Kedar aanibol, ni Hasor aah nan joo ŋipepel ŋi, aan Babiloŋ Aabɔr Nebukadnesar nan nyaŋ, ki gaa ŋi na aabɔr ti na sɔ: “Tak Kedar aanib ki kuln liwipuul wɔb aanibol ngbaan.

²⁹ Gaa baagban aaboo, ni baawakor, ni baaboo aakeken, ni tiwan ni mɔmɔk bi ŋiboo ngbaan ponn ni na man. Gaa man baalaakumii mam, ki bui binib ngbaan ke, ‘Ijawaan le mann goln nimi na.’

³⁰ “Hasor aanib, min Uwumbɔr le sur nimi ke ni san buen dandar ki ti bɔr. Babiloŋ Aabɔr Nebukadnesar kpokl ni pu a; waah len pu na sɔ:

³¹ ‘Dan man. Ti ga tak binib bi dak ke bi ŋmar, nibaa aan ŋa bi na. Baatiŋ aa kpa ibisamɔi i laŋni na, le ubaa aa kii ki.’

³² “Chur baalaakumii tiib ni tiwakor man. M ga cha binib bi chee biyigbeer pu aayikpir na yaa ni kookoo, ki ga cha tibɔbir nya ni ni kookoo ki nan pii bi.

³³ Hasor ga kpaln nteersakpiin le ki ti saa n‑yoonn mu kaa kpa ndoon na, ikakal ŋmeen le ga li koo nima. Ubaa aan ki koo nima daalbaadaal. Min Uwumbɔr le len kina.”

Uwumbɔr aah ga ji Elam aatiŋ tibɔr pu na

³⁴ Sedekia aah nan jin Juda aanaan pu na aapuwɔb, le Uwumbɔr Mpɔɔnsakpiindaan nan len Elam aatiŋ aabɔr m chee.

³⁵ U nan bui ke, “M ga ku bijab bi too itɔi ki cha Elam aatiŋ kan mpɔɔnsakpiin na mɔmɔk.

³⁶ M ga cha libuln nya ni ŋipepel mɔmɔk ki nan daa Elam pu, m ga cha kaanib yaa buen ni kookoo, ki ti saa buyoonn kaakusam ga li bi kitiŋ mɔmɔk ni na.

³⁷ M ga cha Elam aanib san baadim bi ban bi ku bi na ijawaan. Maaŋuusakpeln ponn ni le m ga kuln Elam aanib ki cha bijab dan nan lir bi pu ki ti saa buyoonn m ga ŋar bi mɔmɔk ŋŋaan na.

³⁸ M ga ku baabɔrb ni baasalolm, le ki di maabɔrjal siin nima.

³⁹ Puwɔb na, m ga nan ki cha Elam aanib kan nkam. Min Uwumbɔr le len kina.”