Jeremia 48 - Uwumbɔr aagbaŋ

Moab aah ga bii pu na

¹ Uwumbɔr Mpɔɔnsakpiindaan aah nan len Moab yaab aabɔr ti na sɔ: “Nebo aanib aatiŋ kuln a, san bi kinimbaak man. Bi nyaŋ Kiriataim aatiŋ a, bi wii kaadir ti pɔɔ ki fɔk na, le kaanib jin inimɔɔn.

² Moab aanyaan doo a. Bidim nyaŋ Hesbonn yaab a, le ki kpokl ke bi ti tak Moab aatimbol. Madmenn aatiŋ ponn ni ga ŋmin chii; bijab ga tak ki.

³ Horonaim yaab wii le ke, ‘Mbimbinpɔɔl. Libiil.’

⁴ Moab aatiŋ kuln a; li pel mbim aah wii pu na.

⁵ Li pel Luhif aasan pu, baah fai pu na ki li pel Horonaim aasan pu nsuugar aawiil.

⁶ Bi len le ke, ‘Mala, li san ban nimi aamɔfal man. Li san man ke nteersakpiin pu aabon u bi timoor ni na.’

⁷ Moab aatiŋ, aa nan mak saapɔɔn ni saawangol pu la, le dandana ma kan, aa ga lir; bi ga yoor saawaal Kemos ni laawaadabim, ni laatotoorb ki di buen.

⁸ Kitiŋ kibaa aan nya libiil ngbaan ni; tifatann, ni ni kaa ye tifatann na ga bii. Min Uwumbɔr le len kina.

⁹ Ban likaakul aatakpal bil Moab aatiŋ man; ki ga kuln dandana. Kaatim ga kpaln tilangbenn la, le ubaa aan ki li koo nima.”

¹⁰ Puun lii unii u kaa joo usui mɔmɔk tun Uwumbɔr aatuln na. Puun lii unii u kaa joo kijaak aajuk gaar ki ku na pu na.

Baah kuln Moab aatim pu na

¹¹ Uwumbɔr nan len ke, “Moab bi lifuur ni le kaa kee buen tinaagbiir ni. Moab bi ke ndaan mu bi cha mu si ke mu tiŋ, kaa kpenn mu lidabuul lee ni, ki di ŋa lidabuul liken ni na la. Mu aanunun aa kee bii, le mu aamɔɔn bi n‑yoonn mɔmɔk.

¹² “Tɔ, n‑yoonn choo le m ga tun binib bi ti kpenn Moab ke ndaan na. Bi ga kpenn kaadabuu ki wii ŋi yuk yuk.

¹³ Le Moab yaab ga lik baawaal Kemos fam, ke Israel yaab aah nan lik liwaal Betel, li bi nan di naadii tii li na fam pu na.

¹⁴ Moab aajab, ba ŋa ni bui ke ni ye bijab, le ki kaar butɔb ni?

¹⁵ Moab ni kaatim kuln a; kaanachipɔm bi ŋan sakpen na kpo a. Min le ye ubɔr, Uwumbɔr Mpɔɔnsakpiindaan le ki len kina.

¹⁶ Moab aadoon peeni a; kaadoon ga fuu ni dandana.

¹⁷ Nimi bi bi gbɔk litimbol ngbaan, ki nyi laah kpa liyimbil pu na, li wii ki pu man. Bui man ke, ‘Laapɔɔn mu li joo lik laanib na bii doo a; le laayimbil ni mpɔɔn aa ki bi.’

¹⁸ Nimi bi koo Dibonn aatiŋ ni na, sunn ni kinyuŋ aakakaa chee ki nan kal kitiŋ, titan ni man; unii u ban u bii Moab na fuu ni a, le ki ber kaadir ti fɔk ki pɔɔ ki kpa tijawan na lii.

¹⁹ Nimi bi koo Aroer aatiŋ ni na, li si kii isan chee man; baa binib bi san na, ki bee tiwan ni ŋa na.

²⁰ Bi ga gar ke, ‘Moab aatiŋ lir a, ki jin inimɔɔn a; li wii ki pu man. Moon Anonn Aamɔɔgban ke Moab aatiŋ ber a.’

²¹ “Libɔjil fuu ni ŋijoo ŋi aapaacham bi taar na aatim pu: li fuu ni Holonn, ni Jasa, ni Mefaf,

²² ni Dibonn, ni Nebo, ni Bef Diblataim,

²³ ni Kiriataim, ni Bef‑gamul, ni Bef‑meonn,

²⁴ ni Keriof, ni Bosra aatim pu. Libɔjil fuu ni Moab aatim mɔmɔk mu bi ni daa na, ni mu bi duun na pu a.

²⁵ Moab aapɔɔn bii a; kaapɔɔn kuln a. Min Uwumbɔr le len kina.”

Baah ga sunn Moab taab pu na

²⁶ Uwumbɔr bui ke, “Moab aatiŋ aah nyan mpuwɔb pu na, cha ki gbii ndaan. Moab aatiŋ ga biln kibaa aawuln ponn ni la, le binib ga laa.

²⁷ Moab, teer saah nan yuul Israel aanib pu na. Aa nan ŋani bi ke baah ye binaayukb le bi chuu bi na.

²⁸ “Nimi binib bi koo Moab aatiŋ ponn ni na, nya nimi aatim ni man. Ti li koo ŋijoo aatakpasakpiin ponn ni man. Li bi man ke linanjel li ter laadir kifataŋ ki nyoo na aamɔgben pu na.

²⁹ Moab aatiŋ aanib kpa kigaak pam. M ŋun Moab aanib aah kpa kigaak, ni inimpoo, kaah lik faar ubaa, ki tee lik pak bibaa pu na.

³⁰ Min Uwumbɔr nyi baagaak bɔr. Baapupuk ye fam la, le baah tun ŋitun ŋi na aan yunn.

³¹ Kina pu le m ga wii Moab aatiŋ, ni Kir Heres aatiŋ aanib mɔmɔk pu.

³² M ga wii Sibma aanib pu, ki jer maah ga wii Jaser aanib pu pu na. Sibma aatiŋ, aa bi ke ŋisubil aasub bu aabon taln ki ti puur N‑yaan Aanyusakpem ki ti saa Jaser na la. Le saasubil ŋi puir na bii a.

³³ Mmɔɔn ni mpopiin doo Moab aatiŋ ki kpa tijikaar sakpen na pu. M cha ndaan doo baah ŋaa ndaan nin chee na; ubaa aa ki bi ke u ŋaa ndaan ki faa mpopiin aafuuk.

³⁴ “Hesbonn ni Eleale aanib wii la, le baawiil di ti fuu Jahas aatiŋ ni; Soar aanib ŋun i pu la; le Horonaim, ni Eglaf Selisiya aanib mu ti ŋun i pu. Hali Nimrim aabukpiik na aanyun foor a.

³⁵ Maan ki cha Moab aanib see kitork mmii ni, baah dooni baawaa nin chee na, ki taa ki toor kitork tii ŋi. Min Uwumbɔr le len kina.

³⁶ “Kina pu le m wii Moab, ni Kir Heres aanib pu, ke unii u joo kulufeeŋ gaa ikpolahn na, ba pu? bi lann baawangol mɔmɔk a.

³⁷ Bi mɔmɔk kuu biyikpir ni bilangban lii. Bi di njum geei ki daan biŋaal, le bi mɔmɔk pee tiwanpeenkaan ni saak kuub na.

³⁸ Ikpowiil le bi Moab aadichapaab ni baakakaa mɔmɔk chee, ba pu? m wii Moab ke libuul li ubaa aa neen li na la.

³⁹ Moab bii doo a. Li wii man. Moab jin inimɔɔn a. Ki ber doo, le ŋitimbol ŋi mann goln ki na yuul ki. Min Uwumbɔr le len kina.”

Moab aan san ŋmar

⁴⁰ Uwumbɔr puu ke litimbol ga boon ni nan pee Moab ke likaagiil na,

⁴¹ le ki nyaŋ kaatim, ni ntim mu bi maa ŋigon gob mu na. Liyaadaal ngbaan kan, Moab aajab ga san ijawaan ke imalween aah joo upii u na.

⁴² Moab aatiŋ aah yii mi pu na, ki ga kuln kaan ki li ye litimbol.

⁴³ Ijawaan, ni ŋibugen, ni gaawɔb mam le dɔ kii Moab aanib. Uwumbɔr le len kina.

⁴⁴ Uwumbɔr aah siin n‑yoonn mu ke u kuln Moab na, unii umɔk pɔɔn ubaa ke u san ŋmar ijawaan chee na ga lir ŋibugen ni, le umɔk baar nyan ŋibugen ni na, gaawɔb mam le ga chuu u.

⁴⁵ Bikusam bi kaa kpa nterm na pɔɔni bibaa ke bi ti kan nterm Hesbonn aatiŋ ki Ubɔr Sihonn nan joo ki na ni, tɔ, ki mu gaa mmii a. Mmii wun Moab aanib bi gee butɔb sakpen na aanaanmɔk ni kaajoo paab.

⁴⁶ San Moab aanib kinimbaak man. Binib bi nan dii liwaal Kemos na kuln a, le bi chur bijapɔtiib ni bibisatiib buen tinaagbiir ni.

⁴⁷ N‑yoonn mu choo na, Uwumbɔr ga nan ki tii Moab nkam. Uwumbɔr aah len ke tiwan ni mɔmɔk ga ŋa Moab aatiŋ na le na.