Jeremia 47 - Uwumbɔr aagbaŋ

Uwumbɔr aah len Filistia yaab aabɔr pu na

¹ Waahr aan Ijipt aabɔr nin tak Gasa aatiŋ na, Uwumbɔr nan len Filistia yaab aabɔr m chee.

² U nan bui ke. “Lik man. Nnyun le fii ŋŋangan wɔb ki san ke limɔɔl le aa nyan nwam na. Mu ga biin kitiŋ ni tiwan ni mɔmɔk bi ki pu na, mu ga biin ntim ni binib bi koo mu ponn ni na pu. Binib ga wii ki ban nterm; kitiŋ kee pu aanii mɔmɔk ga wii pam.

³ Bi ga ŋun itaan aataagbendun pu, ki ŋun itaan aatɔroku aawiil pu, ki ŋun baafambann aah weeni pu na. Tetiib aan fenn ban baabim; biwon ga yɔl, le biŋaal gur jɔn kaakaan.

⁴ N‑yoonn fuu ni ke Filistia kuln, n‑yoonn fuu ni ke ki taa ki kan Taya ni Saidonn aaterm mu gur na. Min Uwumbɔr le ga kuln Filistia yaab, bi mɔmɔk nyan ni Krete aanyun aagbaan ni na.

⁵ Mpombiin sakpiin fuu ni Gasa aanib chee a, le Askelonn aanib ŋmin chii. Filistia yaab bi gur na ga wii ikpowiil ti saa bayoonn?

⁶ Ni wii ke, ‘Uwumbɔr aajaak aajuk, saan di cha timi ii? Gir koo saajufuuk ni, ki ti li bi nima ki fuur.’

⁷ Tɔ, maah tii ki lituln li na aah kaa doo na, ki ga ŋa kinye aan ki fuur? Tɔ, m bui ki ke ki tak Askelonn ni binib bi koo nnyusakpem aagbaan na la.”