Jeremia 46 - Uwumbɔr aagbaŋ

Baah nyaŋ Ijipt yaab Kakemis ni pu na

¹ Uwumbɔr nan len ŋitimbol aabɔr m chee.

² U nan di Ijipt aatimbol aabɔr le loln nsan. U nan len Ijipt Aabɔr Neko aajab bi Babiloŋ Aabɔr Nebukadnesar nan nyaŋ bi Kakemis aatiŋ ki bi gbɔk Yufrates Aamɔɔl na aabɔr. Ni nan ye Juda aabɔr Jehoyakim aanaan aayoonn aabinanar ni la. U nan len ke,

³ “Ijipt aajab aaninkpiib nan tar ke, ‘Ban nimi aajaak aapeln man ki nya buen butɔb ni.

⁴ Di itangar poo nimi aataan man ki diŋ i pu. Lul sil man, ki di nimi aajaak aayikpupur chiŋ. Luun nimi aakpaatunn man. Di nimi aajaak aabɔkul peen man.’”

⁵ Le Uwumbɔr baa ke, “Tɔ, ni ye ba m waa na? Ijawaan chuu bi le bi fenn bipuwɔb. Bidim nyaŋ baajab le bi fenn bipuwɔb ijawaan aah chuu bi sakpen pu na, le bi san mala mala kaa ki fenni lik bipuwɔb.

⁶ Bijab bi ŋmaa san mala na aan ŋmar; bijab ngbaan aan ŋmaa san ŋmar. Ŋŋangan wɔb, Yufrates Aamɔɔl chee, le bi gbeer ki lir.

⁷ Ŋma ye ki fii paacham kina ke Nail aamɔɔl na, ki naahn ke limɔɔl le aah nyan nwam na.

⁸ Ijipt yaab le fii ke Nail Aamɔɔl na, ki naahn limɔɔl le aah nyan nwam na. Ijipt yaab nan bui ke, ‘Ti ga fii ki biin dulnyaa pu; ti ga kuln ntim, ni binib bi koo mu ponn ni na.

⁹ Cha itaan ngbaan siir man ki cha itaan aatɔroku mam li san mala mala. Cha bijab ngbaan li cha man. Cha bijab bi joo kijaak aapeln ki nyan ni Kus ni Libia na, ni Lidia aajab bi ŋmaa too sakpen na li cha.’”

¹⁰ Din wee le ye Tidindaan Uwumbɔr Mpɔɔnsakpiindaan aawiin, din le u ga teen waadim; din le u ga daa waadim aatafal. Waajaak aajuk ga geei bi ki ti bab, le ki nyu baasin ki ti gbii. Din wee le Uwumbɔr Mpɔɔnsakpiindaan ga di waadim toor kitork ŋŋangan wɔb, Yufrates aamɔɔl chee.

¹¹ Ijipt aanib, li cha man Gilead aatiŋ ni ki ti ban inyɔk. Nimi aanyɔk mɔmɔk ye fam la; nibaa aan ŋmaa tii nimi laafee.

¹² Ŋitimbol ŋun nimi aanimɔɔn ngbaan pu; unii mɔmɔk ŋun naah wii pu na. Uja ubaa gbeer uken, le bi mɔmɔk lir kitiŋ.

Nebukadnesar aah choo pu na

¹³ Babiloŋ Aabɔr Nebukadnesar aah nan dan nan tak Ijipt aatiŋ pu na, le Uwumbɔr nan len m chee tibɔr. U nan len ke,

¹⁴ “Moon Ijipt aatim ni, moon Migdol ni, ni Memfis ni, ni Tapanes ni ke, ‘Gor ki kiir nibaa man; naah kpa tiwan ni mɔmɔk na ga bii butɔb ni.

¹⁵ Ni ŋa kinye aan nimi aawaasakpeln Apis lir? Uwumbɔr le faa li lii.’

¹⁶ Nimi aajab gbeer le ki lir; le bimɔk len tɔb chee ke, ‘Ŋa mala, cha ti gir kun tido aanib chee ki ŋmar timi aadim aajaak aajum chee.’

¹⁷ Tii Ijipt aabɔr liyimbipɔln ke, ‘Kipupukdaan u kpa kifuuk ki bii waasan na.’

¹⁸ Min Uwumbɔr Mpɔɔnsakpiindaan le ye ubɔr. Min le ye Uwumbɔr u bi n‑yoonn mɔmɔk na. Unii u ga tak si na ga li kpa mpɔɔn ke Tabor Aajool aah paa jer ŋijoo mɔmɔk pu, ki mu ga li kpa mpɔɔn ke Kamel Aajool aah paa jer nnyusakpem pu na la.

¹⁹ Nimi Ijipt yaab gor nibaa pu aan bi di nimi buen tinaagbiir ni. Memfis aatiŋ ga kpaln nteersakpiin, mu ga li ye nkuun aan ubaa aa koo nima na la.

²⁰ Ijipt aatiŋ bi ke unaanyaan u kinaagangaŋ ki nyan ni ŋŋangan wɔb na bi juuni u na la.

²¹ Hali kaah buen ti pan bijab bi pu ke bi nan jan tii ki na aa kpa mpɔɔn ke inaabi na la. Baa nan sil ke bi jan kijaak; bi mɔmɔk nan fenn le ki san. Baadoon aayoonn fuu ni a, baah ga kuln pu na aayoonn le na.

²² Ijipt aajab san, le baadim aajab aah choo na, bi fuuni ke iwaa na. Bi nan di nchɔkm le tak ki ke bijab aah bi gaar isui

²³ ki bii kichook ki kpa isui sakpen na. Saan ŋmaa kahn baajab; baajab wiir jer itoon.

²⁴ Bi jinn Ijipt aanib inimɔɔn; ŋŋangan wɔb aanib le nyaŋ bi. Min Uwumbɔr le len kina.”

²⁵ Uwumbɔr Mpɔɔnsakpiindaan, u ye Israel yaab Aawumbɔr na len ke, “M ga daa Tebes aawaal Amonn, ni Ijipt aatiŋ, ni kaawaa, ni kaabɔrb aatafal. M ga yoor Ijipt aabɔr ni binib bi mɔmɔk di naadii tii u na,

²⁶ ki di bi tii binib bi ban ke bi ku bi na; m ga di bi tii Babiloŋ Aabɔr Nebukadnesar ni waajab. Le puwɔb na, binib ga nan ki li koo Ijipt aatiŋ ponn ni ke n‑yaayoonn na. Min Uwumbɔr le len kina.”

Uwumbɔr aah ga gaa waanib lii pu na

²⁷ “Maanib, taa san ijawaan man, Israel aanib, taa cha ijawaan chuu nimi. M ga nyan ni nimi dandar aatiŋ pu, m ga nyan ni nimi kitiŋ ki pu ni ye binaagbiib na. Ni ga gir kun ni, ki nan li bi nsuudoon ni; ni ga kan lifuur, le ubaa aan faan nimi.

²⁸ M ga dan ki nan gaa nimi lii. M ga kuln ŋitimbol ŋi mɔmɔk m cha ni yaa ki bi ŋi ponn ni na, le kaa kuln nimi ma. M ga daa nitafal; tɔ, m yaa daa nitafal kan, m ga daa ki ŋeer la. Min Uwumbɔr le len kina.”