Jeremia 44 - Uwumbɔr aagbaŋ

Uwumbɔr aah nan di inaŋ i tii Israel yaab bi bi Ijipt aatiŋ ni na

¹ Uwumbɔr nan len Israel yaab bi nan bi Ijipt aatiŋ pu ki koo Migdol, ni Tapanes, ni Memfis aatim ni, ni Ijipt aaŋangii wɔb aapepel ni na aabɔr.

² Uwumbɔr Mpɔɔnsakpiindaan, u ye Israel yaab Aawumbɔr na bui ke, “Nimi nibaa nan kan tibɔbir ti m nan cha ti dan Jerusalem ni Juda aatim muken mɔmɔk pu pu na. Ki nan saa din wee, mu beenin ye tilangbenn, le unii ubaa aa bi mu ponn ni; ba pu?

³ mu aanib nan tun titunwanbir ki ŋa mi liŋuul. Bi nan toor kitork tii ŋiwaa, le ki dii ŋiwaa ŋi bima, ni nimi, ni niyaajatiib aa kee dii ŋi na.

⁴ Le m joo maatutum bi ye bibɔnabr na tuni ni chee, le bi nan bui nimi ke ni taa ŋani tiwan ni sukr ponn ni na maah kaa gee ni na.

⁵ Le ni yii, kaa pel, kaa ŋun tii mi. Naa di cha titunwanbir ti ni tun ke ni toor ŋiwaa na.

⁶ Le m di maaŋuusakpeln lii ni Juda aatim pu, ni Jerusalem ponn ni, le mu wun mmii. Mu nan kpaln tilangbenn, le ki kpa unii ijawaan, ke mu aah beenin bi pu din wee na.

⁷ “Kina pu le min Uwumbɔr Mpɔɔnsakpiindaan, u ye Israel yaab Aawumbɔr na baa nimi ke ba ŋa ni bi tun nibaa titunwanbir timina aaboln. Ni ban ke ni joo ni tibɔbir nan lii bijab, ni bipiib, ni mbim, ni mbipɔm pu, le nimi aanii ubaa taa gur aa?

⁸ Ba ŋa ni dii ŋiwaa ki toor kitork tii ŋiwaa Ijipt ni do, nin chee ni dan nan koo na, ki ŋani mi liŋuul? Ni ŋani kina ke ni kuln, aan binib li lik nimi fam ki joo nimi aayimbil puuni lir biken pu la aa?

⁹ Ni suln niyaajatiib, ni Juda aabɔrb, ni bipuutiib, ni nimi, ni nipuutiib aah nan tun mbiin aatun ŋi Juda aatim ni, ni Jerusalem aatiŋ ponn ni na pu la aa?

¹⁰ Le ki nan saa din, naa kee sunn nibaa taab. Naa nyuŋni mi, le kaa joo ikaal i mɔmɔk m di tii nimi ni niyaajatiib na.

¹¹ “Kina pu na, min Uwumbɔr Mpɔɔnsakpiindaan, u ye Israel yaab Aawumbɔr na, ga fenn lir ni pu ki kuln Juda aatiŋ mɔmɔk.

¹² Juda aanib bi ma gur aan binimbil man ke bi buen ti li koo Ijipt aatiŋ ni na, see m kuln bi mɔmɔk. Binikpaam ni biwaatiib mɔmɔk ga kpo butɔb ni, ni nkon aakun, Ijipt aatiŋ ni. Binib yaa kan bi kan, bi ga li kpa ijawaan la; binib ga lik bi fam, ki li joo baayimbil puuni lir biken pu.

¹³ Maah nan di butɔb, ni nkon, ni iween daa Jerusalem aatiŋ yaab aatafal pu na, kina le m ga daa binib bi mɔmɔk koo Ijipt ni na aatafal.

¹⁴ Juda aanib bi gur ki dan nan koo Ijipt ponn ni na ubaa aan san ŋmar ki kan limɔfal. Bi ponn ni ubaa aan ki gir ni Juda, nin chee bi ga ki li gee ke bi nan ki li koo na. Ubaa aan ki gir ni, see bikusam siib kina le ga gir ni.”

¹⁵ Le bijab bi nyi ke bipuutiib toor kitork tii ŋiwaa na, ni bipiib bi mɔmɔk nan si nima chee na, ki di kpee Israel yaab bi koo Ijipt aaŋangii wɔb ki nan ye kinipaak sakpeŋ na, mɔmɔk bui mi ke,

¹⁶ “Taan kii saah di Uwumbɔr aayimbil tuk timi tibɔr ti na.

¹⁷ Ti ga ŋa tiwan ni mɔmɔk ti bui ke ti ŋa na. Ti ga toor kitork tii timi aawaapii, u ye Paacham Aapiibɔr na, ki ga tii u ndaan aapiin, ke timi, ni tiyaajatiib, ni timi aabɔr, ni timi aasalolm aah nan ŋani pu Juda aatim ni, ni Jerusalem aatiŋ ponn ni pu na. N‑yoonn ngbaan ti nan kpa tijikaar sakpen, ki nan kpa liwangol, kaa kpa tibɔr tibaa.

¹⁸ Tɔ, n‑yoonn mu ti di cha kaa ki toor kitork tii Paacham Aapiibɔr kaa ki tii u ndaan aapiin na, taa ki kpa nibaa, le timi aanib kpoi butɔb ni nkon ni.”

¹⁹ Le bipiib ngbaan ki len ke, “Taah nan ken maab naŋni Paacham Aapiibɔr, ki toor kitork tii u, ki tii u ndaan aapiin na, tichatiib nan kii tii taah ŋani pu na ke ni ŋan.”

²⁰ Le m bui bijab ni bipiib bi mɔmɔk gar mi kina na ke,

²¹ “Ni dak ke nimi, ni niyaajatiib, ni nimi aabɔrb, ni nimi aasalolm, ni kitiŋ ngbaan pu aanib aah nan toor kitork ki tii ŋiwaa, Juda aatim ni, ni Jerusalem aatiŋ ponn ni na, Uwumbɔr aa nyi ti pu, bee u suln ti pu la aa?

²² Din wee na, nimi aatiŋ dɔ nkuun, le ubaa aa bi ki pu. Binib gur san ki ijawaan la, le Uwumbɔr aah kaa nan ki ŋmaa gaa nimi aabiin ni titunwanbir pu na, le binib gur joo kaayimbil puuni lir biken pu.

²³ Naah kaa joo Uwumbɔr aakaal ki tun u titunwanbir, ki toor kitork tii ŋiwaa pu na le cha tibɔbir timina dan ni pu.”

^24-25 M nan bui binib ngbaan mɔmɔk, ki moo sak bipiib ngbaan, Uwumbɔr Mpɔɔnsakpiindaan, u ye Israel yaab Aawumbɔr na, aah bi tuk Juda aanib bi koo Ijipt aatiŋ ni na ke, “Nimi ni nipuutiib mɔmɔk puu tipuukpaan tii Paacham Aapiibɔr. Ni nan puu ke ni ga li toor kitork tii u, ki tii u ndaan aapiin, le ki joo naah puu tipuur ti na. Tɔ, ni ŋan. Li joo nimi aapuur man. Tun naah puu pu na man.

²⁶ Tɔ, li pel man tipuur ti min Uwumbɔr di maayimbikpaan puu tii nimi Israel yaab bi mɔmɔk koo Ijipt aatiŋ ni na. Maan ki cha ni ponn ni ubaa puu tipuur maayimbil pu ke, ‘M puu Uwumbɔr u bi kaa kpa ŋeen aatɔ na pu.’

²⁷ Maan ki cha ni ponn ni ubaa kan nkam, le ki tee kuln nimi. Ni mɔmɔk ga kpoi, ni ga kpoi butɔb ni, ni iween ni, ki ti saa n‑yoonn mu ubaa aan gur na.

²⁸ Tɔ, siib ga nya nkun ni ki gir nya Ijipt ni ki kun ni Juda aatiŋ pu. Binib bi ga ŋmar na ga bee ke min ni biken na, ulau aamɔbon gbiin.

²⁹ Min Uwumbɔr ga tii nimi limɔkl ke m ga daa nitafal do, ki ki mɔk ke maah puu ke m ga cha tibɔbir ti dan ni pu na ga gbiin kina.

³⁰ M ga di Ijipt Aabɔr Hofra tii waadim bi ban ke bi ku u na, ke maah di Juda Aabɔr Sedekia tii waadin Babiloŋ Aabɔr Nebukadnesar u nan ban ke u ku u pu na la.”