Jeremia 43 - Uwumbɔr aagbaŋ

Baah di Jeremia buen Ijipt aatiŋ ni pu na

¹ M nan tuk binib ngbaan Bidindaan Uwumbɔr aah bui mi ke m tuk bi pu na doo.

² Le Hosaya aajapɔɔn Asaria, ni Karea aajapɔɔn Johanann, ni bigaadam biken na mɔmɔk bui mi ke, “Tidindaan Uwumbɔr aa tun ni si ke aa nan tuk timi ke ti taa buen Ijipt aatiŋ ni ki ti li koo nima. Aa gii la.

³ Neria aajapɔɔn Baruk le saan si lii ti pu, ke Babiloŋ yaab kan ti pu mpɔɔn, ki yaa gee kan, bi ku timi, bee bi chur timi buen Babiloŋ aatiŋ ni.”

⁴ Kina pu na, Johanann, ni bijab aaninkpiib, ni binib ngbaan ubaa aa kii Uwumbɔr aamɔb ki gaar Juda aatiŋ pu.

⁵ Le Johanann ni bijab aaninkpiib ngbaan mɔmɔk yoor unii umɔk gur Juda aatiŋ pu na buen Ijipt aatiŋ ni; bi nan di binib bi nyan ni baah nan yaa ki bi ŋitimbol ŋi ponn ni ki gir ni na mu buen:

⁶ bi nan di bijab, ni bipiib, ni mbim, ni ubɔr aabisatiib mu buen. Bi nan yoor bijab aayidaan Nebusaradann aah nan cha binib bimɔk gaar Juda ni ki bi Gedalia aaŋaal ni na, ki di Baruk ni m mu kpee.

⁷ Bi nan yii Uwumbɔr aamɔb le ki di ti fuu Ijipt aatiŋ ki bi yin ki ke Tapanes na ni.

⁸ Nima chee le Uwumbɔr nan bui mi ke,

⁹ “Ban ŋitakpal ŋi filk na, ki di ŋi sub baah chii Ijipt aabɔr aadichal aabisamɔb nin chee na, ki cha Israel yaab bi bi kitiŋ kimina ponn ni na aanimbil kan saah sub ŋi pu na,

¹⁰ ki bui bi ke min Uwumbɔr Mpɔɔnsakpiindaan, u ye Israel yaab Aawumbɔr na, ga cha maatutunn u ye Babiloŋ Aabɔr Nebukadnesar na dan do, u ga nan di waabɔrjal siin ŋitakpal ŋi aa di sub na pu, le ki taln nnaan aakekeln biin ŋi pu.

¹¹ Nebukadnesar ga dan ki nan nyaŋ Ijipt aatiŋ. Maah siin ke iween ku binib bi na ga kpo iween aakun; maah siin ke bi ga di bi buen tinaagbiir ni na mu ga buen, le maah siin ke bi ga kpo butɔb ni na, ga kpo butɔb ni.

¹² M ga see Ijipt aawaadir mmii, le Babiloŋ aabɔr yaa gee ke u see baawaa mmii kan, u see ŋi, u yaa ti ki gee kan, u di ŋi buen. Upihkpaal aah nyan ni tibabr waawanpeenkaan ni pel pel pu na, kina le Babiloŋ aabɔr ga nyan tiwan mɔmɔk Ijipt aatiŋ ni ki di linyaŋ nya.

¹³ U ga ber ŋiwaabimbin ŋi bi Heliopolis aatiŋ ki bi Ijipt ni na, ki see Ijipt yaab aawaadir mmii lii.”