Jeremia 42 - Uwumbɔr aagbaŋ

Binib ngbaan aah nan bui Jeremia ke u mee limeel tii bi pu na

¹ Bijab aasalolm mɔmɔk, ki di kpee Karea aajapɔɔn Johanann, ni Hosaya aajapɔɔn Asaria pu, ni binib mɔmɔk aabɔŋ nan dan m chee,

² le ki nan bui mi, “Ŋaanii ki ŋa taah bui si pu na. Mee Tidindaan Uwumbɔr tii timi. Mee limeel tii timi bi mɔmɔk ŋmar na. N‑yoonn mubaa ti nan ye binib bi wiir na la, tɔ, dandana ma kan, sin aabaa waa ke timi siib kina le gur.

³ Mee Tidindaan Uwumbɔr ke u mɔk timi nin chee ti ga buen na, ni tiwan ni ti ga ŋa na.”

⁴ Le m gar bi ke, “Tɔ, ni ŋan. M ga mee Tidindaan Uwumbɔr naah len pu na, u yaa kpa timɔk ki len na kan, m ga di tuk nimi. Maan di tibaa bɔr nimi.”

⁵ Le bi bui mi ke, “Ti yaa yii kaa kii Tidindaan Uwumbɔr aah ga di tibɔr timɔk tuk si ke aa di tuk timi na kan, u li ye useeraadaan bamɔnn ti pu.

⁶ Ni yaa ga bii tisui, bee ni yaa ga piir tisui kan, ti ga kii Tidindaan Uwumbɔr u ti bui ke aa mee u tii timi na aamɔb. Ti yaa kii tii u kan, ni ga li ŋan tii timi.”

Uwumbɔr aah gar Jeremia aameel pu na

⁷ Iwiin kipiik aapuwɔb le Uwumbɔr nan len m chee tibɔr,

⁸ le m kuun Johanann, ni bijab bi bi u chee na aasalolm mɔmɔk, ni binib biken mɔmɔk.

⁹ M nan bui bi ke, “Uwumbɔr, Israel yaab Aawumbɔr, u chee ni di nimi aabɔr tun mi na bui ke,

¹⁰ ‘Ni yaa ban ke ni li beenin bi kitiŋ kimina pu kan, m ga maa nimi ŋidichal ki taa bii nimi, m ga cha ni moo chɔbaan ki taa ki kpokl lir. Maah nan cha libiil li dan ni pu na tii mi mpombiin pam.

¹¹ Taa ki san Babiloŋ yaab aabɔr ijawaan. M bi ni chee, ki ga nyan nimi waapɔɔn ni.

¹² Maah ye unimbaasaln na, m ga cha u san nimi kinimbaak ki cha ni gir kun. Min Uwumbɔr le len kina.’

^13-15 “Tɔ, nimi binib bi gur ki bi Juda ni na, taa yii Nidindaan Uwumbɔr ke naan li bi kitiŋ kimina pu. Ni taa bui ke, ‘Aayii, ti ga buen ki ti li bi Ijipt aatiŋ ni, nin chee taan ki buen butɔb ni, kaan ki ŋun butɔb aakpiin pu, kaan ki chuun nkon na.’ Ni yaa len kina kan, Uwumbɔr Mpɔɔnsakpiindaan u ye Israel yaab Aawumbɔr na len ke, ‘Ninimbil yaa mann ke ni ga buen ti li koo Ijipt aatiŋ pu kan,

¹⁶ butɔb bu ni san ijawaan na ga nyaŋ nimi, nkon mu ni san na ga li dii nimi, le ni ga kpo Ijipt ni.

¹⁷ Binib bi mɔmɔk aanimbil mann ke bi ga buen ti li koo Ijipt aatiŋ pu na, butɔb, ni nkon, ni iween le ga ku bi. Bi ponn ni ubaa aan ŋmar, ubaa aan nya tibɔbir ti m ban m cha ti dan bi pu na.’”

¹⁸ Uwumbɔr u ye Israel yaab Aawumbɔr na ki bui ke, “Maah nan cha maaŋuusakpeln dan Jerusalem pu pu na, kina le ni yaa buen Ijipt ni kan, maaŋuul ga dan ni pu. Binib yaa kan nimi kan, ni ga li kpa ijawaan; binib ga lik nimi fam le ki li joo nimi aayimbil puuni lir biken pu. Naan ki kan do kpala.”

¹⁹ Le m ki moo len ke, “Uwumbɔr bui mi ke m tuk nimi bi gur Juda ni na ke ni taa buen Ijipt aatiŋ ni. Kina pu na, m sur nimi dandana wee ke

²⁰ ni bi tun taani sakpiin la. Ni bui mi ke m mee Tidindaan Uwumbɔr tii nimi, le ki puu ke ni ga ŋa waah len pu na mɔmɔk.

²¹ Tɔ, m bui nimi a, le ni yii tiwan ni mɔmɔk Tidindaan Uwumbɔr tun ni mi ke m nan tuk nimi na.

²² Kina pu na, teer nimina man: butɔb, ni nkon, ni iween le ga ku nimi kitiŋ ki pu ni ban ke ni ti li koo na.”