Jeremia 41 - Uwumbɔr aagbaŋ

¹ Libinbaal ngbaan aaŋmalole ni, le Ismael, u aate ye Netania, aan uyaaja ye Elisama, ki nyan ni libɔrdichal ni, ki ye ubɔr aaninkpiib ponn ni ubaa na, nan di bijab kipiik buen Mispa ke bi ti kan Gedalia. Baah nan ti kpaan ki ka ji tijikaar na,

² le Ismael ni waajab kipiik na daa nyan baajaak aajum ki ku Gedalia.

³ Ismael nan ki ku Israel yaab bi nan bi Gedalia chee Mispa ni na, ni Babiloŋ aajab bi mu nan bi nima liyaadaal ngbaan na.

⁴ Kitaak aah woln, waahr aan ubaa nin ŋun ke bi ku Gedalia na,

⁵ bijab imonko inaa nan nyan ni Sekem, ni Silo, ni Samaria. Bi nan kuu bilangban, ki kar kar baawanpeenkaan, ki kpa tidaan biwon pu. Bi nan joo ni tijikaar ni tulalee aayon ke bi nan tii ipiin Uwumbɔr Aadichal ni.

⁶ Le Ismael nyan Mispa ke u tooh bi nsan ni. U nan wii le ki cha. Waah ti fuu bi chee na, le u bui ke, “Ŋaanii ki dan nan doon Gedalia man.”

⁷ Baah ti kpaan koo kitiŋ ngbaan ni na, le Ismael ni waajab ku bi, ki di mee ŋa nnyunbun ni.

⁸ Tɔ, bijab kipiik nan bi bijab ngbaan ni le ki bui Ismael ke, “Ŋaanii ki taa ku timi. Ti kpa tijikaar, ni olif aakpan, ni tisiir bɔr timoor ni.” Le u nan di cha bi.

⁹ Ismael aah nan di waah ku binib bi na ŋa nnyunbun mu ponn ni na nan waa pam. Ubɔr Asa le nan gbii mu buyoonn Israel Aabɔr Baasa nan tak u na. Ismael nan di ŋinikpol ngbaan gbiin nnyunbun ngbaan la,

¹⁰ le ki chur ubɔr aabisatiib ni binib bi mɔmɔk bi Mispa na, aan bijab aayidaan Nebusaradann nan di ŋa Gedalia aaŋaal ni na tinaagbiir. Ismael nan chur bi le ki di toŋ Amonn aapepel wɔb.

¹¹ Johanann ni bijab aayidam mɔmɔk nan ŋun Ismael aah bii libiil li na.

¹² Le bi ni baajab nan di paan u pu ki ti pii u Gibeonn aabukpiik sakpeŋ na chee.

¹³ Ismael aah nan chur binib bi na aah nan kan Johanann ni waajab aaninkpiib na, le bisui piir,

¹⁴ le bi gir ki san choo bi chee.

¹⁵ Tɔ, Ismael ni waajab biniin bibaa nan san ŋmar Johanann ni waajab ki buen Amonn aatiŋ ni.

¹⁶ Le Johanann ni waajab bi nan dii u na aaninkpiib gaa binib bi Ismael nan ku Gedalia ki chur bi tinaagbiir ki nyan Mispa aatiŋ ni na, bi nan ye bijab bi jaa kijaak na, ni bipiib, ni mbim, ni baah lee nyan bijab bi aajawan na.

^17-18 Ismael aah nan ku Gedalia, u Babiloŋ aabɔr nan di ŋa kitiŋ ngbaan aayidaan na, le bi san Babiloŋ yaab ijawaan. Kina pu le bi nan di toŋ Ijipt aatiŋ ni ke Babiloŋ yaab taa pii bi. Baah cha na, le bi nan ti sil Kimham aatiŋ ki bi Betlehem na chee.