Jeremia 40 - Uwumbɔr aagbaŋ

Jeremia aah nan koo Gedalia chee pu na

¹ Babiloŋ aajab aayidaan Nebusaradann aah nan nyan mi lii Rama aatiŋ ni na, le Uwumbɔr nan len m chee tibɔr. Bi nan gbin mi tikululn ki di m ni Jerusalem, ni Juda aanib bi bi nan chuu bi tinaagbiir joo chaa Babiloŋ ni na buen nima chee.

² Uyidaan ngbaan nan di mi nyan n‑gbaan le ki bui mi ke, “Aadindaan Uwumbɔr nan puu ke kitiŋ kimina ga bii,

³ le ki sil ŋa waah nan len pu na. Saanib aah tun Uwumbɔr titunwanbir, kaa kii waamɔb pu na, le cha nimina mɔmɔk ŋa.

⁴ Dandana m ban m chuu gbinn tikululn ti gbin aaŋaal na le ki di si lii. Aa yaa gee ke aa dii mi buen Babiloŋ ni kan, aa ga ŋmaa ŋa kina, m ga li joo si. Tɔ, aa yaa kaa gee ke aa buen kan, naa yee mpɔɔn. Kitiŋ kee mɔmɔk ye sin yaan le ke aa lee saah gee ni na, aa ga ŋmaa buen saah gee nin chee na.”

⁵ Maah kaa nan gar na, le Nebusaradann bui ke, “Gir ki li cha Ahikam, u aate ye Safann na aajapɔɔn Gedalia, u Babiloŋ aabɔr di u ŋa Juda aatim aayidaan na chee. Aa ga ti li ŋmaa koo u chee, ki li bi saanib ni. Aa yaa kaa ti ki gee kina kan, aa ga ŋmaa buen saah gee nin chee na.” U nan tii mi ipiin ni tijikaar ke m li joo cha, le ki di mi lii.

⁶ M nan buen Mispa aatiŋ ni, le ki ti koo Gedalia ni binib bi gur kitiŋ ngbaan pu na ni chee.

Gedalia aah ye Juda aayidaan pu na

⁷ Juda aaninkpiib ni baajab bibaa aa nan di bibaa tii Babiloŋ yaab. Bi nan ŋun ke Babiloŋ aabɔr nan di Gedalia ŋa Juda aayidaan, le u joo binib bi mɔmɔk nan gur kitiŋ ngbaan ni, baa nan di bi buen Babiloŋ ni, ki ye bigiim na.

⁸ Kina pu le Natania aajapɔɔn Ismael, ni Karea aajapɔɔn Johanann, ni Tanhumef aajapɔɔn Seraya, ni Efai u nyan ni Netofa na aajapɔtiib, ni Jesania u nyan ni Maaka na di baajab buen Mispa aatiŋ ni, Gedalia chee.

⁹ Gedalia nan bui bi ke, “M puu tii nimi ke ijawaan ibaa aa bi ni ga li san i ke ni ti di nibaa tii Babiloŋ aajab. Kal kitiŋ kee pu man, ni yaa tun tii Babiloŋ yaab kan, ni ga li ŋan tii nimi.

¹⁰ Min mbaa ga li koo Mispa ni do, le Babiloŋ yaab yaa dan kan, m ga li si nimi aasisii. Ni ga ŋmaa ban ŋisubil, ni ndaan siin, ki siin olif aakpan, ki li koo ntimbim mu ponn ni, ni koo na.”

¹¹ N‑yoonn mue na, Israel yaab bi mɔmɔk bi Moab ni Amonn, ni Edom, ni ntim muken ni na, ŋun ke Babiloŋ aabɔr kii ke Israel yaab bibaa li beenin koo Juda ni, ki di Gedalia ŋa baayidaan.

¹² Le bi nyan baah yaa ki bi nin chee na, ki gir ni Juda. Bi nan dan Mispa ni, Gedalia chee, le ki nan kuun ndaan ni ŋisubil pam.

Baah ku Gedalia pu na

¹³ Nee aapuwɔb, le Johanann ni bijab ngbaan aayidam bi kaa nan di bibaa tii Babiloŋ aajab na nan dan Mispa ni, Gedalia chee,

¹⁴ le ki nan bui u ke, “Saa nyi ke Amonn Aabɔr Baalis tun ni Ismael ke u nan ku si la aa?” Tɔ, Gedalia aa nan kii tii bi.

¹⁵ Le Johanann loon bui u ke, “Cha m buen ki ti ku Ismael aan ubaa taa li nyi unii u ku u na. Taa cha u kan nsan ki ku si. Kina ngbaan ga cha Juu yaab bi dan aa chee na yaa, le ki ga ŋmaa joo ni tibɔbir binib bi mɔmɔk gur Juda do na pu.”

¹⁶ Le Gedalia gar u ke, “Taa ŋa kina. Saah len Ismael pu tibɔr ti na aa gbii.”