Jeremia 4 - Uwumbɔr aagbaŋ

Titunwanbir aayiim aayim

¹ Uwumbɔr bui ke, “Israel yaab, ni yaa ban ni fenn kan, ni fenn dan m chee. Ni yaa di cha nsan mu kpa tijɔŋ na ki kii maamɔb kan,

² ni ga ŋmaa puu tipuur maayimbil pu. Le ŋitimbol mɔmɔk ga bui mi ke m ŋa maanyoor ŋa bi pu, ki ga pak mi.”

³ Uwumbɔr bui Juda ni Jerusalem aanib ke, “Kpar nimi aasikpil ŋi kaa kpar na; taa di nimi aajikaabim bu ŋmal ikokon ponn ni man.

⁴ Li joo man tipuur ti ni nan puu tii mi Uwumbɔr na. Nimi Juda ni Jerusalem aanib, di nibaa tii mi man. Ni yaa kaa ye kina kan, maaŋuul ga fii ke mmii na, titunwanbir ti ni tun na pu. Li ga fii, le ubaa aan li bi ki sɔŋ li.”

Baah ga loon Juda pu na aafaan

⁵ Pii ikpiin kitiŋ kee mɔmɔk pu man. Teen mpɔɔn pu aan unii mɔmɔk ŋun. Tuk Juda ni Jerusalem aanib libiil li choo Juda pu na ke bi san buen ntim mu bi maa ŋigon gob mu na ni.

⁶ Mɔk Sionn aatiŋ aasan man. Li san ban nimi aamɔfal man. Taa taan man. Uwumbɔr nyan ni ŋŋangan wɔb ki joo libiil choo.

⁷ Uchinn aah nyani waabɔbɔryaan ni pu na, kina le unii u bii ŋitimbol na nyan ni. U choo u nan bii Juda aatiŋ la. Juda aatim ga kpaln tilangbenn la, le ubaa aan ŋmaa koo mu ni.

⁸ Kina pu na, di tiwanpeenkaan ni saak kuub na peen, ki li wii ki kaani, Uwumbɔr aaŋuusakpeln aah kaan fenn cha Juda pu na pu.

⁹ Uwumbɔr bui ke, “Liyaadaal ngbaan kan, bibɔrb ni baaninkpiib aawon ga yɔl, lijinjiir ga chuu bitotoorb, le maabɔnabtiib ga li gur waa bimɔi.”

¹⁰ Le m bui ke, “Ndindaan Uwumbɔr, aa ŋmann Jerusalem aanib kookoo a. Aa bui bi ke nsuudoon ga li bi, le kijaak aajuk ka bineen ni.”

¹¹ N‑yoonn choo, le bi ga nan bui Jerusalem aanib ke libuln li ton sakpen na nyan nteersakpiin ni ki choo bi chee. Laan li ye libuln li bi suuna ki daar tigbengbir cha na.

¹² Libuln li Uwumbɔr ga cha li dan na ga li pɔɔ jer lima ngbaan. Uwumbɔr ubaa le bi dar waanib aatafal.

Bidim aah ga mann goln Juda pu na

¹³ Lik man, udin le choo ke ntaalangbam na. Waajaak aataan, ni yaatɔroku mam bi ke kinaakpaajabuŋ na la, le waataan ŋmaa san mala mala jer ŋikaagii. Ti kuln a. Timi aamɔfal junn a.

¹⁴ Jerusalem aanib, finn nyan tibir ti bi nisui ni na, aan ki ŋmar. Ni ga li dak tilandakwanbir ki ti saa bayoonn?

¹⁵ Ituun nyan Dann yaab, ni Efraim yaab aagongon ni, le ki nan moon tibɔbir ngbaan.

¹⁶ Bi dan bi nan sak ŋitimbol ki bui Jerusalem ke bidim nyani dandar ki choo. Bidim ngbaan ga gbaa ikaa Juda aatim pu,

¹⁷ ki ga lul goln Jerusalem ke bijab bi si kii nkpaakon na; ba pu? kaanib nyan Uwumbɔr aapuwɔb. Uwumbɔr le len kina.

¹⁸ Juda yaab, naah bi mbimbin mu na, ni ŋitun ŋi ni tun na le cha ni joo ni nima nibaa pu. Nimi aatunwanbir le joo ni falaa umina; ti saa chaar nipobil a.

Jeremia aasui aah bii waanib pu pu na

¹⁹ Iween sakpen yee. Maan ŋmaa joo iween ngbaan. Mpobil yuk a. Mpobil gbaa mpɔɔn pu la. Maan ŋmaa ŋmin suuna, m ŋun ikpiin aawiil ni butɔb aakuun pu.

²⁰ Libiil libaa dii liken la; kitiŋ ngbaan mɔmɔk ber doo a. Libuul ni le bi bii timi aadir doo; le ki gbaa wiil ti mɔmɔk.

²¹ M ga li ŋun butɔb aafuuk pu ki ti saa bayoonn, ki li ŋun ikpiin aawiil pu kina ki cha?

²² Uwumbɔr bui ke, “Maanib ye bijɔrb la, baa nyi mi. Bi naahn mbim mu kaa kpa nlan na la; baa kpa ntafaŋum. Bi nyi titunwanbir aatuln sakpen, le kaa tee nyi tiwan ni ŋan na aaŋam.”

Uwumbɔr aah kpiir libiil li choo na mɔk Jeremia pu na

²³ M nan lik kitiŋ, le ki kan ke ki nan ye kitikuun ŋmeen la. M nan waan lik paacham, le kaa waa nwiihn.

²⁴ M nan lik ŋijoo, le ŋi mɔmɔk nan jii, le ŋigongon yuk ti nya do ki ti nya do.

²⁵ M nan kan ke unii aa ki bi nibaa chee; hali inyoon nan fii buen a.

²⁶ Kitiŋ ki nan nyuun ki kpa tijikaar na nan kpaln nteersakpiin la; kaatim nan ber doo, Uwumbɔr aaŋuusakpeln pu.

²⁷ Tɔ, Uwumbɔr nan bui ke kitiŋ kee mɔmɔk ga kpaln nteersakpiin la, u mu aan tee bii ki doo.

²⁸ Kitiŋ ga wii ikpowiil, le kitaapaak bɔnn timm. Uwumbɔr le len, kaan kpeln waalandak. U siin waah ga ŋa pu na, kaan ki fenn upuwɔb.

²⁹ Binib mɔmɔk yaa nan ŋun bitandam ni bipindam pu kan, bi ga san. Bibaa ga san buen kichook ni, biken mu ga jon ŋijootakpal ni. Ntim mɔmɔk ponn ni ga li ye nkuun la, le ubaa aan ki koo mu ni.

³⁰ Jerusalem aanib, ni kuln a. Ba ŋa ni pee ŋikekenyaan? Ba ŋa ni gbin nleenyaan ki di nkpanyaan boon ninimbil wɔb? Ni toor nibaa fam la. Nibɔtiib yii nimi le ki ban bi ku nimi.

³¹ M ŋun iwiil pu ke upii u ban u maa na aah wii pu na, iwiil i bi ke upii u ban u maa waajan aabo na aawiil. Jerusalem aanib aawiil le bi na, bi pɔɔni bibaa ke bi fuur la, ki taln biŋaal ki wii ke, “Timi aamɔfal junn a. Bi choo bi nan ku timi la.”