Jeremia 39 - Uwumbɔr aagbaŋ

Jerusalem aalirm aabɔr

¹ Sedekia aah nan ye Juda aabɔr pu na aabiwawaer aaŋmapiik ni, le Babiloŋ Aabɔr Nebukadnesar ni waajab mɔmɔk nan dan nan tak Jerusalem.

² Sedekia aanaan aabin kipiik ni libaa aaŋmanaa aawiin iwae daal, le bi nan wii kitiŋ ngbaan aagon ki koo ki ponn ni.

³ Baah nan gaa Jerusalem aatiŋ na, le Babiloŋ aabɔr aajab aaninkpiib mɔmɔk dan ki nan kal kal mbisamɔb mu bi yin mu ke Kaasisik ni Aabisamɔb na chee: Negal Sareser, ni Samgar Nebo, ni Sarsekim, ni Negal Sareser uken nan kpee bininkpiib ngbaan pu.

⁴ Ubɔr Sedekia ni waajab aah nan kan tiwan ni bi ŋani na, bi nan pɔɔk bibaa ke bi loon kinyeek ki san nya kitiŋ ngbaan ponn ni. Bi nan dii libɔrdichal aasaak ni, le ki dii mbisamɔb mu bi ŋigon ŋilee ngbaan aakaasisik ni na, ki nyan, ki di toŋ Jɔɔdann aafataŋ wɔb.

⁵ Babiloŋ aajab nan paan bi pu le ki ti chuu Sedekia, Jeriko chee, le ki di u buen ubɔr Nebukadnesar, u nan bi Ribla aatiŋ ki bi Hamaf aapepel ni na chee. Nima chee le Nebukadnesar nan ti jin u tibɔr ki siin baah ga ŋa u pu na.

⁶ Ribla aatiŋ ngbaan ponn ni, le Sedekia nan ka lik, le Nebukadnesar ku ujapɔtiib, ki ku waaninkpiib mu.

⁷ Nee aapuwɔb, le u cha bi chuu lokr nyan Sedekia aanimbil, ki di tikululn gbin u ke bi di u buen Babiloŋ aatiŋ ni.

⁸ N‑yoonn mue na, Babiloŋ yaab ngbaan nan see libɔrdichal, ni binib aadichal mu lii, ki tur Jerusalem aagon lir.

⁹ Kookoo na, Nebusaradann, u ye bijab ngbaan aayidaan na nan chur binib bi nan gur Jerusalem ni na, ki di kpee bi nan san ti kpee u pu na buen Babiloŋ ni, tinaagbiir ni.

¹⁰ U nan di cha bigiim bi bi Juda aatiŋ pu kaa kpa nibaa na, le ki tii bi ikpaakon ni ŋisubil aasui aasar.

Baah nyan Jeremia kiyondiik ni pu na

¹¹ Tɔ, Ubɔr Nebukadnesar nan bui uyidaan Nebusaradann ke u ŋa tiwan nimina:

¹² “Li cha ki ti ban kan Jeremia ki li joo u mbamɔm. Taa tii u titotonn tibaa, ki tee ŋa waah ban pu na mɔmɔk.”

¹³ Le Nebusaradann ni bininkpiib, Nebusasbann, ni Negal Sareser, ni Babiloŋ aabɔr aaninkpiib mɔmɔk

¹⁴ nan ti nyan ni mi libɔrchiln ni. Bi nan di mi ŋa Gedalia, u aate ye Ahikam, aan uyaaja ye Safann na aaŋaal ni la, ke u li joo mi mbamɔm ti fuu linampal. Kina pu na, m nan gur koo maanib chee la.

Ebed Melek aah kpa limakl pu na

¹⁵ Maah nan laa beenin bi kiyondiik ni libɔrchiln ni na, le Uwumbɔr nan bui mi

¹⁶ ke m tuk Ebed Melek, u ye Kus aanii na ke Uwumbɔr Mpɔɔnsakpiindaan, u ye Israel yaab Aawumbɔr na len ke, “Maah nan len ke m ga ŋa pu na, m ban m joo ni kitiŋ kimina libiil la, naan li ye nkam. Nimina yaa nan ŋa kan, aa ga li bi nima ki kan ni,

¹⁷ le min Uwumbɔr ga li kii si, bi taa di si tii bijab bi aa san bi ijawaan na.

¹⁸ M ga li kii si, le baan ku si. Saah kii tii mi pu na le ga cha aa ŋmar. Min Uwumbɔr le len kina.”