Jeremia 38 - Uwumbɔr aagbaŋ

Jeremia aah nan bi nnyunbunkuun ponn ni pu na

¹ Matann aajapɔɔn Sefatia, ni Pasur aajapɔɔn Gedalia, ni Selemia aajapɔɔn Jehukal, ni Malkia aajapɔɔn Pasur nan ŋun ke m bi tuk binib

² ke Uwumbɔr bui ke, “Unii umɔk beenin koo kitiŋ ngbaan ni na, ga kpo butɔb, ni nkon, ni iween aakun la. Le uma di ubaa ti tii Babiloŋ aajab na aan kpo; u ga minn nkun.”

³ M nan ki bi tuk binib ngbaan ke Uwumbɔr bui ke, “M ga di kitiŋ kimina tii Babiloŋ aajab, le bi ga nyaŋ ki.”

⁴ Le bininkpiib ngbaan buen ubɔr chee ki ti len ke, “Ni ŋeer ke ti ku uja umina. Waah bi len pu na ga cha bijab bi bi kitiŋ kee ponn ni na aataakpab yɔl, u bi ŋani unii umɔk gur kitiŋ kee ponn ni na tiwanbaan ngbaan la. Waa ban ke u ter binib ngbaan, u ban u tii bi tibɔr la.”

⁵ Le Ubɔr Sedekia gar bi ke, “Ni ŋan, kina kan, ŋa u naah gee pu na man; maan ŋmaa bui ke ni di cha.”

⁶ Le bi nan yoor mi ki ti di iŋmin leen ŋŋaal ki di mi lii nnyunbun mu bi yin mu ke Ubɔrbo Malkia aanyunbun na ni, mu nan bi libɔrdichal aachiln ni la. Nnyun aa nan bi mu ponn ni, tikpakpar ŋmeen le nan bi mu ponn ni, le m chɔb sil ti ponn ni.

⁷ Tɔ, Kus aatiŋ aaja, u bi nan yin u ke Ebed Melek, ki ye uja u bi chuu lee nyan waajawan, aan u ye ututunn libɔrchiln ni na, nan ŋun ke bi di mi ti ŋa nnyunbun ngbaan ni. N‑yoonn ngbaan, ubɔr nan ka Benjaminn Aabisamɔb chee ji binib tibɔr.

⁸ Le Ebed Melek buen nima ki ti bui ubɔr ke,

⁹ “Mpɔɔndaan, bijab bimina aah ŋa pu na aa ŋan. Bi di Jeremia di ŋa nnyunbun ni; tijikaar aah kaa ki bi kitiŋ kimina ponn ni na, nkon le ga ku u nima.”

¹⁰ Le ubɔr nan bui Ebed Melek ke u ban bijab bitaa ki ti nya ni mi, m taa kee kpo.

¹¹ Le Ebed Melek ni bijab ngbaan buen libɔrdichal aawan aah bi kidiik ki ponn ni na, le ki ti ban tikekekpir di leen iŋmin pu ki di lii ni m chee.

¹² U nan bui mi ke m di ti ŋa ŋŋmaŋ ni, aan iŋmin ngbaan taa muen mi. M nan ŋa kina,

¹³ le bi daa nyan ni mi nnyunbun ngbaan ni. Nee aapuwɔb na, m nan gur bi libɔrchiln ni la.

Sedekia aah bui ke Jeremia sur u pu na

¹⁴ N‑yoonn mubaa le Ubɔr Sedekia nan ki cha bi joo ni mi u chee Uwumbɔr Aadichal aabisamɔb tatar na chee. U nan bui mi ke, “M ban m baa si mbaan mubaa la, m mu ban ke aa bui mi mbamɔn la.”

¹⁵ Le m gar u ke, “M yaa tuk si mbamɔn kan, aa ga ku mi, m yaa ti ki sur si kan, saan ŋun tii mi.”

¹⁶ Le Ubɔr Sedekia nan loon ki puu tii mi ke, “M puu Uwumbɔr u bi, ki tii timi limɔfal na, ke maan ku si, kaan di si tii binib bi ban bi ku si na.”

¹⁷ Le m bui Sedekia ke Uwumbɔr Mpɔɔnsakpiindaan, u ye Israel yaab Aawumbɔr na len ke, “Aa yaa ti di aabaa tii Babiloŋ aabɔr aajab aaninkpiib kan, saan kpo, kitiŋ kee mu aan wu mmii. Aa ni saadichal mɔmɔk ga ŋmar.

¹⁸ Tɔ, aa yaa yii kaa ti di aabaa tii bi kan, Uwumbɔr ga cha Babiloŋ yaab gaa kitiŋ kimina, ki see ki mmii, le saan ŋmaa ŋmar bi chee.”

¹⁹ Le ubɔr ngbaan gar mi ke, “M san tido yaab bi ti kpee Babiloŋ yaab pu na le ijawaan. Nibaakan, bi ga di mi tii bi le bi saan mi.”

²⁰ Le m bui u ke, “Baan di si tii bi. M gaŋ si ke aa kii Uwumbɔr aabɔr, ki cha kinyaan dan aa chee, le aa ŋmar.

²¹ Tɔ, Uwumbɔr mɔk mi tibɔkpiirkaan ponn ni tiwan ni ga ŋa si buyoonn aa yii kaa di aabaa tii bi na.

²² Ti ponn ni, m nan kan bi joo bipiib bi gur Juda aabɔrchiln ni na cha Babiloŋ aajab aaninkpiib chee. Li pel baah nan cha ki len pu na: ‘Ubɔr aajɔtiib bi gee u sakpen na ŋmann u a, bima le gur joo u. Le waah ti chɔb bee tikpakpar ni na, le bi san cha u.’”

²³ Le m ki len ke, “Saapiib, ni saabim mɔmɔk ga koo Babiloŋ yaab aaŋaal ni, le sin aabaa aan ŋmar bi chee. Babiloŋ aabɔr ga chuu si tinaagbiir, le kitiŋ kimina ga wu mmii pel pel.”

²⁴ Le Sedekia gar mi ke, “Taa cha tibɔr tee nya, ki li kpa limɔfal.

²⁵ Bininkpiib yaa ŋun ke ti kal ki gbaa tibɔr kan, bi ga nan baa si ke ti gbaa ba aabɔr. Bi ga puu ke aa yaa tuk bi ti mɔmɔk kan, baan ku si.

²⁶ Bui bi ke aa bi gaŋni mi ke m taa di si giin kiyondiik ni aan aa ti kpo nima la.”

²⁷ Bininkpiib ngbaan mɔmɔk nan sil dan ki nan baa mi, le m tuk bi ubɔr aah nan bui mi ke m tuk bi pu na. Ubaa aah kaa nan ŋun taah gbaa tibɔr ti na, baa nan ki ŋmaa ŋa nibaa.

²⁸ M nan bi libɔrchiln ni ki ti saa nwiin mundaal bi nyaŋ Jerusalem na.