Jeremia 37 - Uwumbɔr aagbaŋ

Sedekia aah nan mee Jeremia pu na

¹ Babiloŋ Aabɔr Nebukadnesar nan nyan Jehoyakim aajapɔɔn Jehoyachinn, Juda aanaan ni, le ki di Josia aajapɔɔn Sedekia ŋa ubɔr.

² Tɔ, Sedekia ni waaninkpiib, ni Juda aanib aa nan kii tii Uwumbɔr aah di waabɔr ti tuk bi na.

³ Ubɔr Sedekia nan di Selemia aajapɔɔn Jehukal ni utotoor Sefania, u aate nan ye Maaseya na tun ni ke bi nan bui mi ke m mee Tidindaan Uwumbɔr timi aatimbol pu.

⁴ N‑yoonn ngbaan baa nan kee chuu mi laŋ kiyondiik ni, le m nan beenin chuun binib ni maageehn.

⁵ Babiloŋ aajab nan beenin looni Jerusalem, le baah ŋun ke Ijipt aajab puur baatiŋ aanaanmɔk ki choo na, le bi gir chaa kun.

⁶ Le Uwumbɔr u ye Israel yaab Aawumbɔr na bui mi ke

⁷ m tuk Sedekia ke, “Ijipt aajab choo ke bi nan ter si, tɔ, bi mu ga gir kun.

⁸ Le Babiloŋ aajab ga gir ni ki nan tak kitiŋ kee, ki nyaŋ ki, ki see ki mmii.

⁹ Min Uwumbɔr le sur si ke ni taa ŋmann nibaa ki dakl ke Babiloŋ aajab aan ki gir ni, ba pu? bi ga gir ni.

¹⁰ Aa yaa nyaŋ Babiloŋ aajab ngbaan mɔmɔk, le bi kan titotonn na baanja gur dɔ baaboo ni kan, bijabaab ngbaan le ga ki fii ki see kitiŋ kee aan ki wu pel pel.”

Baah chuu Jeremia laŋ kiyondiik ni pu na

¹¹ Ijipt aajab aah nan choo na, le Babiloŋ aajab gir kun.

¹² Le m nan nyan Jerusalem ki cha Benjaminn aapepel ni, maatiŋ ni, m ti kal maafaal aatiŋ pu.

¹³ Maah ti fuu mbisamɔb mu bi yin mu ke Benjaminn Aabisamɔb chee na, le bijab bi si kii nima na aaninkpel, aan bi yin u ke Irija, aan ute ye Selemia, u mu aate nan ye Hanania na, kiir mi ke m taa jer, le ki bui mi ke, “Aa san aa ti kpee Babiloŋ aajab pu la.”

¹⁴ Le m gar u ke, “Aayii. Maa san.” Le Irija aa nan ŋun tii mi. U nan cha bi chuu mi le ki di mi buen bininkpiib chee.

¹⁵ Bisui nan fii m pu, le bi bui ke bi gbaa mi, ki di mi ti laŋ Jonatann do. U nan ye ubɔr aagbaŋmeer la, le bi nan di udo ŋa tiyondir.

¹⁶ Bi nan ti di mi ŋa mbuu ni taab la, le m nan bi nima ni yunn pam.

¹⁷ N‑yoonn mubaa Ubɔr Sedekia nan tun yin mi, le ki nan bui mi libɔrchiln ni nima, libɔɔl ni, ke, “Uwumbɔr kpa tibɔr u tii timi ii?” Le m gar u ke, “Ti bi. Bi ga di si ŋa Babiloŋ aabɔr aaŋaal ni.”

¹⁸ Le m baa u ke, “M tun aa ni saaninkpiib ni binib bee ba aataani ki ŋeer ke ni di mi ŋa kiyondiik ni?

¹⁹ Bibɔnabr bi tuk si ke Babiloŋ aabɔr aan tak si ni saatiŋ na bi la chee?

²⁰ Tɔ, mpɔɔndaan, m gaŋ si ke aa ŋun tii mi ki ŋa maah tuk si pu na. M gaŋ si ke aa taa ki giin mi kiyondiik ki bi Jonatann do na ni. Aa yaa yii kan, ni ye mbamɔn le ke m ga ti kpo nima.”

²¹ Le Ubɔr Sedekia cha bi di mi ti laŋ libɔrchiln ponn ni. M nan bi nima, le nwiin mɔk kan, bi joo boroboro likpiln libaa nya ni baah pu boroboro nin chee na nan tii mi, ki ti saa bundaal boroboro nan doo kitiŋ ngbaan pu na.