Jeremia 36 - Uwumbɔr aagbaŋ

Baruk aah karn kigbaŋ Uwumbɔr Aadichal ni pu na

¹ Josia aajapɔɔn Jehoyakim aah nan ye Juda aabɔr pu na aabinanar ponn ni, le Uwumbɔr nan bui mi ke,

² “Ban kigbaŋ ki ŋmee maah tuk si Israel, ni Juda, ni ŋitimbol mɔmɔk aabɔr ti na ŋa ki ponn ni. Ŋmee maah nan piin bundaal ki len aa chee tibɔr na, buyoonn Josia nan ye ubɔr na, ki nan saa din wee na.

³ Nibaakan, Juda aanib yaa ŋun libiil li mɔmɔk m ban m joo ni bi pu na kan, bi ga di cha baabimbin mu kaa ŋan na. Le m ga di baatunwanbir ni baabiin aatuln cha pinn bi.”

⁴ Le m yin Neria aajapɔɔn Baruk le ki nan ka len tibɔr ti mɔmɔk Uwumbɔr bui mi na, le u ŋmee. Baruk nan ŋmee ti mɔmɔk ŋa kigbaŋ ngbaan pu.

⁵ Le m nan bui Baruk waah ga tun pu na. M bui u ke, “Baan ki kii ke m koo Uwumbɔr Aadichal ni.

⁶ Tɔ, m ban ke binib ngbaan yaa ki bi lulni bumɔb bundaal na kan, aa buen nima. Aa ti karn kigbaŋ ngbaan mpɔɔn pu, aan bi mɔmɔk ŋun tibɔr ti Uwumbɔr di tuk mi aan m mu cha aa ŋmee ti na. Aa karn ki nin chee bi mɔmɔk ga ŋun na; cha Juda aanib bi nyan ni baatim ponn ni ki dan na mu ŋun.

⁷ Nibaakan bi ga mee Uwumbɔr ki fenn bipuwɔb tii baatunwanbir, ba pu? Uwumbɔr aaŋuusakpeln ni, le u puu ke u ga daa bitafal pam.”

⁸ Baruk nan karn Uwumbɔr aamɔboln ngbaan, maah bui u pu na, Uwumbɔr Aadichal ni.

⁹ Jehoyakim aah nan ye Juda aabɔr pu na aabiŋmuŋmur aaŋmawae ni, le binib ngbaan nan bi lulni bumɔb ke Uwumbɔr san bi kinimbaak. Binib bi mɔmɔk koo Jerusalem ni na, ni bi mɔmɔk nyan ni Juda aatim ni na, le nan lul bumɔb ngbaan.

¹⁰ Tɔ, buyoonn binib ngbaan nan bi pel suuna na, le Baruk karn tibɔr ti mɔmɔk m nan tuk u na kigbaŋ ngbaan ni. U nan bi Safann aajapɔɔn Gemaria, u ye Uwumbɔr Aadichal aachiln ni aagbaŋmeer na aadiik ni le ki karn ki. Waadiik nan bi paacham aachiln ni, Uwumbɔr Aadichal aabisamɔb mu bi yin mu ke Mbisamɔpɔɔn na chee la.

Waah nan ki karn kigbaŋ tii bininkpiib mu pu na

¹¹ Gemaria, u aate nan ye Safann na aajapɔɔn Mikaya nan ŋun Baruk aah karn kigbaŋ ni, Uwumbɔr aah len pu na.

¹² Le u fii buen libɔrdichal ni ki ti koo libɔrchiln aagbaŋmeer aadiik ni, nin chee bininkpiib ngbaan mɔmɔk nan ka na. Ubɔr aagbaŋmeer Elisama, ni Semaya aajapɔɔn Delaya, ni Akbor aajapɔɔn Elnatann, ni Safann aajapɔɔn Gemaria, ni Hanania aajapɔɔn Sedekia, ni bininkpiib biken na mɔmɔk nan bi nima.

¹³ Mikaya nan tuk bi tibɔr ti mɔmɔk u nan ŋun Baruk karn tii binib ngbaan na.

¹⁴ Le bininkpiib ngbaan nan tun Netania aajapɔɔn Jehudi ‑ Netania aate le nan ye Selemia, u mu aate nan ye Kusi na ‑ ke u ti bui Baruk ke u li joo ni kigbaŋ ki u karn tii binib ngbaan na. Baruk nan joo ni kigbaŋ ngbaan nan tii bi.

¹⁵ Le bi bui ke, “Kal ki karn kigbaŋ ngbaan tii timi.” Le Baruk ŋa kina.

¹⁶ Waah karn ki ti doo na, le bi fenn lik tɔb, le ijawaan bi binimbil ni, le bi bui Baruk ke, “See ti tuk ubɔr tibɔr tee,”

¹⁷ le ki baa u ke, “Bui timi, ni ŋa kinye aan aa ti ŋmee tibɔr tee? Jeremia le bui si le aa ŋmee ee?”

¹⁸ Le Baruk gar bi ke, “Jeremia le ka len ti mɔmɔk le m di nnyun mu bi joo ŋmee tigbann na ŋmee ti ŋa kigbaŋ kee pu.”

¹⁹ Le bi bui u ke, “Ni ŋan ke aa ni Jeremia buen nibaa chee ti bɔr. Ni taa cha ubaa li nyi naah bɔr nin chee na.”

Ubɔr aah di kigbaŋ ngbaan see mmii ni pu na

²⁰ Bininkpiib ngbaan nan di kigbaŋ ngbaan bil ubɔr aagbaŋmeer Elisama aadiik ni, le ki buen libɔrchiln ni ki ti tuk ubɔr tibɔr ngbaan mɔmɔk.

²¹ Le ubɔr nan tun Jehudi ke u ti yoor ni kigbaŋ ngbaan. U nan ti yoor ni ki Elisama aadiik ni, le ki nan karn ki tii ubɔr ni waaninkpiib bi mɔmɔk si gob u na.

²² Ni nan ye kakab yoonn la, nima pu na, ubɔr nan ka kakab yoonn aabɔrchiln ni, mmii chee.

²³ Jehudi yaa ti karn ŋipepel ŋitaa bee ŋinaa doo kan, le ubɔr ti di kijuk chuu gii nima ki di mee lii mmii ni. U nan ŋani kina le kigbaŋ ngbaan mɔmɔk ti wun doo.

²⁴ Ubɔr ni waaninkpiib bi nan ŋun kigbaŋ ngbaan aabɔr na ubaa aa nan kpa mpombiin, kaa san ijawaan aawan nibaa.

²⁵ Elnatann, ni Delaya, ni Gemaria ma nan gaŋ ubɔr ke u taa cha kigbaŋ ngbaan wu mmii, u mu aa nan koi gar bi.

²⁶ Le u bui waabo Jerameel, ni Asriel aajapɔɔn Seraya, ni Abdeel aajapɔɔn Selemia ke bi chuu m ni maagbaŋmeer Baruk. Tɔ, Uwumbɔr nan bɔr timi, baa ŋmaa kan timi.

Jeremia aah ki gir ŋmee kigbaŋ kiken pu na

²⁷ Ubɔr Jehoyakim aah nan di maah ŋeer tibɔr ti tuk Baruk aan u ŋmee ti na see mmii na aapuwɔb,

²⁸ le Uwumbɔr ki bui mi ke m ki ban kigbaŋ ki ŋmee tiwan ni mɔmɔk m nan ŋmee ŋa njan yaak ni na.

²⁹ Uwumbɔr nan bui mi ke m tuk ubɔr ke, “Aa see kigbaŋ ngbaan mmii, le ki baa Jeremia ke ba ŋa u ŋmee kigbaŋ ke Babiloŋ aabɔr ga dan ki nan kuln kitiŋ kee ki ku kaanib ni tiwakor.

³⁰ Min Uwumbɔr le bui sin Ubɔr Jehoyakim, ke aayaabil ubaa aan kal Ubɔr David aanaanjal pu. Bi ga di saawon mee, le nwiin gbaa ti nwiin pu, le limaln mu gbaa ti kinyeek.

³¹ M ga daa aatafal, ki daa aayaabitiib, ni saaninkpiib aatafal titunwanbir ti ni mɔmɔk tun na pu. Aa ni Jerusalem ni Juda aanib yii kaa pel maah sak nimi pu na, kina pu le m ga cha ni kan tibɔbir ti m puu ke ni ga kan ti na.”

³² M nan ki yoor kigbaŋ kiken tii maagbaŋmeer Baruk, le u ŋmee tibɔr ti mɔmɔk m di tuk u na. U nan ŋmee tibɔr ti mɔmɔk nan bi njan aagbaŋ na ponn ni na, ni kina aabɔr ti m nan tuk u ke u ŋmee na.