Jeremia 35 - Uwumbɔr aagbaŋ

Jeremia ni Rekab aataŋaal yaab

¹ Josia aajapɔɔn Jehoyakim aah nan ye Juda aabɔr na, le Uwumbɔr nan bui mi ke,

² “Li cha Rekab aataŋaal yaab chee ki ti li joo ni bi Maadichal ponn ni aadiik kibaa ni, ki nan tii bi ndaan.”

³ Le m nan ti yoor ni Rekab aataŋaal ngbaan mɔmɔk, Jeremia uken aajapɔɔn Jaasania, Jeremia ngbaan mu aate le nan ye Habasinia, ni unaatiib, ni waabim,

⁴ le ki joo ni bi Uwumbɔr Aadichal ni. M nan di bi buen ubɔnabr Hanann, u aate ye Igdalia na aadidiliib aadiik ni la. Kidiik kimina nan bi Salum aajapɔɔn Maaseya, u nan ye Uwumbɔr Aadichal ni aanikpaan ubaa na aadiik aapaacham la, le ki bi duun bininkpiib biken aadir.

⁵ Le m nan di tiyikur ni ŋidabuu siin Rekab yaab ngbaan, le ki bui bi ke, “Nyu ndaan man.”

⁶ Le bi gar mi ke, “Taa nyu ndaan. Tiyaaja Rekab aajapɔɔn Jonadab nan bui timi ke timi ni tiyaabitiib taa nyu ndaan mubaa.

⁷ U nan ki bui timi ke ti taa maa tidir, ki taa ko tisar, ki taa ŋum ndaan aasubil aasui ki taa daa i mu. U nan siin ke ti li koo igban aaboo ni, timi aamɔfal ni, aan ki li ye bicham kitiŋ kee pu n‑yoonn mɔmɔk.

⁸ Ti joo ikaal i mɔmɔk tiyaaja Jonadab nan di tii timi na. Timi tibaa aa nyu ndaan, le tipuutiib, ni tijapɔtiib, ni tibisatiib mu aa nyu.

^9-10 Taa maa tidir ke ti li koo, ti koo igban aaboo ŋmeen ni la, le kaa kpa ndaan aasubil aasar, kaa kpa ikpaakon, ni njikaabim mu. Ti kii tii ikaal i mɔmɔk tiyaaja Jonadab nan siin tii timi na.

¹¹ Le Ubɔr Nebukadnesar aah nan di waajab koo kitiŋ ngbaan ni na, ti nan bui ke ti ga dan Jerusalem ni do ki nya Babiloŋ ni Siria aajab ni. Nima pu le ti koo Jerusalem ponn ni do.”

^12-13 Le Uwumbɔr Mpɔɔnsakpiindaan, u ye Israel yaab Aawumbɔr na bui mi ke m ti tuk Juda ni Jerusalem aanib ke, “Min Uwumbɔr baa nimi ke ba ŋa naan ŋun tii mi ki kii maakaal.

¹⁴ Jonadab aayaabitiib kii tii waakaal kaa nyu ndaan, ki di nan saa din, bi ponn ni ubaa aa nyu ndaan. Le m ma len ni chee ki gir len, le naan kii tii mi.

¹⁵ M beenin tun ni maatutum bi ye bibɔnabr na ni chee, le bi tuk nimi ke ni di cha nimi aabimbin mu kaa ŋan na, ki tun ni ŋan na. Bi sak nimi ke ni taa tun tii ŋiwaa, ki taa dooni ŋi, aan ki li beenin bi kitiŋ ki m nan di tii niyaajatiib na pu. Le naan ŋun tii mi, kaa pel m chee kpala.

¹⁶ Jonadab aayaabitiib ma kii tii ikaal i biyaaja Jonadab nan di tii bi na, le nimi ma aa kii maamɔb.

¹⁷ Kina pu na, min Uwumbɔr Mpɔɔnsakpiindaan u ye Israel yaab Aawumbɔr na ga cha libiil li m puu ke li ga dan na, dan nimi Juda ni Jerusalem aanib pu. Maah len ni chee aan naa pel, ki yin nimi aan naa kii na, le ga cha m ŋa kina.”

¹⁸ Le m bui Rekab yaab ngbaan ke Uwumbɔr Mpɔɔnsakpiindaan u ye Israel yaab Aawumbɔr na len ke, “Ni kii tii ikaal i niyaaja Jonadab nan di tii nimi na; ni dii waamɔkm mɔmɔk, le ki ŋa tiwan nimɔk u siin tii nimi na.

¹⁹ Kina pu na, min, Uwumbɔr Mpɔɔnsakpiindaan u ye Israel yaab Aawumbɔr na, puu ke Rekab aajapɔɔn Jonadab ga li kpa yaabil u ga li tun maatuln n‑yoonn mɔmɔk na.”