Jeremia 34 - Uwumbɔr aagbaŋ

Uwumbɔr aah nan di tibɔr ti tii mi ke m di tuk ubɔr Sedekia na

¹ Buyoonn Babiloŋ Aabɔr Nebukadnesar ni waajab, ki di kpee ŋitimbol ni ŋinibol ŋi mɔmɔk nan bi u taab na aajab, nan bi tak Jerusalem ni ntim mu bi gbɔk ki na, le Uwumbɔr nan ki len m chee tibɔr.

² Uwumbɔr u ye Israel yaab Aawumbɔr na, nan bui mi ke m ti tuk Juda Aabɔr Sedekia ke, “Min Uwumbɔr ga di kitiŋ kimina tii Babiloŋ aabɔr, le u see ki mmii.

³ Saan ŋmar; bi ga chuu si le ki di si tii u. Aanimbil ga kan u gbin gbin le aa ni uma len tɔb chee tibɔr; le bi di si buen Babiloŋ aatiŋ ni.

⁴ Sedekia, li pel maah kpa saabɔr ti m len na. Baan ku si butɔb ni.

⁵ Aa ga kpo nsuudoon ni la, le binib aah nan seer tulalee aayon pu aan bi sub aayaajatiib bi nan puen ye bibɔrb na, kina le bi ga see tulalee aayon mmii ni tii aa mu. Bi ga wii saakpuul le ki bui ke, ‘Timi aabɔr kpo a.’ Min Uwumbɔr le len kina.”

⁶ Le m nan di tibɔr ngbaan tuk Sedekia, Jerusalem ni,

⁷ buyoonn Babiloŋ aabɔr aajab nan bi tak kitiŋ ngbaan na. Bijab ngbaan ki bi tak Lakis, ni Aseka, Juda aatim mulee mu baanja nan gur ki kpa tijawan aan bi maa ŋigon gob mu na mu.

Baah nan ŋmanni binaagbiib pu na

⁸ Ubɔr Sedekia ni Jerusalem aanib nan ŋa kimɔbaan ke

⁹ bi di baanaagbiib bi ye Israel aanib, ki ye bijab ni bipiib na lii, ubaa taa ki li kpa unaagbiinii u ye Israel aanii na.

¹⁰ Binib ngbaan mɔmɔk ni baayidam nan kii ke bi di baanaagbiib lii ki taa ki gir chuu bi. Bi nan sil di bi lii,

¹¹ le naa woln kitaak le bi ki kpeln baalandak, le ki ki chur bi mpɔɔn ŋa tinaagbiir ni lelee.

¹² Le Uwumbɔr

¹³ u ye Israel yaab Aawumbɔr na, bui mi ke m tuk binib ngbaan ke: “Maah nan gaa niyaajatiib Ijipt yaab chee lii na, m nan puu tipuur tii bi.

¹⁴ M bui bi ke libilolole mɔk ni kan, bi di baanaagbiib bi ye Israel yaab ki tun ŋibin ŋiloob tii bi na lii. Le niyaajatiib aa nan ŋun tii mi, kaa nan pel maah len pu na.

¹⁵ Iwiin ilee i jer na, ni nan kpeln nimi aalandak ki ŋa tiwan ni piir nsui na. Ni mɔmɔk nan kii ke ni di nimi aanaagbiib bi ye Israel yaab na lii, le ki puu tipuur nnimbiin ni, Maadichal li ponn ni bi dooni mi na.

¹⁶ Tɔ, le ni ki kpeln nimi aalandak ki lik seen mi. Ni mɔmɔk ki gir chur nimi aanaagbiib bi ni nan di lii aan bi gee kina na, le ki ki chuu bi mpɔɔn ŋa tinaagbiir ni lelee.

¹⁷ Le min Uwumbɔr bui ke ni yii maamɔboln, ke naan tii nina aabitiib Israel yaab lifuur li bi ban na. Kina pu na, m ga tii nimi lifuur, m ga tii nimi lifuur ke ni kpo butɔb ni, ni iween ni, ni nkon ni. Maah ga ŋa nimi pu na ga cha dulnyaa wee aatimbol mɔmɔk san ijawaan.

^18-19 Juda ni Jerusalem aaninkpiib, ki di kpee libɔrchiln ni aaninkpiib, ni bitotoorb, ni biyidam mɔmɔk nan puu tipuur tii mi, ki ku unaaja ki bɔkl u ŋibɔk ŋilee, ki chuun ŋibɔk ngbaan aasisik ni ki jer. Le bi nan bii tipuur ngbaan, kaa joo taah len pu na. Kina pu na, m ga ŋa bi baah nan ŋa unaaja ngbaan pu na.

²⁰ M ga di bi tii baadim bi ban bi ku bi na, le baanikpol ga li ye inyoon ni ipeel aajikaar.

²¹ M ga ki di Juda Aabɔr Sedekia ni waaninkpiib tii binib bi ban ke bi ku bi na. M ga di bi tii Babiloŋ aajab bi di cha kaa ki bi tak nimi na.

²² M ga lii bi bumɔb le bi ki gir ni kitiŋ kee pu. Bi ga tak ki, ki nyaŋ ki, le ki see ki mmii. M ga ŋa Juda aatim ke nteersakpiin mu pu ubaa aa koo na la. Min Uwumbɔr le len kina.”