Jeremia 33 - Uwumbɔr aagbaŋ

Limakl aapuur tiken

¹ Maah nan beenin bi kiyondiik ni, libɔrchiln ni na, le Uwumbɔr nan ki len m chee tibɔr.

² Uma u aayimbil ye Uwumbɔr, aan u naan taab, ki toor, ki di ki siin na, nan len m chee tibɔr ke,

³ “Yin mi, le m ga kii si; m ga bui si tibɔkpaan ni iwaan aawan ni saan nyi naabɔr na.

^4-5 Min Uwumbɔr u ye Israel yaab Aawumbɔr na, bui ke Jerusalem aadichal ni Juda aanaan aadichal ga ber. Naa kpa tinyoor ke ni buen ti jan Babiloŋ yaab bi gob nimi aatiŋ na kijaak. Nimina ga cha maaŋuusakpeln aah fii binib bi pu aan m ban m faa ku bi na aanikpol le gbiin kitiŋ kee ni. Kaanib aah tun titunwanbir ti na pu le m fenn mpuwɔb tii ki.

⁶ Tɔ, m tee ga tii kitiŋ kee, ni kaanib lifuur, ki cha bi ki li kpa laafee. M ga tii bi nsuudoon mu ga yunn na, ni ŋŋmarm.

⁷ M ga cha Juda ni Israel yaab kan nkam, m ga ki gir siin bi ke baah nan bi pu na.

⁸ M ga finn nyan bi titunwanbir ti bi tun mi na ni, le ki di baatunwanbir, ni baah yii maamɔb pu na cha pinn bi.

⁹ Jerusalem ni le maamɔɔn, ni bunyuŋ, ni limakl ga li nya ni, le dulnyaa wee aatimbol li ŋun maah ŋani tiwanyaan ni tii Jerusalem aanib, ni nkam mu m joo ni kitiŋ ngbaan ni na pu kan, biwon ga li gbaa, le bi san ijawaan.”

¹⁰ Uwumbɔr bui ke, “Binib len le ke do chee na bi ke nteersakpiin ni na la, ke binib ni tiwakor aa koo nima. Ni mu sil ye mbamɔn; Juda aatim ni Jerusalem aatiŋ ponn ni ye nkuun la; binib ni tiwakor aa bi nima. Tɔ, ntim ngbaan ni, le ni ga ki ŋun mpopiin,

¹¹ ni mmɔɔn, ni tibɔndinn aajim aakuun aafuuk pu. Ni ga ŋun binib aah joo ni baadoon aapiin Maadichal ni ki gaa ilahn pu na; bi ga len ke, ‘Di idoon tii Uwumbɔr Mpɔɔnsakpiindaan man, u kpa tiŋann, le waageehm aa kpa ndoon.’ M ga cha kitiŋ kee ki kan nkam ke kaah nan bi pu njan na. Min Uwumbɔr le len kina.”

¹² Uwumbɔr Mpɔɔnsakpiindaan ki len ke, “Kitiŋ ki bi ke nteersakpiin na, binib ni tiwakor aa bi na ni, le bipihdam ga ki di baapiih buen mmoŋmɔpaan ni, nima chee.

¹³ Bipihkpaab ga ki kahn baapiih ntim mu bi ŋigongon aatiŋ pu na, ni taab aagongon aatim ni, ni Juda aaŋangii wɔb, ni Benjaminn aapepel ni, ni ntimbim mu bi gbɔk Jerusalem na ni, ni Juda aatim ni. Min Uwumbɔr le len kina.”

¹⁴ Uwumbɔr ki len ke, “N‑yoonn choo, le m ga cha maah nan puu tipuur ti tii Israel ni Juda yaab na gbiin.

¹⁵ N‑yoonn ngbaan le m ga lee Ubɔrkpaan David aayaabil u aabimbin ŋan na ŋa ubɔr. Ubɔr ngbaan ga ti tun ni ŋan ki ye ibamɔn na le kitiŋ ngbaan mɔmɔk pu.

¹⁶ Le Juda ni Jerusalem aanib ga ŋmar ki li bi nsuudoon ni. Bi ga li yin kitiŋ ngbaan ke, ‘Uwumbɔr u gaal timi lir na.’

¹⁷ Min Uwumbɔr puu ke Ubɔr David aayaabitiib ga li bi n‑yoonn mɔmɔk ki ji Israel yaab aanaan.

¹⁸ Le bitotoorb mu ga li bi ki nyan ni Liifai aanibol ni ki li tun maatuln, ki joo ni kitork ki ga see mmii ni na, ni njikaabim aapiin, ni titoor ti gur na.”

¹⁹ Uwumbɔr nan ki bui mi ke,

²⁰ “M ni nwiin pu ni kinyeek puu tipuur tii tɔb la, ke ni li choo n‑yoonn mu m siin ni na, le tipuur ngbaan aa kpa ke ti bii.

²¹ Kina le m puu tipuur tii maatutunn Ubɔr David ke u ga li kpa yaabil n‑yoonn mɔmɔk aan u li ye ubɔr, le ki puu tii bitotoorb bi nyan ni Liifai aanibol ni na ke bi li tun maatuln n‑yoonn mɔmɔk; le tipuur ngbaan mu aa kpa ke ti bii.

²² M ga cha maatutunn Ubɔr David aayaabitiib ni Liifai aanibol moo too pɔr, le unii aan ŋmaa kahn bi ke unii aah kaa ŋmaa kahn iŋmabi i bi kitaapaak na, ni litambol li dɔ nnyusakpem aagbaan na pu na.”

²³ Uwumbɔr nan ki bui mi ke,

²⁴ “Saa kan binib aah bi len ke m yii ŋidichal ŋilee, ŋi ye Israel ni Juda aanib bi min mbaa nan lee bi na aa? Kina pu le bi lik maanib fam, kaa ki kahn bi sakni ŋitimbol ni.

²⁵ Le min Uwumbɔr puu tipuur tii nwiin pu, ni kinyeek, le ki siin ikaal i joo taab ni kitaapaak na.

²⁶ Ni ye mbamɔn ke maah ŋa kina pu na, kina le m ga li beenin joo tipuur ti m puu tii Jakob aayaabitiib, ni maatutunn Ubɔr David na. M ga lee Ubɔr David aayaabitiib ponn ni ubaa le u li joo Abraham, ni Aisak, ni Jakob aayaabitiib. M ga san maanib kinimbaak ki cha bi ki kan nkam.”