Jeremia 32 - Uwumbɔr aagbaŋ

Jeremia aah daa nkpaakon pu na aabɔr

¹ Sedekia aah nan ye Juda aabɔr pu na aabin kipiik ni le Uwumbɔr nan len m chee tibɔr. Libiln ngbaan le nan ye Babiloŋ Aabɔr Nebukadnesar mu aabin kipiik ni ŋiniin nnaan ni.

² N‑yoonn ngbaan le Babiloŋ aabɔr aajab nan bi tak Jerusalem, le m mu laŋ libɔrdichal aachiln ni.

³ Ubɔr Sedekia nan di mi laŋ nima ki galn mi ke m moon ke Uwumbɔr bui ke, “M ga cha Babiloŋ aabɔr nyaŋ kitiŋ kee

⁴ le Ubɔr Sedekia aan ŋmar. Bi ga di u tii Babiloŋ aabɔr; unimbil ga kan u gbin gbin, le ki len u chee tibɔr.

⁵ Bi ga di Sedekia buen Babiloŋ ni, le u ga ti gaar nima ki ti saa buyoonn m ga chiin u na. U yaa jan Babiloŋ yaab kijaak kan, waan ŋmaa nyaŋ bi. Min Uwumbɔr le len kina.”

⁶ Uwumbɔr nan bui mi

⁷ ke nweeja Salum aajapɔɔn Hanamel ga dan ki nan bui mi ke u ban u di waakpaakon mu bi Anatof aatiŋ ki bi Benjaminn aapepel ni na kooh m pu la, ba pu? mi le ye udo yoo u kpa nsan ke m daa mu na.

⁸ Tɔ, Uwumbɔr aah sil len pu na, Hanamel nan dan m chee libɔrchiln ni nima, ki nan bui mi ke m daa nkpaakon ngbaan. Le m bee ke Uwumbɔr sil len m chee tibɔr.

⁹ M nan daa nkpaakon ngbaan Hanamel chee le ki kahn ŋimombil pan u; kidaak nan ti sil tikunabr aakur aamombil kipiik ni ŋilole.

¹⁰ M nan nyii ŋŋaal kigbaŋ ki bi kpab ki na, le ki cha biseeraadam mu nyii, le ki ŋaŋ ŋimombil ngbaan likar pu.

¹¹ Le m yoor tigbann tilee ngbaan: kigbaŋ ki kpab, ki kpa taah siin tɔb pu na, ni tibɔr ngbaan aabimbin aah ye pu na, ni kigbaŋ ki kaa kpab na,

¹² le ki ti di ti tii Neria aajapɔɔn Baruk, u aayaaja ye Mahseya na. M nan di ti tii u Hanamel ni biseeraadam bi nan nyii biŋaal na, ni bijab bi nan ka libɔrchiln ni na mɔmɔk aanimbil ni la.

¹³ Bi mɔmɔk aanimbil ni nima le m nan bui Baruk ke,

¹⁴ “Uwumbɔr Mpɔɔnsakpiindaan, u ye Israel yaab Aawumbɔr na, le bui si ke aa gaa tigbann tee, kigbaŋ ki kpab na, ni kigbaŋ ki kaa kpab na, ki di ti ŋa libuul ponn ni, aan ti li bi nima ki yunn.

¹⁵ Uwumbɔr Mpɔɔnsakpiindaan, u ye Israel yaab Aawumbɔr na, bui ke bi ga nan ki daa ŋidichal, ni ikpaakon, ni ŋisubil aasar kitiŋ kee pu.”

Jeremia aah mee limeel li na

¹⁶ Maah di tigbann ngbaan tii Baruk ti doo na, le m mee limeel ke,

¹⁷ “Ndindaan Uwumbɔr, aabaa aapɔɔn mu nyaŋ na le aa di naan taab ni kitaapaak; tiwan nibaa aa pɔɔ aa chee.

¹⁸ Aa mɔk binib ŋichur ŋichur saageehm mu bi n‑yoonn mɔmɔk na, le ki mu dar binib aatafal, bitetiib aatunwanbir pu. Aa ye Uwumbɔr u aapɔɔn nyaŋ na la; sin le ye Uwumbɔr Mpɔɔnsakpiindaan.

¹⁹ Aa dak ilandak nyaan ki tun ŋitukpaan; aa kani binib aah ŋani tiwan ni mɔmɔk na, le ki pa bi baatun aah ŋeer pu na.

²⁰ N‑yaayoonn na, aa nan tun lijinjiir ni iwaan aatun Ijipt aatiŋ ni, le ki beenin tun ŋi ki nan saa din; aa tun ŋi Israel aatimbol, ni ŋitimbol ŋiken ponn ni, le dandana unii mɔmɔk nyi si, ni kookoo.

²¹ Saajinjiir ni iwaan aatun le nan cha ijawaan chuu timi aadim, le aa di saapɔɔn nyan ni saanib Israel yaab, Ijipt aatiŋ ni.

²² Aa nan tii bi kitiŋ kimina, kitiŋ ki nyuun ki kpa liwangol na, ke saah nan puu tii biyaajatiib pu na.

²³ Baah nan koo ni kitiŋ kee pu ki gaa ki na, bi nan yii saah nan bui bi ke bi li bi pu na, kaa nan bi saah mɔk bi ke bi li bi pu na. Baa nan ŋa saah bui bi pu na tiwan nibaa, kina pu le aa joo ni tibɔbir tee mɔmɔk nan lii bi pu.

²⁴ “Babiloŋ yaab maa ŋikɔl ŋikɔl kitiŋ kimina aagon aataab ke bi nyaŋ ki, le ki bi tak ki. Butɔb, ni nkon, ni iween ga cha bi nyaŋ kitiŋ kimina. Sin aabaa kan ke saah nan len pu na mɔmɔk gbiin a.

²⁵ Tɔ, Ndindaan Uwumbɔr, Babiloŋ yaab ban bi nyaŋ kitiŋ kimina, sin mu le bui ke m daa nkpaakon ngbaan biseeraadam aanimbil ni.”

²⁶ Le Uwumbɔr ki bui mi ke,

²⁷ “Min le ye Uwumbɔr, u ye unii mɔmɔk Aawumbɔr na. Nibaa aa pɔɔ m chee.

²⁸ M ban m di kitiŋ kimina tii Babiloŋ Aabɔr Nebukadnesar ni waajab la; bi ga nyaŋ ki,

²⁹ ki see ki mmii. Bi ga see ki ni tidir ti pu binib seer tulalee aayon tii liwaal Baal ti paab, ki joo ndaan toor kitork tii ŋiwaa, ki cha maaŋuul fii bi pu na mɔmɔk mmii ni.

³⁰ Ki nyan Israel yaab ni Juda yaab aapiin aabɔr ni, bi ŋani maah kaa gee pu na la, le baatun fiini maaŋuul.

³¹ Ki nyan nwiin mundaal bi nan maa kitiŋ kee na, le kaanib cha maaŋuul fii sakpen. M ŋa nlandak ke m kuln ki,

³² Juda ni Jerusalem aanib, ni baabɔrb, ni baayidam, ni baatotoorb, ni bibɔnabr mɔmɔk aah tun titunwanbir ti mɔmɔk na pu.

³³ Bi fenn bipuwɔb tii mi, le m ma beenin mɔk bi, le baa pel ki bae.

³⁴ Bi nan kpaan di baawaabir ngbaan bil Maadichal li bi maa tii mi pu na, le ki bii lidichal ngbaan.

³⁵ Bi maa liwaal Baal aatork aabimbin Hinom Aafataŋ ni, ke bi li joo bijapɔtiib ni bibisatiib toor kitork tii liwaal Molek. Maa nan bui bi ke bi ŋa kina; kina aalandak aa nan kpaan koo nsui ni ke bi ga ŋa kina aawan ki di Juda aanib koon titunwanbir ni.”

Tipuur ti kpa limakl na

³⁶ Uwumbɔr u ye Israel yaab Aawumbɔr na nan bui mi ke, “Jeremia, binib ngbaan bi len ke butɔb, ni nkon, ni iween le ga cha Babiloŋ aabɔr nyaŋ kitiŋ kimina. Tɔ, li pel maah ki kpa pu m len kpee na.

³⁷ M ga ki kuun ni binib ngbaan maaŋuusakpeln aah nan cha bi yaa ki bi ntim mu ni na, ki giin ni bi do, ki nan cha bi li koo nsuudoon ni.

³⁸ Bi ga li ye maanib, le m mu ye Baawumbɔr.

³⁹ M ga tii bi lituln libaa baanja le baamɔfal ni. Nima le ga li ye ke bi li nyuŋni mi n‑yoonn mɔmɔk, bima bibaa ni biyaabitiib aamɔfal pu.

⁴⁰ M ga puu tipuur ti kaa kpa ndoon na tii bi. M ga li ŋani tiwan ni ŋan na tii bi n‑yoonn mɔmɔk, le ki ga cha bi li san mi bisui mɔmɔk ni, aan bi taa ki fenn bipuwɔb tii mi daalbaadaal.

⁴¹ M yaa ŋani tiwan ni ŋan na tii bi kan, ni ga li mɔ mi, le m ga kaan bi kitiŋ kimina ni, kaan ki fiin bi.

⁴² “Maah nan joo ni tibɔbir tee nan lii binib bee pu pu na, kina le m ga ki tii bi tiwanyaan ni mɔmɔk m nan puu tii bi na.

⁴³ Binib ngbaan len le ke kitiŋ kimina ga li bi ke nteersakpiin mu ni binib ni tiwakor aa koo na la, le Babiloŋ yaab ga gaa ki. Tɔ, bi ga ki gir daa ikpaakon, kitiŋ kimina pu.

⁴⁴ Binib ga daa i, le bi nyii biŋaal tigbann pu, ki kpab ti, biseeraadam mu ga li bi. Nimina ga ŋa kina Benjaminn aapepel ni, ni ntimbim mu bi gbɔk Jerusalem na, ni Juda aatim ni, ni ntim mu bi ŋigongon aatiŋ pu na, ni taab aagongon aatim ni, ni Juda aaŋangii wɔb. M ga giin binib ngbaan baatiŋ pu. Min Uwumbɔr le len kina.”