Jeremia 31 - Uwumbɔr aagbaŋ

Israel yaab aah ga gir ni pu na

¹ Uwumbɔr len ke, “N‑yoonn choo le m ga li ye Israel aanibol mɔmɔk Aawumbɔr, le bi mu li ye maanib.

² Nteersakpiin ni, m nan san binib bi nan ŋmar kaa kpo na kinimbaak. Israel aanib aah nan ban lifuur na,

³ m nan nya dandar ki dan bi chee. Israel aanib, m gee nimi n‑yoonn mɔmɔk, le ki ga li mɔk nimi maageehm mu bi n‑yoonn mɔmɔk na.

⁴ M ga ki gir maa nimi kaan. Ni ga ki gir yoor nimi aagangan ki waa mpopiin aawaal.

⁵ Ni ga ki gir naan ŋisubil aasar Samaria aagongon pu, le binib bi naan ti na ga ji tisar ngbaan aah ga ŋa tijikaar ti na.

⁶ Mbamɔn, n‑yoonn choo, le bikikiib ga sil Efraim aagongon paab ki bui ke, ‘Cha ti jon buen Sionn aajool, Tidindaan Uwumbɔr chee man.’”

⁷ Uwumbɔr ki bui ke, “Li gaa mpopiin aalahn Israel aatimbol li ye litimbol sakpeln ki jer ŋitimbol mɔmɔk na pu man. Gaa nimi aapak aalahn man, ‘Uwumbɔr gaa waanib lii a; u gaa binib bi mɔmɔk gur na lii a.’

⁸ M ga nyan ni bi ŋŋangan wɔb ki kuun bi nya ni kitiŋ aanaanmɔk. Bijoom ni biwɔb ga dii ni bi, bipudam ni bipiib bi ban bi maa na mu ga dii ni, bi ga gir ni ki li ye litimbol sakpeln.

⁹ Maanib ga li wii le ki mee limeel, le m cheeni bi choo. M ga mɔk bi ikpen i kpa nnyun na chee, ki di bi chuun isan i pu joon aan baan gbeer nibaa na. M bi ke te na le Israel yaab chee, le Efraim ye maaboja.”

¹⁰ Uwumbɔr ki bui ke, “Ŋitimbol, li pel m chee man, ki di maabɔr moon nnyusakpem aagbaan ni daa na. M nan yaa maanib, le m ga ki kuun ni bi, ki li kpaa bi ke upihkpaal aah kpaa waapiih pu na.

¹¹ M gaa Israel aanib lii a, ki nyan bi litimbol sakpeln aapɔɔn ni.

¹² Bi ga dan ki nan gaa mpopiin aalahn Sionn Aajool pu, le bisui piir maapiin i m ga tii bi na pu, ipiin i ga li ye njikaabim, ni ndaan, ni olif aakpan, ni ipiih, ni inaa na. Bi ga li bi ke tikpifar aasaak ki kpa nsoon na la; bi ga li kpa baah ban tiwan ni na mɔmɔk.

¹³ Bisapɔm ga li kpa mpopiin le ki waa liwaal, le bijab bi por na, ni binachipɔm ga li mɔɔni. M ga sɔŋ bisui ki cha baakpowiil kpaln mpopiin, ki cha baasuugar kpaln mmɔɔn.

¹⁴ M ga cha bitotoorb ji tijikaar nyaan ki ti bab, ki tii maanib baah ban pu na mɔmɔk. Min Uwumbɔr le len kina.”

Uwumbɔr aah ga san Israel yaab kinimbaak pu na

¹⁵ Uwumbɔr bui ke, “Bi ŋun kifuuk Rama aatiŋ ni, ki ye ikpowiil aafuuk la. Rachel le wii waabim pu; bi mɔmɔk kpo a, le ubaa aa ŋmaa sɔŋ usui.

¹⁶ Di cha saawiil ngbaan ki pir saanyunyunn ngbaan. M ga teen saah ŋa pu tii saabim na mɔmɔk; bi ga nya bidim ngbaan aatiŋ ni ki gir ni.

¹⁷ N‑yoonn mu choo na kpa limakl; saabim ga gir kun ni. Min Uwumbɔr le len kina.

¹⁸ M ŋun Israel aanib aasui aah bii aan bi len pu na ke, Uwumbɔr, ti nan bi ke kiwakork ki bi timoor ni na la; le aa nan mɔk timi taah ga kii tii si pu na. Giin ni timi; ti gor ke ti gir ni sin Tidindaan Uwumbɔr chee.

¹⁹ Ti nan fenn tipuwɔb tii si, le naa yunn le ti ki ban ke ti gir ni. Saah nan daa titafal na aapuwɔb, le ti nan ka tii tiyil mpombiin pu. Ti nan jin inimɔɔn, ba pu? taah nan laa ye mbim pu na le ti nan tun titunwanbir.

²⁰ Israel aatimbol, sin le ye njapɔɔn u m gee u sakpen na, sin le ye ubo u m gee u jer maabim mɔmɔk na. N‑yoonn mumɔk m yin saayimbil na, le m dak aa pu ni ngeehm. Nsui mɔmɔk bi aa chee la; m ga san si kinimbaak.

²¹ Ŋa tidaan ki daan nsan; ki gir ban saah nan dii nin chee buen na. Israel yaab, gir ni man, gir ni ntim mu ni nan nyan mu ponn ni na.

²² Nimi maa‑kpa‑gaakii‑dam, ni ga li joo beeni ki ti saa bayoonn? M ŋa tiwachann yayan nibaa, ni bi niyayan ke upii aah kiir uja pu na la.”

Uwumbɔr aanib aah ga nan kan nkam n‑yoonn mu choo na pu na

²³ Uwumbɔr Mpɔɔnsakpiindaan, u ye Israel yaab Aawumbɔr na bui ke, “M yaa ki giin binib ngbaan kaan baatiŋ pu kan, bi ga ki len Juda ni kaatim ni ke, ‘Uwumbɔr ŋa waanyoor ŋa Jerusalem aagongoln li bi chain, aan u koo nima chee na pu.’

²⁴ Binib ga li koo Juda ni kaatim mɔmɔk ni, le bikpaab ga li bi, le biwakojoob mu ni baawakor li bi.

²⁵ M ga tii binib bi bak na lifuur, ki cha nkon aah joo bi na ji tijikaar ti bab.

²⁶ Kina pu le binib ga len ke, ‘M doon geen le ki fii ki pɔɔ kab.’

²⁷ “Min Uwumbɔr len ke n‑yoonn choo, le m ga cha Israel ni Juda aatiŋ gbiin binib ni tiwakor.

²⁸ Maah nan chuu mbaa pu ki ŋɔb bi, ki gbaa bi bil, ki nyaŋ ki kuln bi na, kina le m ga ki chuu mbaa ki gir ŋum bi ke busub na, ki maa bi kaan.

²⁹ N‑yoonn ngbaan yaa nan fuu ni kan, binib aan ki len ke, ‘Tetiib le ŋman ŋisubil ŋi mɔɔn na, le ni nan tee mɔɔn baabim aamɔi ni.’

³⁰ Ni ga li ye le ke umɔk ŋman ŋisubil ŋi mɔɔn na, uma le aanyin ga li mɔɔn; le unii mɔk aatunwanbir ga ku u.”

³¹ Uwumbɔr len ke, “N‑yoonn choo le m ga nan puu tipuupɔln tii Israel ni Juda aanib.

³² Taan le bi ke tipuukpok ti m nan puu tii biyaajatiib, buyoonn m nan chuu biŋaal ki daar nyan bi, ki cheen bi nyan Ijipt aatiŋ ni na. M nan bi ke chal na le ki tii bi, bi mu aa nan joo tipuur ngbaan.

³³ Maah ga puu tipuupɔln ti tii Israel yaab na ga li ye le ke: M ga di maakaal ŋa baalandak ni, ki ŋmee mu bisui ponn ni. M ga li ye Baawumbɔr, le bi li ye maanib.

³⁴ Bi ponn ni ubaa aan ki mɔk uŋeen aatɔ ke u bee Uwumbɔr, ba pu? bi mɔmɔk ga bee mi, biwaatiib ki ti saa bikpaam mɔmɔk ga bee mi. M ga di baatunwanbir cha pinn bi, kaan ki teer baataani. Min Uwumbɔr le len kina.”

³⁵ Uwumbɔr tii nwiin ke mu li wiin nwiin pu la, ki cha uŋmal ni iŋmabi tii nwiihn kinyeek. U kur nnyusakpem ni le mu ŋuuni, waayimbil le ye ke Uwumbɔr Mpɔɔnsakpiindaan.

³⁶ U puu ke tiwan aah naan pu na aah ga yunn pu na, kina le Israel aatimbol ga yunn.

³⁷ Bi yaa ga nan ŋmaa ŋaŋ kitaapaak, ki yaa ŋmaa koo kitiŋ aah baan nin chee na ki lik lik naah bi pu na daalbaadaal kan, le u ga yii Israel yaab baah tun pu mɔmɔk na pu. Uwumbɔr le len kina.

³⁸ Uwumbɔr ki len ke, “N‑yoonn choo, le bi ga ki gir maa Jerusalem pel pel ke maatiŋ, ki nya Hananel aadifɔfɔk ki bi mbisamɔb mu bi yin mu ke Kilɔlɔŋ ni Aabisamɔb na aawilir wɔb na.

³⁹ Kaanaanmɔk aakuul ga nya nima, liwilir wɔb, ki ti saa Gareb aagongoln na chee, le ki mann buen Goa wɔb.

⁴⁰ Kifataŋ ki ponn ni bi sui binib ki joo timoor ti kpir na mɔmɔk, ni ikpaakon i bi Kidronn aabun aapaacham na, ki ti saa mbisamɔb mu bi yin mu ke Utaan Aabisamɔb, aan mu bi liwipuul wɔb na, ga li bi chain tii mi la. Ubaa aan ki tur kitiŋ ngbaan lii, kaan ki ber ki daalbaadaal.”