Jeremia 30 - Uwumbɔr aagbaŋ

Uwumbɔr aah puu tipuur ti tii waanib na

¹ Uwumbɔr, u ye Israel yaab Aawumbɔr na

² bui mi ke, “Ŋmee maah tuk si tibɔr ti mɔmɔk na ŋa kigbaŋ ni,

³ ba pu? n‑yoonn choo le m ga nan giin ni maanib, Israel ni Juda yaab. M ga giin ni bi biyaajatiib aatiŋ ki m nan di tii bi na pu, le ki ga ki ŋa baatiŋ. Min Uwumbɔr le len kina.”

⁴ Uwumbɔr bui Israel ni Juda aanib ke:

⁵ “M ŋun ijawaan aawiil pu, iwiil ngbaan ye ijawaan aawiil, kaa ye nsuudoon aawiil.

⁶ Tɔ, sil man ki dakl lik. Uja ga ŋmaa maa ubo oo? Tɔ, ni ŋa kinye aan m waa uja mɔmɔk bub joo upuul ke upii u ban u maa na? Ba ŋa unii mɔk naahn ubun kina?

⁷ Ijawaan sakpiin aawiin mubaa choo; nwiin ngbaan aaŋeen aatɔ aan li bi, maanib aapombiin aayoonn le bi na, bi mu tee ga ŋmar.”

⁸ Uwumbɔr Mpɔɔnsakpiindaan ki bui ke: “Liyaadaal ngbaan yaa nan fuu ni kan, m ga kool inaaja i ko na aadɔ i bi di leen bisil na ki chuu nyan baakululn na mu, le baan ki li ye biwɔwɔm aanaagbiib.

⁹ Bi ga li gur tun min Bidindaan Uwumbɔr aatuln, ni maah ga nyan Ubɔrkpaan David aayaabil u kaan nnaan na aatuln la.

¹⁰ Maanib, taa san ijawaan man; Israel aanib, taa cha ijawaan joo nimi man. M ga nyan ni nimi dandar aatiŋ ni, m ga nyan ni nimi kitiŋ ki ponn ni, ni ye binaagbiib na. Ni ga gir ni linampal ki nan li bi nsuudoon ni, ni ga li bi lifuur ni, le ubaa aan ki cha ijawaan chuu nimi.

¹¹ M ga dan ni chee ki nan gaa nimi lii. M ga kuln ŋitimbol ŋi mɔmɔk m cha ni yaa ki bi ŋi ponn ni na, maan kuln nimi ma. Maan di cha ki taa daa nitafal; m mu yaa daa nitafal kan, m ga daa ki ŋeer la. Min Uwumbɔr le len kina.”

¹² Uwumbɔr ki bui waanib ke, “Nimi aabuun aa kpa ke i yann, nimi aatotonn aan doo.

¹³ Ubaa aa bi ki ga li joo nimi, nnyɔk aa bi ki ga cha nimi aabuun yann, naa kpa limakl ke ni ga sɔŋ.

¹⁴ Nibɔtiib mɔmɔk suln nibɔr a; bitafal aa ki bi ni ponn ni. M tak nimi ke udin na la; nimi aatunwanbir aah wiir aan nimi aabiin nyaŋ sakpen pu na le cha nimi aatafadaan bir.

¹⁵ Nnyɔk aa bi ki ga tii nimi laafee, kina pu na, taa ki len nimi aatotonn aabɔr man. Nimi aatunwanbir aah wiir aan nimi aabiin mu nyaŋ sakpen pu na le m daa nitafal kina.

¹⁶ Tɔ, dandana ma kan, binib ga nae bi mɔmɔk nan nae nimi na, bi ga chur nimi aadim tinaagbiir di buen. Bi ga muk binib bi mɔmɔk nan muk nimi na, le ki gaa binib bi mɔmɔk nan gaal nimi aawan mpɔɔn na mu aawan mpɔɔn.

¹⁷ Ni yaa po ye ke nimi aadim len ke, ‘Bi di Sionn mee a; ubaa aatafal aa ki bi u ni’ kan, m ga ki cha ni pɔɔk, m ga cha nimi aabuun yann. Min Uwumbɔr le len kina.”

¹⁸ Uwumbɔr ki bui ke, “M ga giin ni maanib baatiŋ pu ki san lidichal mɔmɔk kinimbaak; Jerusalem ga ki gir maa, le kaanaan aadichal ki gir sil.

¹⁹ Binib bi koo nima na ga gaa kipak aalahn; mpopiin ga dan le bi li tar. M ga di ŋŋaal biin bi pu le bi pɔr kpee; le kina ngbaan tii bi liyimbil.

²⁰ M ga cha litimbol ngbaan ki kan laah nan kpa mpɔɔn mu n‑yaayoonn na, ki cha li ki too nyal sil; m ga daa binib bi mɔmɔk muk bi na aatafal.

^21-22 Baajojoor ga nya ni baatimbol ni la, le baayidaan nya ni bibaa aanib ni. M yaa tun yin u kan, u ga dan m chee, maah kaa tun yin u na waan kaa dan m chee. Bi ga li ye maanib, le m ye Baawumbɔr. Min Uwumbɔr le len kina.”

^23-24 Uwumbɔr aaŋuul ye kitaabuŋ la, li ye libupɔɔl li ga daa bibiindam aayil pu na. U yaa kaa ti ŋa waah ban pu na doo kan, laan ŋmin. N‑yoonn mu choo na le waanib ga nan bee nimina aatataa mbamɔm.