Jeremia 3 - Uwumbɔr aagbaŋ

Israel yaab aah yii Uwumbɔr pu na

¹ Uwumbɔr nan bui ke, “Uja yaa yii upuu, le u yaa fii ki ti mɔn uja uken kan, waan ti ki ŋmaa gaa ni u. Nimina ga bii kitiŋ kee kookoo la. Tɔ, Israel yaab, ni kan bɔtiib pam, le ki tee ki ban ke ni gir ni m chee.

² Lik ŋigongon paab man. Nibaa chee aa gur aan naa tun lituln ke udagoor na. Ni nan sii nsan chee ki kii nibɔtiib, ke nteersakpiin ponn ni aanib aah sii pu ki kii ubaa ke bi ku u na la. Ni di nimi aadagook bii kitiŋ kee.

³ Nima pu le utaal aa nan ki nu, le utakuutaal mu aa nan ki nu. Ni sil naahn bidagoob la; naa san inimɔɔn.

⁴ “Le ni bui mi dandana wee ke, ‘Aa ye tite la, le taah nan ye mbim pu na, aa nan gee timi, ki beenin gee timi.

⁵ Saaŋuul aan li feei n‑yoonn mɔmɔk; saan gee ti pu liŋuul ki ti saa n‑yoonn mu kaa kpa ndoon na.’ Israel yaab, ni len kina, le ki tee tun titunwanbir timɔk ni ga ŋman na.”

Ni ŋan ke Israel yaab ni Juda yaab yii baatunwanbir

⁶ Josia aah nan ye ubɔr buyoonn na, le Uwumbɔr nan bui mi ke, “Aa kan Israel yaab bi bi ke bipiidagoob na aah tun pu na aa? Bi fenn bipuwɔb tii mi, le ki tun lituln ke bidagoob na ligongoln limɔk paa na pu, ni bususoom mɔk taab.

⁷ M nan dak ke bi yaa ŋa nimina mɔmɔk kan, bi ga ki gir ni m chee. Le bi yii, kaa gir ni, le bina aabitiib Juda yaab bi kaa kpa gaakii na kan ni mɔmɔk.

⁸ Juda aanibol mu nan kan ke m yii Israel aanibol, ki jenn u lii; ba pu? u nan fenn upuwɔb tii mi ki kpaln udagoor. Le Juda, u ye Israel aana aabo u nyan mpuwɔb na aa nan san ijawaan. U mu nan kpaln udagoor,

⁹ kaa nan san inimɔɔn kpala. U nan bii kitiŋ ngbaan, le ki dooni ŋitakpal ni isui.

¹⁰ Nee mɔmɔk aapuwɔb na, Israel aana aabo Juda, u nyan mpuwɔb na ŋmann ke u gir ni m chee la; waa nan si chob. Min Uwumbɔr le len kina.”

¹¹ Le Uwumbɔr nan bui mi ke u nyi ke Israel yaab fenn bipuwɔb tii u, bi mu tee soor Juda yaab bi nya upuwɔb na.

¹² U nan bui mi ke m buen ki ti bui Israel yaab ke, “Israel yaab bi nyan mpuwɔb na, gir ni m chee man. M ye unimbaasaln la, le maaŋuul aan fii; maaŋuul aan fii ni pu ki ti saa n‑yoonn mu kaa kpa ndoon na.

¹³ Kii ke ni tun taani, ke ni nyan Nidindaan Uwumbɔr aapuwɔb. Kpiir ke ni di nimi aageehn tii ŋiwaa, bususoom mɔmɔk taab, kaa kii maamɔb. Min Uwumbɔr le len kina.

¹⁴ “Nimi bi nyan mpuwɔb na, gir ni man; ni ye maanib la. M ga nyan ni ponn ni ubaabaa kitiŋ mɔmɔk ni, ki nyan bilelee ntaŋaal mɔmɔk ni, ki di nimi giin ni Sionn Aajool paab.

¹⁵ M ga ban bijojoob bi kii maamɔb na le tii nimi, le bi ga di nlan ni ŋuntii joo nimi.

¹⁶ Le ni yaa nan wiir kitiŋ ngbaan pu kan, binib aan ki len Maakaal Aadakaa bɔr. Baan ki len waabɔr, kaan ki teer u bɔr; baan ki li ban u, kaan ki ŋa uken teen waabuul ni.

¹⁷ N‑yoonn ngbaan yaa nan fuu ni kan, bi ga li gur yin Jerusalem ke ‘Uwumbɔr Aabɔrjal’ la, le ŋitimbol mɔmɔk ga kuun nima ki doon mi. Baan ki ŋa bisui i bir ki kpa maaŋuntafal na aah mɔk bi ke bi ŋa pu na.

¹⁸ Israel yaab ga buen ti kpee Juda yaab pu, le bi mɔmɔk ga nya tinaagbiir ni, ŋŋangan wɔb aatiŋ na ponn ni, ki gir ni kitiŋ ki m nan di tii niyaajatiib ke ki li ye biyaan na pu.”

Uwumbɔr aanib aah dooni ŋiwaa pu na

¹⁹ Uwumbɔr bui ke, “Israel yaab, m nan ban ke m gaa nimi ke njapɔɔn na la, ki tii nimi mpopiin aatiŋ, dulnyaa wee ni aatiŋ ki ŋan ntim mɔmɔk ni na. M nan ban ke ni li yin mi ke nite la, ki taa ki fenn nipuwɔb tii mi daalbaadaal.

²⁰ Le ni bi ke upii u nyan uchal aapuwɔb na, le ni mu nyan mpuwɔb kina. Min Uwumbɔr le len kina.”

²¹ Israel yaab aah suln Bidindaan Uwumbɔr pu ki tun titunwanbir aatuln na, le kifuuk faa ŋijoo paab, ki ye Israel yaab aah wii ki gaŋni pu na aafuuk la.

²² Nimi bi mɔmɔk fenn nipuwɔb tii Uwumbɔr na, gir ni man; u ga tii nimi laafee, ki cha ni ki sil upuwɔb. Ni bui ke, “Mbamɔn, ti ban ti gir ni Uwumbɔr chee la, ba pu? uma le ye timi Aawumbɔr.

²³ Taah dooni ŋiwaa ŋigongon paab pu na aa kpa timi nterm mubaa. Timi Israel yaab aaterm nyani Tidindaan Uwumbɔr baanja chee la.

²⁴ Le inimɔɔn aawaal Baal na aadoon pu cha ti lann ipiih, ni inaa, ni japɔtiib, ni bisatiib, ni tiwan nimɔk tiyaajatiib nan tun ki kan n‑yaajayoonn na.

²⁵ Ti ga doon kitiŋ le ki cha timi aanimɔɔn biin ti pu. Timi ni tiyaajatiib tun Tidindaan Uwumbɔr titunwanbir le n‑yoonn mɔmɔk; taa kii waamɔb daalbaadaal.”