Jeremia 29 - Uwumbɔr aagbaŋ

Jeremia aah ŋmee kigbaŋ ki tii Juu yaab bi bi Babiloŋ ni na aabɔr

¹ M nan ŋmee kigbaŋ tii bitotoorb, ni bibɔnabr, ni binib ngbaan aayidam, ni bi mɔmɔk gur aan Nebukadnesar nan nyan bi Jerusalem ki di bi buen tinaagbiir ni Babiloŋ aatiŋ ni na.

² Baah nan chuu Ubɔr Jehoyachinn, ni una, ni libɔrchiln ni aaninkpiib, ni Juda ni Jerusalem aayidam, ni bikpikpiib, ni biwanŋab mɔmɔk di buen tinaagbiir ni na aapuwɔb le m nan ŋmee kigbaŋ ngbaan.

³ M nan di kigbaŋ ngbaan tii Safann aajapɔɔn Elasa, ni Hilkia aajapɔɔn Gemaria, bi Juda Aabɔr Sedekia nan tun bi Babiloŋ aatiŋ ni, Ubɔr Nebukadnesar chee na la. Kaabɔr sɔ:

⁴ “Uwumbɔr Mpɔɔnsakpiindaan, u ye Israel yaab Aawumbɔr na, bui binib bi mɔmɔk u nan cha Nebukadnesar chur Jerusalem ni ki di buen tinaagbiir ni, Babiloŋ aatiŋ ni na ke:

⁵ ‘Maa ŋidichal ki kal man. Naan tisar ki ji naah bun tijikaar ti ti ponn ni na.

⁶ Yoor bipiib ki maa mbim man, ki cha nijapɔtiib mu yoor bipiib, nibisatiib mu mɔn tichar, aan ki mu kan mbim. Ni ŋan ke ni pɔr ki taa seen.

⁷ Li tun man ki cha ntim mu m cha ni ti bi tinaagbiir ni mu ponn ni na kan tinyoor. Li mee limeel m chee bi pu, ba pu? bi yaa kan liwangol kan, ni mu ga kan.

⁸ Min Uwumbɔr u ye Israel yaab Aawumbɔr na sak nimi ke ni taa cha bibɔnabr bi bi ni ponn ni na li ŋmanni nimi, ki taa cha binib bi bui ke bi nyi fen aabɔr na ŋmann nimi. Taa pel man baadaŋ ti bi daŋni na.

⁹ Bi joo maayimbil le geei inyamɔn. Maa tun ni bi. Min Uwumbɔr le len kina.’

¹⁰ “Uwumbɔr ki len ke, ‘Babiloŋ aabin imonko itaa ni kipiik na yaa jer kan, m ga mɔk nimi maah neen nimi pu ki joo tipuur ti m nan puu ke m ga giin ni nimi nido na.

¹¹ Min baanja le nyi maah dak ni pu pu na, ilandak i ye ke m joo ni nimi nkam kaa ye tibɔbir na, ilandak i ye ke m joo ni nimi fen u ni mak u pu na. N‑yoonn mu choo na kpa limakl;

¹² Le ni ga yin mi. Ni ga dan ki nan mee limeel, le m ga ŋun nimi aameel.

¹³ Ni ga ban mi, le ki ga kan mi, ba pu? ni ga di nisui mɔmɔk le ban mi.

¹⁴ Een, m bui ke, ni ga kan mi, le m ga giin ni nimi nido aatiŋ pu. M ga kuun ni nimi litimbol mɔk ni, ni nimɔk m cha ni yaa ki bi na, le m ga giin ni nimi kitiŋ ki pu m nan nyan nimi di buen tinaagbiir ni na. Min Uwumbɔr le len kina.’

¹⁵ “Nimi le bui ke Uwumbɔr tii nimi bibɔnabr Babiloŋ aatiŋ ni.

¹⁶ Li pel man Uwumbɔr aah len ubɔr u joo nnaan mu Ubɔrkpaan David nan joo na, ni kitiŋ kimina aanib, bima le ye nido yaab bi baa nan chur bi buen tinaagbiir ni, ni chee na,

¹⁷ Uwumbɔr Mpɔɔnsakpiindaan len ke, ‘M ban m cha butɔb, ni nkon, ni iween lir bi pu, m ga ŋa bi ke ŋikakan ŋi bur aan baan ŋmaa ŋmɔ ŋi na.

¹⁸ M ga li joo ni butɔb, ni nkon, ni iween le san dii bi, le dulnyaa wee aatimbol mɔmɔk ga san ijawaan, baah kan pu na pu. Nimɔk m cha bi yaa ki bi na, binib aapobil ga yuk, ki san ijawaan, baah kan tiwan ni mɔmɔk na. Binib ga laa bi, ki li joo baayimbil puuni lir biken pu.

¹⁹ Baah kaa kii tibɔr ti m nan joo tii ni maatutum, bi ye bibɔnabr na, le cha nimina ŋa. Tɔ, nimi bi bi tinaagbiir ni, Babiloŋ aatiŋ ni na mu aa nan ŋun.

²⁰ Nimi bi mɔmɔk m cha ni buen tinaagbiir ni Babiloŋ aatiŋ ni na, li pel man, min Uwumbɔr aah len pu na.’

²¹ “Uwumbɔr Mpɔɔnsakpiindaan, u ye Israel yaab Aawumbɔr na, len Kolaya aajapɔɔn Ahab ni Maaseya aajapɔɔn Sedekia, bi chuun joo waayimbil geei inyamɔn tuk nimi na aabɔr. U len ke u ga di bi ŋa Babiloŋ Aabɔr Nebukadnesar aaŋaal ni, le u ku bi ninimbil ni.

²² Le baah chur binib bi tinaagbiir Jerusalem ni, ki di bi buen Babiloŋ ni na yaa ban bi puun lii unii pu kan, bi ga bui ke, ‘Uwumbɔr ŋa si ke waah nan cha Babiloŋ aabɔr pun Sedekia ni Ahab mmii ni, bi laa beenin fu pu na.’

²³ Baah tun titunwanbir sakpen pu na, baadoon le ga li bi na; bi goor kidagook, ki di Uwumbɔr aayimbil geei inyamɔn. Uwumbɔr aa nan gee kina; u nyi baah tun pu na, le uma le ye useeraadaan. Uwumbɔr le len kina.”

Semaya aah ŋmee kigbaŋ ki na aabɔr

^24-25 Uwumbɔr Mpɔɔnsakpiindaan, u ye Israel yaab Aawumbɔr na, nan tii mi tibɔr ke m di tii Semaya, u ye Nehelam aatiŋ aanii, ki nan di ubaa aayimbil pu ki ŋmee kigbaŋ tii Jerusalem aanib mɔmɔk, ni utotoor Sefania, u aate ye Maaseya na, ni bitotoorb biken na mɔmɔk. Semaya nan ŋmee tibɔr timina le waagbaŋ ngbaan ni tii Sefania:

²⁶ “Uwumbɔr nan yii Jehoyada le ki di si ŋa utotoor, sin le ye uma Uwumbɔr Aadichal ni aayidaan. Ni ye sin le aatuln ke aa chur biwaarb bi mɔmɔk chuun ŋmanni ke bi ye bibɔnabr na, ki di tikur aabuen ŋmaan bisil, ki di tikululn baa bi kaan.

²⁷ Ba ŋa saa ŋa Anatof aanii u bi yin u ke Jeremia aan u chuun tuk binib tibɔr ke u ye Uwumbɔr aabɔnabr na kina?

²⁸ U tuk binib bi bi Babiloŋ ni, tinaagbiir ni na, ke bi ga li bi nima aan ni ti yunn, kina pu na, bi maa ŋidichal, ki kal nima, ki naan tisar, ki ji baah ko tijikaar ti na; kina pu na, cha bi chuu u.”

²⁹ Sefania nan karn kigbaŋ ngbaan tii mi.

³⁰ Le Uwumbɔr bui mi

^31-32 ke m di Semaya aabɔr tee naŋ tuk binib bi mɔmɔk bi tinaagbiir ni Babiloŋ ponn ni na ke, “Min Uwumbɔr ga daa Semaya ni uyaabitiib aatafal. Maa tun ni u, le u len tibɔr ke waah ye maabɔnabr le na, ki cha ni gaa waah geei inyamɔn i na. Waan li kpa yaabil ni ponn ni. Waah bui maanib ke bi nya mpuwɔb na, waan li bi ki nan kan tiwanyaan ni m ban m nan ŋa tii maanib na. Min Uwumbɔr le len kina.”