Jeremia 28 - Uwumbɔr aagbaŋ

Jeremia ni Uwumbɔr aabɔnabr Hanania aabɔr

¹ Libinbaal ngbaan ponn ni, Sedekia aah nan ye ubɔr pu na aabinanar aaŋmaŋmu ni, le Asur aajapɔɔn Hanania u nan ye ubɔnabr Gibeonn aatiŋ ni na nan len m chee tibɔr Uwumbɔr Aadichal ni.

² U nan bui mi bitotoorb ni binib ngbaan mɔmɔk aanimbil ni, ke Uwumbɔr Mpɔɔnsakpiindaan, u ye Israel yaab Aawumbɔr na len ke, “M bii Babiloŋ aabɔr aapɔɔn.

³ Joo cha ni ŋibin ŋilee na, m ga giin ni Maadichal ni aawangol li Babiloŋ Aabɔr Nebukadnesar nan yoor di buen na.

⁴ M ga giin ni Juda aabɔr Jehoyachinn, u aate ye Jehoyakim na, ni Juda aanib bi mɔmɔk nan buen tinaagbiir ni Babiloŋ ni na. Een, m ga bii Babiloŋ aabɔr aapɔɔn. Min Uwumbɔr le len kina.”

⁵ M nan bui Hanania ni bitotoorb, ni binib bi mɔmɔk nan si Uwumbɔr Aadichal ni na aanimbil ni ke:

⁶ “Mbamɔn, Uwumbɔr ba sil ŋa kina kan, ni ba ŋan. Saabɔkpiirkaan tee ba ga sil gbiin ke u nyan ni Babiloŋ aatiŋ ni, Waadichal ni aawangol ni binib bi mɔmɔk bi tinaagbiir ni nima na kan, m ba ga li gee kina sakpen.

⁷ Tɔ, tee li pel maah kpa pu m tuk aa ni binib ngbaan na.

⁸ Uwumbɔr aabɔnabr bi nan puen len tibɔr n‑yaajayoonn, waahr aan m ni sin nin fuu ni na, nan len ke butɔb, ni nkon, ni iween ga dan ŋitimbol ni bibɔrkpaam pam pu.

⁹ Tɔ, ubɔnabr u len ke nsuudoon bi, aan waah len pu na nan gbiin kan, le bi ga bee u ke u sil ye ubɔnabr u Uwumbɔr tun ni u na.”

¹⁰ Le Hanania chuu inaaja aadɔ i lee nsil na ki kool kool i yuk yuk,

¹¹ le ki len binib ngbaan mɔmɔk aanimbil ni ke: “Uwumbɔr bui ke kina le u ga bii Ubɔr Nebukadnesar aadɔ i u di leen ŋitimbol mɔmɔk aasil na; ki joo cha ŋibin ŋilee ponn ni le u ga ŋa kina.” Le m siir.

¹² Nee aapuwɔb, le Uwumbɔr bui mi

¹³ ke m buen ti tuk Hanania ke: “Uwumbɔr bui ke aa ga ŋmaa koo idɔ i pui inaaja aasil pu na, le u ga ŋa tikur yaan teen idɔ yoo ngbaan aabuul ni.

¹⁴ Uwumbɔr Mpɔɔnsakpiindaan, u ye Israel yaab Aawumbɔr na bui ke u ga di tikur aadɔ kina le leen ŋitimbol ŋee aasil ki cha bi li tun tii Babiloŋ Aabɔr Nebukadnesar. Uwumbɔr ki len ke u ga cha ipeel mu tun tii Nebukadnesar.”

¹⁵ Le m bui Hanania kina, le ki ki len ke, “Hanania, li pel. Uwumbɔr aa nan tun ni si, le aa cha binib ngbaan gaal saanyamɔn ngbaan.

¹⁶ Kina pu na, Uwumbɔr ubaa len ke u ga ku si. Saah bui binib ngbaan ke bi yii Uwumbɔr aamɔb na, aa ga kpo waahr aan libiln lee nin jer.”

¹⁷ Le Hanania nan kpo libinbaal ngbaan aaŋmalole ponn ni.